Ամեն տարի օգոստոսի առաջին կիրակի օրը Հայաստանում, ՌԴ-ում, նախկին ԽՍՀՄ մի շարք երկրներում նշվում է երկաթուղու աշխատողների օրը: Արդեն 14-րդ տարին մեր երկրի երկաթուղին հավատարմագրային հիմունքներով շահագործում է «Հարավկովկասյան երկաթուղի» ՓԲ ընկերությունը:
Ընկերության գլխավոր տնօրենի խորհրդական Ռաֆայել Սեխլեյանի խոսքով՝ Հարավկովկասյան երկաթուղին այսօր ակտիվորեն զարգացող, հաջողություններ ունեցող ընկերություն է, որն իր գործունեության կարճ ժամանակաընթացքում հասցրել է իրականացնել ենթակառուցվածքային կարեւոր բազմաթիվ նախագծեր, վերականգնել եւ գործարկել երկաթուղային հիմնական դեպոները, կայարանները, էլեկտրաֆիկացման եւ էլեկտրամատակարարման, կապի եւ ազդանշանային համակարգի օբյեկտները, բարեփոխել ուղեւորափոխադրումների համալիրը, գործարկել նոր էլեկտրագնացքներ՝ ուղեւորների համար ապահովելով անվտանգություն, ժամանակի խնայողություն, հարմարավետություն: Ընկերությունն արդյունավետ է համագործակցել ՀՀ կառավարության, գործարար ոլորտի ներկայացուցիչների հետ: Այս տարի երկաթուղու գլխավոր հաջողությունը Ռ. Սեխլեյանը համարում է ուղեւորափոխադրումների կտրուկ աճի ապահովումը, ինչպես նաեւ բեռնափոխադրումների 12 տոկոսով աճը՝ նախորդ տարվա նույն ժամանակի հետ համեմատած: Այս տարի միայն երկաթուղու մարդատար գնացքներով փոխադրվել է 220.5 հազար ուղեւոր: Դա անցյալ տարվա նույն ժամանակի համեմատ ավելի է 22 տոկոսով: Հայաստանի եւ Վրաստանի երկաթուղայինների ակտիվ համագործակցության արդյունքում այս տարվա հունիսի 14-ից ամեն երկուշաբթի եւ ուրբաթ օրերին երթեւեկում է Երեւան-Բաթումի-Երեւան արագընթաց մարդատար գնացքը: Երեւան-Բաթումի գնացքով յուրաքանչյուր երթին ուղեւորվում է ավելի քան 500 ուղեւոր, իսկ Երեւան-Թբիլիսի գնացքով՝ 100-110 ուղեւոր: Նվաճումն այն բանի արդյունքն է, որ մարդիկ տեսնում են դրական փոփոխությունները. ձեռք են բերվել մարդատար 27 նոր, ժամանակակից, հարմարավետ, առավել անվտանգ վագոններ, որոնք ապահովված են տաք ու սառը ջրով, ցնցուղներով, օդորակիչներով, ինտերնետ կապով:
Ընկերության տնօրինությունը տեսնում է, որ պահանջարկը մեծ է, ուստի նպատակ է դրել հաջորդ տարի գնացքների երթեւեկությունը կազմակերպել ամեն օր: Բեռնափոխադրումներն ավելի լավ կազմակերպելու նպատակով ձեռք են բերվել 200 նոր վագոններ, որոնցից յուրաքանչյուրը 7-8 տոննա ավելի բեռ է այժմ տեղափոխում, քան արվում էր հին վագոններով: Ձեռք են բերվելու եւս 48 նոր վագոններ: Բեռնափոխադրումների ծավալը 6 ամսում կազմել է 1.5 միլիոն տոննա: Կարեւոր համարեց նշել, որ առաջին կիսամյակում ընթացիկ տարվա ներդրումային ծրագրով ՓԲԸ-ի ծախսային ծավալները կազմել են 2.3 մլրդ դրամ, որից 1.6 մլրդն ուղղվել է ենթակառուցվածքների եւ 700 մլն-ը՝ շարժակազմի զարգացմանը: Իսկ անցած 14 տարվա ընթացքում պայմանագրային պայմանավորվածությամբ «ՀԿԵ» ՓԲԸ-ն պլանավորված 123 մլրդ դրամի փոխարեն ներդրումային ծավալը հասցրել է 139.2 մլրդ դրամի, որը պլանայինից ավելի է 13.1 տոկոսով: Այս եւ մյուս հաջողությունները Ռ. Սեխլեյանը պայմանավորում է հանրույթի եւ երկաթուղու ղեկավարության նպատակաուղղված աշխատանքով, երկաթուղայինի պատիվը բարձր պահելու նրանց պատրաստակամությամբ:
Գագիկ ԱՆՏՈՆՅԱՆ
Լոռի
