Իսրայելը լուրջ էսկալացիայի բախվեց մի շարք ճակատներում, երբ ոստիկանության ուժերով կոշտ միջոցներ ձեռնարկեց Ալ Աքսա մզկիթում բարիկադավորված պաղեստինցիների դեմ: Հարավային Լիբանանից իսրայելական դիրքերի ուղղությամբ տասնյակ հրթիռների արձակմանը հաջորդեց Սիրիայի հարվածը: Այնուհետեւ ամերիկյան կողմն իր մերձավորարեւելյան դաշնակցին, որի հետ հարաբերությունները վերջին շրջանում այնքան էլ հարթ չեն, զգուշացրել է ծովից սպառնալիքի գոյության մասին՝ Իսլամական հեղափոխության պահապանների կորպուսի կողմից: Ըստ Վաշինգտոնի գնահատականների՝ Թեհրանը մտածում է իսրայելական առեւտրային նավերի դեմ դիվերսիաներ կազմակերպելու մասին:
Հասկանալի է՝ Սիրիան, որի դեմ Թել Ավիվը վերջին տարիներին հարձակվում էր գրեթե մշտապես, միացել է Իսրայելի վրա գործադրվող ռազմական ճնշմանը՝ հանգստյան օրերին ձեռնարկելով մերձսահմանային հարձակման մի շարք փորձեր: Հարեւանների միջեւ հարվածների փոխանակումը հանգեցրել է նրան, որ լուրջ վնաս է հասցվել Սիրիայի արաբական բանակի 4-րդ դիվիզիային, ռադիոլոկացիոն համակարգերին եւ հրետանուն: Իսրայելի պաշտպանության բանակում հայտարարել են, որ Դամասկոսի կենտրոնական կառավարությունը պատասխանատու է իր տարածքում տեղի ունեցող բոլոր գործողությունների համար:
Էսկալացիան հաջորդեց Հարավային Լիբանանի շուրջ ռազմական բռնկմանը, որտեղից օրերս մի քանի տասնյակ հրթիռներ են արձակվել հրեական պետության ուղղությամբ: Շիական «Հեզբոլլահ» խմբավորումը իրեն հեռու է պահում հարձակումներից: Փոխարենը պատասխանատվությունն ընկել է պաղեստինցի զինյալների վրա, որոնք ազատորեն օգտագործում են լիբանանյան տարածքում առկա ռազմական ենթակառուցվածքները:
«Զինվորականների իրականացրած նախնական հետազոտությունը ցույց է տվել, որ Իսրայելի տարածքի վրա հրթիռներ արձակած երկիրը Լիբանանը չէ»,- ապրիլի 9-ին հայտարարել է Լիբանանի վարչապետ Նաջիբ Միկատին: Նա շեշտել է, որ, ըստ Բեյրութի գնահատականների, «դա պաղեստինյան տարածքներում ու Գազայի հատվածում իսրայելական ագրեսիայի արձագանքն է»: «Մենք մերժում ենք Լիբանանի կողմից ցանկացած ռազմական էսկալացիայի հրահրումը եւ այնպիսի գործողությունների իրականացումը, որոնք ապակայունացնում են մթնոլորտը,- նշել է կառավարության ղեկավարը:- Միեւնույն ժամանակ Լիբանանի դեմ շարունակվող իսրայելական ագրեսիան եւ նրա ինքնիշխանության խախտումն անընդունելի են, եւ մենք այդ առիթով նոր բողոք ենք հղել ՄԱԿ-ի գլխավոր քարտուղարին ու Անվտանգության խորհրդին»:
Հարավային Լիբանանի շուրջ լարվածության բռնկումը տեղի ունեցավ այն պահին, երբ պաղեստինյան ՀԱՄԱՍ խմբավորման պատվիրակությունն Իսմայիլ Խանիայի գլխավորությամբ ժամանեց Բեյրութ՝ «Հեզբոլլահի» հետ բանակցություններ վարելու համար: Այս խմբավորումներին հարազատ է դարձնում «դիմակայության առանցքը»՝ իրանամետ ուժերի ոչ պաշտոնական դաշինքը: 2021 թ. դրանց ղեկավարները համատեղ օպերատիվ շտաբ են ստեղծել Գազայի հատվածում սպառնալիքներին արձագանքելու համար: Հավանական է՝ հենց նրա աշխատանքն է ՀԱՄԱՍ-ին հնարավորություն տվել այս օրերին օգտագործել լիբանանյան տարածքը անդրսահմանային հարվածների համար:
«Իսրայելի օկուպացիոն կառավարությունը պատասխանատվություն է կրում Ալ Աքսայի ու հավատացյալների վրա բարբարոսական հարձակման համար,-հայտարարել է Բեյրութում գտնվող Խանիան:- Պաղեստինյան խմբավորումները ձեռքները ծալած չեն նստում: Միասնությունն ու դիմադրությունը ճանապարհ են հարթում դեպի հաղթանակ ու կհանգեցնեն սիոնիստական նախագծի պարտությանը»:
Տաճարի լեռան վրա ստեղծված իրավիճակը շարունակում է գրավել Իսրայելի անվտանգության ապարատի ուշադրությունը: Ըստ Թել Ավիվի՝ պաղեստինցի ակտիվիստները փորձում են անկարգություններ կազմակերպել Ալ Աքսայի տարածքում: Ապրիլի 9-ին պոտենցիալ կոնֆլիկտային իրավիճակի պատճառ է դարձել այն հանգամանքը, որ կրոնական միջոցառումները կազմակերպվել են նույն ժամանակ: Մի կողմից՝ հարյուրավոր մահմեդական ուխտավորներ շտապել են հայտնի մզկիթ՝ ի պատիվ Ռամադան ամսվա, մյուս կողմից՝ Զատկի տոնի օրերին հրեա հավատացյալներն այցելել են Տաճարի լեռ: Միաժամանակ կրակի վրա յուղ է լցրել Իսրայելի ազգային անվտանգության նախարար Իտամար Բեն-Գվիրի պահանջը՝ հրեաներին թույլատրելու անարգել վերելք կատարել մահմեդականների հետ միաժամանակ:
Երուսաղեմի սրբավայրերի շուրջ ստեղծված իրավիճակը, ըստ փորձագիտական շրջանակների, Իրանին առիթ է տվել ստուգելու, թե վարչապետ Բենիամին Նաթանյահուի կառավարության հակասական նախաձեռնությունների հետեւանքով առաջացած քաղաքական անկայունությունն ինչպես է ազդել Իսրայելի անվտանգության վրա:
«The New York Times»-ը մեջբերել է ամերիկյան պաշտոնյաներին, ովքեր կարծում են, որ այս շաբաթներին Իսլամական հեղափոխության պահապանների կորպուսը նույնիսկ ծրագրել է դիվերսիա կատարել Իսրայելին պատկանող քաղաքացիական նավերում Պարսից ծոցի շրջանում: Դա, ըստ գնահատականների, պետք է լիներ Սիրիայում Իսրայելի պաշտպանության բանակի հարձակումների ուժեղացման պատասխանը, հարձակումներ, որոնց հետեւանքով զոհվել են երկու բարձրաստիճան իրանցի սպաներ:
Պենտագոնը հաղորդել է, որ Մերձավոր Արեւելք է ուղարկել ստորջրյա նավ՝ զինված տասնյակ թեւավոր հրթիռներով: ԱՄՆ-ի կենտրոնական հրամանատարության ներկայացուցիչ Թիմ Հոկինսը հայտարարել է, որ սուզանավը կմիանա ԱՄՆ ռազմածովային ուժերի հինգերորդ նավատորմին Կարմիր ծովում՝ «տարածաշրջանային ծովային անվտանգությունն ու կայունությունն ապահովելու համար»: «Վերջին իրադարձությունները, այդ թվում՝ հարվածները Սիրիայում եւ Իրանի սպառնալիքը՝ ընդդեմ իսրայելական առեւտրային նավերի, մեզ դրդեցին հիշեցնել տարածաշրջանային նավաստիներին զգոնությունը չկորցնելու մասին»,-շեշտել է Հոկինսը: Ստորջրյա նավի գտնվելու վայրի մասին հայտարարությունը, ըստ «The New York Times»-ի գնահատականների, շատ անսովոր է, քանի որ ամերիկյան կողմը գերադասում է չբացահայտել իր սուզանավերի ներկայությունը՝ ի տարբերություն նավատորմերի ու ինքնաթիռների, որոնց հնարավոր է հետեւել:
Իսրայելի համար իրավիճակը բարդացնում է այն հանգամանքը, որ հակամարտությունն սկսել է բազմակողմ բնույթ կրել: Դա խոստովանել է Նաթանյահուն Գազայի հատվածի անմիջական հարեւանությամբ ապրող համայնքների ղեկավարների հետ հեռախոսային զրույցում: Դրան նախորդել էր նրա զրույցը նախարարների հետ: Նաթանյահուն նշել էր, որ հրեական պետությունը կցանկանար խուսափել լարվածության բռնկումից միաժամանակ մի շարք ճակատներում: Բայց ամենագլխավորը, ըստ նրա, այն է, որ իշխանությունները պետք է կենտրոնանան եւ «կառավարության ներսում խուսափեն ավելորդ վեճերից»:
