Միջազգային հանրության եւ իրավունքի պաշտպանության կազմակերպությունների՝ Լաչինի միջանցքն անհապաղ բացելու որոշումներին ու հորդորներին ադրբեջանական պետության ղեկավարությունն արձագանքեց արհամարհական ժեստով՝ ավելի խստացնելով Արցախի շրջափակման օղակը: Դրանով պաշտոնական Բաքուն պարզապես անտեսեց իր առաջ դրված ցանկացած միջազգային ատյանի որոշում եւ հորդոր: Ապրիլի 5-ի առավոտյան Լաչինի միջանցքը փակ պահող ադրբեջանական ուժերն արգելել են նաեւ ՌԴ խաղաղապահների ուղեկցությամբ Հայաստանից Արցախի 27 քաղաքացու, այդ թվում՝ երեխաների, տարեցների եւ կանանց վերադարձն իրենց տներ:
Այսպիսով՝ հարեւան պետության ղեկավարությունը ոչ միայն չի կատարում ՄԱԿ-ի Արդարադատության միջազգային դատարանի որոշումը, այլեւ ամբողջությամբ արգելում է Արցախի քաղաքացիների ազատ տեղաշարժը Լաչինի միջանցքով, որը սահմանված է նաեւ 2020 թ. նոյեմբերի 9-ի եռակողմ հայտարարությամբ: Արգելվում է առանց այն էլ խիստ սահմանափակված տեղաշարժը միջանցքով, ինչը ծայրահեղ անհրաժեշտությամբ իրականացվում էր խաղաղապահների միջնորդությամբ: Վերջիններս ստիպված են եղել արցախցիներին ուղեկցել հետ՝ Գորիս: Իսկ 4 քաղաքացու, որոնց ինքնազգացողությունը վատացել էր, շտապօգնության մեքենաներով հասցրել են Ստեփանակերտի հիվանդանոց:
Ադրբեջանը կոպտորեն խախտում է մարդու հիմնարար իրավունքների բոլոր միջազգային նորմերը, իսկ բարոյական նորմերի մասին խոսելն ուղղակի ծիծաղելի է: Դրանով ավելորդ անգամ ապացուցվում է, որ արցախցիների իրավունքները պաշտպանելու մասին այդ երկրի իշխանությունների հայտարարությունները կեղծ են, եւ նրանց իրական նպատակը Արցախի հայաթափումն է: Պարզ է, որ Արցախի ժողովուրդը չի ընկրկելու նման ճնշումների առաջ, չի դադարեցնելու իր իրավունքների համար պայքարը, առավել եւս՝ կիսատ չի թողնի այդ գոյապայքարին իրենց կյանքը նվիրած ընտրյալների գործը: Սա էլ, իր հերթին, նշանակում է, որ միջազգային ճնշումների անարդյունավետության դեպքում Բաքուն կրկին դիմելու է ռազմական ճանապարհով Արցախը հայաթափելու փորձին:
Ռազմական նոր ագրեսիայի համար հիմքեր ստեղծելու ուղղությամբ պաշտոնական Բաքուն կատարում է դանդաղ, բայց հետեւողական քայլեր: Արդեն չորրորդ ամիսն ընթացող Լաչինի միջանցքը փակ պահելու ռեժիմի խստացմամբ ադրբեջանական պետության ղեկավարը փաստացի չեղարկում է Արցախում հրադադարն ապահովող միակ փաստաթղթի՝ 2020 թ. նոյեմբերի 9-ի եռակողմ հայտարարության հերթական կետը: Այն միակ գործող փաստաթուղթն է, որը տարածաշրջանում կանխում է ռազմական գործողությունների վերսկսումը, հետեւաբար, պաշտոնական Բաքվի հեռահար նպատակներն առավել քան թափանցիկ են ու իրատեսական:
Ադրբեջանի այս գործողություններին գործուն հակազդեցություն չկա նաեւ եռակողմ հայտարարությունը ստորագրած ՌԴ-ից: Հավանաբար, կաշկանդված լինելով ուկրաինական հակամարտությամբ՝ Մոսկվան ձեռնպահ է մնում Բաքվի նկատմամբ կտրուկ գործողություններից, ինչն ավելի սանձարձակ է դարձնում վերջինիս: Մոսկվայից նաեւ հայտարարում են, որ խաղաղապահների մանդատի լիազորությունները սահմանափակ են, հետեւաբար, ավելին չեն կարող անել: Այս դեպքում Արցախում գործընթացների աղետաբեր ընթացքը կանխելու համար անհրաժեշտ են անվտանգության եւ մարդու իրավունքների պահպանման լրացուցիչ մեխանիզմներ ու միջոցներ: Ադրբեջանը մերժում է այդ ուղղությամբ ցանկացած առաջարկ: Պարզ է, որ իր նենգ նպատակներն իրականացնելու ճանապարհին Բաքուն չի ցանկանա տեսնել միջազգային միջնորդ այլ ձեւաչափ: Այստեղ է, որ առաջնային անհրաժեշտություն են դառնում այդ մեխանիզմներն Ադրբեջանի ղեկավարությանը պարտադրելու միջազգային կառույցների գործողությունները: Այն չանելն ուղղակի նշանակում է, որ միջազգային հանրությունն աչքերը փակում է հերթական՝ արդեն քաղաքակրթության 21-րդ դարում իրականացվող սողացող ցեղասպանության փաստի առաջ:
