Սուրբ Մարիամ Աստվածածնի մայր տաճար՝ կաթոլիկ տաճար Լվովում։ Լվովի թեմի մայր տաճարն է, Ուկրաինայի երկու տաճարներից մեկը, որին շնորհված է փոքր բազիլիկի կարգավիճակ։ Ճարտարապետական հուշարձան է։ Լվովի միակ հուշարձանն է, որ զգալիորեն պահպանել է սկզբնական գոթական ոճի կերպարանքը։ 1656 թ. ապրիլի 1-ին այստեղ լեհ թագավոր Յոհան 2-րդ Կազիմիր Վազան լվովյան ուխտն է տվել։ 2001 թ. հունիսի 25-ին տաճար է այցելել Հովհաննես Պողոս 2-րդ պապը։
Լատինական տաճարի շինարարությունը սկսել է ճարտարապետ Պ. Շտեհերը 1360 թ., աշխատանքները շարունակել են Ի. Գրոմը եւ Ա. Ռաբիշը, իսկ ավարտին է հասցրել Գ. Շտեհերը 1479-ին։ 1672 թ., երբ թուրքերը պաշարել են Լվովը, տաճարի պատին կախել են թուրքական թնդանոթային արկեր։
1760-1778 թթ. կատարվել են վերանորոգման աշխատանքներ լվովցի վարպետ Պյոտր Պոլեյովսկու գլխավորությամբ, ինչի արդյունքում զգալիորեն փոխվել է տաճարի արտաքին տեսքը. ավելացել են բարոկկոյին բնորոշ ճարտարապետական ձեւեր, քանդվել են տաճարի շրջակա բազմաթիվ մատուռներ։ 1892-1930 թթ. ընդմիջումներով վերանորոգման աշխատանքներ են կատարվել, որոնց նպատակն է եղել հուշարձանին վերադարձնել նախնական գոթական կերպարանքը։
1910 թ. տաճարի պատին հուշատախտակ են ամրացրել՝ ի նշանավորումն Գրյունվալդի ճակատամարտի 500-ամյակի, որտեղ սլավոնական միացյալ զորքերը պարտության են մատնել Տեւտոնական օրդենին։ 1941 թ. հուշատակտակը ոչնչացրել են հիտլերականները:
