Լոռու մարզի Տաշիր խոշորացված համայնքի Մեծավան բնակավայրում սկսվեց «Երեմյան փրոջեքթս» ընկերությունների խմբի «Երեմյան ֆարմ» անասնաբուծական համալիրի կառուցումը: Օրերս կառույցի հիմքում տեղադրվեց «Ժամանակի պարկուճով» առաջին քարե բլոկը: Ներդրումային այս ծրագրի ընդհանուր արժեքը 31 մլն ԱՄՆ դոլար է: «Երեմյան ֆարմ» անասնապահական այս խոշոր համալիրի ընդհանուր մակերեսը 29 հեկտար է, որը ներառելու է խոշոր եղջերավոր կենդանիների եւ խոզերի համար նախատեսված ֆերմաներ, սպանդանոց երկու ֆերմաների համար, կերախառնուրդի պահեստ, կերային կուլտուրաների աճեցման համար նախատեսված հողատարածք, գյուղատնտեսական մեքենաների կայանատեղի։ Համալիրը համապատասխանեցված է լինելու արտադրության եւ որակի սահմանված միջազգային չափանիշներին՝ հագեցած ավտոմատ համակարգերով ու սարքավորումներով։
Մարզի եւ մասնավորապես խոշորացված համայնքի համար կարեւոր միջոցառմանը մասնակցեցին ՀՀ էկոնոմիկայի նախարար Վահան Քերոբյանը, փոխնախարար Արման Խոջոյանը, «Երեմյան փրոջեքթս» ընկերության գլխավոր տնօրեն Դավիթ Երեմյանը, Եվրասիական զարգացման բանկի (EDB) Հայաստանի ներկայացուցչության տնօրեն Արմեն Մելկիկյանը, մարզպետարանի պաշտոնյաներ:
Խորհրդանշական ուղերձով պարկուճ քարե բլոկում տեղադրվել էր դեռեւս այս տարվա օգոստոսին «Երեմյան փրոջեքթսի» Ջերմուկի ֆերմայում, եւ նույն օրն էլ ստորագրվել էր համագործակցության հուշագիր, ըստ որի՝ Եվրասիական զարգացման բանկը 25 մլն դոլարի ներդրում է կատարելու Լոռու մարզի Տաշիր համայնքում «Երեմյան ֆարմի» կողմից խոշոր տավարաբուծական եւ խոզաբուծական նոր ֆերմա կառուցելու համար: Նման նախաձեռնությունները, ինչ խոսք, խթան են նաեւ մասնավոր հատվածի եւ արտահանման ներուժի զարգացման համար, նպաստելու են տարածաշրջանի զարգացմանը, նոր աշխատատեղերի հիմնմանը:
Ինչպես նշեց Դավիթ Երեմյանը, ծրագրի նպատակը ՀՀ-ում պարենային անվտանգության, գյուղատնտեսության եւ տնտեսական զարգացման ապահովումն է: «Սերմից՝ սեղան» ամբողջապես փակ ցիկլով գործելու մեր ռազմավարությունը թույլ է տալիս ապահովել կաթնարտադրության յուրաքանչյուր փուլի վերահսկողությունը, ինչը մեծապես կնպաստի հասարակությանը որակյալ կաթնամթերք մատակարարելուն եւ պարենային անվտանգության ապահովման այսօրվա մարտահրավերների հաղթահարմանը»,- ասաց նա ու հավելեց, որ անասնապահական այս համալիրը լինելու է Հայաստանում իր տեսակի մեջ առաջինն ու եզակին։
Գագիկ ԱՆՏՈՆՅԱՆ
Լոռի
