«Yerevan EXPO» ցուցահանդեսային համալիրում մեկնարկել է «ArmProd EXPO 2022» 20-րդ միջազգային մասնագիտացված ցուցահանդեսը, որին մասնակցում է ոլորտի ավելի քան 80 կազմակերպություն Հայաստանից, Ռուսաստանից, Իրանից, Թուրքմենստանից:
Հայաստանի արդյունաբերողների եւ գործարարների միության նախագահ Արսեն Ղազարյանը, պատասխանելով «Արմենպրեսի» հարցին, ասել է, որ էքսպոյում ներկայացված է տնտեսության հեռանկարային ճյուղերից մեկը` գյուղմթերքի արտադրություն, վերամշակում, վաճառք եւ արտահանում:
«Բավական ծանր աշխարհաքաղաքական, տնտեսական պայմաններում մենք այսօր ունենք կայացած ցուցահանդես: Այս էքսպոյին մասնակից ընկերությունների գրեթե 80 տոկոսը նոր ընկերություններ են Հայաստանի տարբեր մարզերից, Արցախից: Առաջին անգամ Հայաստանի տնտեսական պատմության մեջ Թուրքմենիայից ընկերություն է եկել եւ հայկական շուկայում փորձում է իրացնել իր ապրանքը: Նշանակում է, որ կրկին կապերի իմաստով մենք հեռանկար ունենք»,-նշել է Ղազարյանը՝ հավելելով, որ էքսպոյին մասնակից ընկերությունների՝ մշտական որակն ու քանակը պահելու մղումը նկատվում է:
ՀՀ էկոնոմիկայի նախարարի տեղակալ Արմեն Արզումանյանը ողջունեց էքսպոյի մասնակիցներին, նշեց, որ էքսպոն ունի շատ երկար տարիների պատմություն, հորդորեց բոլորին գալ եւ մասնակցել:
«Հայաստանի շուկան բաց է բոլոր մեր գործընկերների համար: Մեր քիմքը բավականին նրբազգաց է, եւ այն ընկերությունները, որոնք այդպես են համարում, կարող են գալ, մենք ողջունում ենք: Էկոնոմիկայի նախարարությունը մի շարք գործիքակազմեր ունի մեր արտադրողներին նոր շուկաներում տեղավորելու խնդիրը լուծելու համար»,-ասել է փոխնախարարը՝ ուրախությամբ փաստելով, որ բիզնեսը չի կանգնում այն ամենի ֆոնին, ինչ տեղի է ունենում երկրում:
«Մենք պարտավոր ենք տնտեսությունը շենացնել անկախ ամեն ինչից: Տնտեսությունը այն ուժն է, որը ստեղծելու է այն բոլոր ենթակառուցվածքները, որոնք մեզ համար հենասյուն են լինելու»,-շեշտել է Արզումանյանը:
