Մի շարք երկրների շարքում վերջին իրադարձություններին պատշաճ գնահատական տվեց նաեւ Իսպանիան` երկրի հայ համայնքի ակտիվ գործունեության շնորհիվ։ Կոնգրեսի վերջին երկու հայտարարությունները (հոկտեմբերի 6-ի եւ դեկտեմբերի 22-ի)` ի աջակցություն Հայաստանի եւ ընդդեմ Ադրբեջանի ագրեսիվ քաղաքականության, պատասխանն էին իսպանահայ համայնքի դիմումին, որի տակ ստորագրել էին երկրի բոլոր հայկական կազմակերպությունները։
Կոնգրեսի ինստիտուցիոնալ հայտարարություններին հետեւեց Վալենսիայի մարզի Միսլատայի քաղաքապետարանի դեկտեմբերի 23-ի միաձայն հայտարարությունը, որում դատապարտվում է ինչպես Ադրբեջանի ագրեսիան, այնպես էլ այդ երկրի ռազմաքաղաքական ղեկավարության կողմից հրահրված Արցախի շրջափակումը։ Հայտարարությսն մեջ նշված է Մարդու իրավունքների կոպտագույն խախտումների, Բերձորի (Լաչին) միջանցքի փակման հետեւանքով հասունացող հումանիտար աղետի եւ դրանից բխող վտանգների մասին։ Քաղաքապետարանը, իր հերթին, կոչ արեց միջազգային կառույցներին` միջոցներ ձեռնարկել իրավիճակի խաղաղ հանգուցալուծման եւ հումանիտար աղետից խուսափելու համար։
Ինստիտուցիոնալ հայտարարությունը կարդացին քաղխորհրդի բոլոր քաղաքական ուժերի խոսնակները` Մարիա Լուիսա Մարտինես Մորան (Սոցիալիստական կուսակցություն-PSOE), Խայմե Բրոնչուդը (Ժողովրդական կուսակցություն-PP), Ալվարո Գալանը (ՎՈՔՍ-VOX), Խոսե Մարիա Գոնսալեսը (Քաղաքացիական կուսակցություն-Ciudadanos) եւ Խավիեր Խիլը (Կոմպրոմիս-Compromis)։
Նշենք, որ վերջին իրադարձություններին առաջին իսկ ժամերից արձագանքել եւ հայ ժողովրդին իր աջակցությունն է հայտնել «Կոմպրոմիս» կուսակցությունը, որն ի սկզբանե ցանկանում էր նախագիծ ներկայացնել քաղխորհրդին, որտեղ Ադրբեջանը համարվում է որպես ագրեսոր երկիր, իսկ Թուրքիան` այդ երկրի ռազմական եւ ահաբեկչական գործողությունները հովանավորող երկիր։ Սակայն իշխող Սոցիալիստական կուսակցությունը, որը քաղխորհրդում մեծամասնություն է կազմում, նախապես հայտարարել էր, որ դեմ է քվեարկելու նախագծին, որն էլ, իհարկե, պիտի նշանակեր գործընթացի տապալում։ Նշենք նաեւ, որ ներկայացվելիք նախագծին բոլոր ընդդիմադիր կուսակցությունները պատրաստ էին կողմ քվեարկել։
Այդ իսկ պատճառով եւ, իհարկե, վերոնշյալը հիմք ընդունելով, միմյանց հետ անընդհատ կապի մեջ գտնվող ընդդիմության եւ հայկական կազմակերպության ներկայացուցիչները որոշում են կայացնում` ընդունել իշխանության առաջարկած բանաձեւը, որը նույնպես հասցեական է եւ, որ ամենակարեւորն է ընդունվեց միաձայն։
Հայտարարության ավարտին քաղաքապետ Կառլոս Ֆեռնանդես Բիելսան կարեւորեց տարածաշրջանում խաղաղության ձեռքբերումը եւ, իհարկե, Միսլատայի աջակցությունը հայ ժողովրդին եւ, մասնավորապես, «Արարատ» հայկական միությանը, որի հետ համագործակցությունն արդեն իսկ երկար տարիների է։
Մի կողմ դնելով Իսպանիայի կենտրոնական իշխանության ու տեղական ինքնակառավարման մարմինների դիրքորոշումները հայ ժողովրդի եւ, ընդհանրապես, հայկական գործոնի վերաբերյալ (սա առանձին քննարկման նյութ է, որի մասին դեռ կխոսենք)` պետք է նշել, որ երկրի հայ համայնքի կատարած աշխատանքն արժանի է բարձր գնահատանքի եւ որ դեռ բազում մարտահրավերներ կան, որոնք ծառանում են համայնքի առջեւ` պահանջելով լինել ավելի վճռական ու արդյունավետ։
Վերջում նշենք, որ նիստին ներկա էին «Արարատ» հայկական միության անդամները, ովքեր քաղխորհրդի խոսնակների հետ միասին ծածանեցին հայկական եռագույնը Միսլատայի քաղաքապետարանում։
Արթուր ՂՈՒԿԱՍՅԱՆ
Վալենսիա, հատուկ «ՀՀ»-ի համար
