Միացյալ Նահանգները նոր վարչակազմի օրոք որդեգրել է ավելի ակտիվ արտաքին քաղաքականություն։ ԱՄՆ պաշտպանության նախարարի քաղաքական հարցերով տեղակալ Քոլին Քոլը նախօրեին Վաշինգտոնի Կարնեգիի հիմնադրամի առցանց խորհրդաժողովի ժամանակ հայտարարել էր, որ հաջորդ տարվա սկզբին պատրաստ կլինի Միացյալ Նահանգների ազգային պաշտպանության ռազմավարության լրամշակված տարբերակը։
Նախորդ փաստաթուղթը կազմվել էր ԱՄՆ-ի նախորդ վարչակազմի կողմից՝ նախագահ Դոնալդ Թրամփի գլխավորությամբ, եւ հրապարակվել 2018 թ. հունվարի 19-ին: Միացյալ Նահանգների այդ ժամանակվա պաշտպանության նախարար Ջեյմս Մեթիսը նշել էր, որ իրենց ներկայացրած ռազմավարությունը կենտրոնացած է Ռուսաստանի եւ Չինաստանի հետ երկարաժամկետ ռազմավարական մրցակցության վրա:
Ներկայումս նույնպես ամերիկյան դեմոկրատ վարչակազմը Ռուսաստանի եւ Չինաստանի հետ դիմակայությունը համարում է առանցքային։ Ի դեպ, այդ մոտեցումներն է որդեգրել նաեւ ՆԱՏՕ-ն։ Քոլին Քոլը, անդրադառնալով Չինաստանին, ընդգծել է, որ վերջինս, հավանաբար, սկսում է հեռանալ «նվազագույն զսպման» իր միջուկային դոկտրինից՝ հակվելով տարածաշրջանային հակամարտությունում միջուկային զենք օգտագործելու հնարավորության կողմը: Նա կիսել է ամերիկացի այլ պաշտոնյաների կարծիքը, նշելով, որ Պեկինն ունակ է կրկնապատկել իր զինանոցը տասնամյակի վերջին, եւ որ Չինաստանը մշակում է նոր տեսակի միջուկային զենք: Օրինակ, ԱՄՆ պաշտպանության հետախուզության վարչության (DIA) տնօրեն, ԱՄՆ բանակի գեներալ-լեյտենանտ Սքոթ Բերիերը այս տարվա ապրիլին հայտարարել էր, որ հաջորդ տասնամյակի ընթացքում իրենց միջուկային զինանոցների չափերը զգալիորեն մեծացնելու են Ռուսաստանը եւ Չինաստանը։
Ինչ վերաբերում է Ռուսաստանին, ապա Քոլին Քոլի խոսքով, «Ռուսաստանը շարունակում է նոր միջուկային զենքի մշակումը» եւ «ավելացնում է ոչ ռազմավարական միջուկային զենքի զինանոցը»: «Բացի այդ, մենք տեսնում ենք, որ միջուկային զենքի դերը ռուսական դոկտրինայում բավականին բարձրացել է: Այն իմաստով, որ Ռուսաստանը, իմ կարծիքով, շատ ավելի մեծ նպատակ է տեսնում միջուկային զենքի մեջ, քան ցանկացած այլ երկիր»,- ասել է նա, փոխանցում է ՏԱՍՍ-ը: Անդրադառնալով Պուտին-Բայդեն ժնեւյան հանդիպմանը, ամերիկացի պաշտոնյան նշել է, որ ձեռք բերված պայմանավորվածությունների շրջանակներում կքննարկվեն ռազմավարական կայունության վրա ազդող բոլոր ռազմական տեխնոլոգիաները: Երկխոսության առանցքում դրվելու է միջուկային բաղադրիչը։ Արդյունքում, նման հայտարարությունները թույլ կտան Միացյալ Նահանգներին ձեւակերպելու նոր մարտահրավերները եւ հիմնավորելու մոտեցումների եւ քաղաքականության հետագա «կոշտացումները»։
Միացյալ Նահանգներին անհանգստացնում են նաեւ Լիբիայում Ռուսաստանի ազդեցության աշխարհաքաղաքական հետեւանքները, քանի որ գտնվում է հյուսիսատլանտյան դաշինքի հարավային շրջանում։ Այդ դիրքը հնարավորություն է ընձեռում ազդեցության տակ պահել Սահարայից հարավ գտնվող աֆրիկյան երկրները։ Լինելով նավթի եւ գազի խոշոր մատակարար, Լիբիան շարունակում է գործոն մնալ համաշխարհային տնտեսության մեջ, սակայն քաղաքական անկայունությունը թույլ է տալիս խոշոր խաղացողներին ազդեցության լծակներ ունենալ այդտեղ։ Ռուսաստանը չի պատրաստվում թուլացնել դիրքերը Լիբիայում։ Ավելի վաղ ՌԴ ԱԳՆ հայտարարել էր, որ Լիբիայի «արեւելքի եւ արեւմուտքի դիմակայության հենց սկզբից Մոսկվան ակտիվ մասնակցություն է ունեցել դրա լուծման միջազգային ջանքերին եւ դա անում է տարբեր միջազգային հարթակներում»: Ռուսաստանի ԱԳ նախարար Սերգեյ Լավրովն այդ ժամանակ շեշտել էր, որ Ռուսաստանն ամեն ինչ անելու է, որպեսզի նպաստի 2021 թ. Լիբիայում այնպիսի ընտրությունների անցկացմանը, որը կհամապատասխանի երկրի բոլոր քաղաքական ուժերին:
Մյուս կարեւոր ուղղությունը Մերձավոր Արեւելքն է, որտեղ նույնպես կարեւոր նշանակություն ունի միջուկային բաղադրիչը։ Նախօրեին հանդիպել են ԱՄՆ նախագահի ազգային անվտանգության հարցերով օգնական Ջեյք Սալիվանը եւ Իսրայելի պաշտպանության ուժերի շտաբի պետ Ավիվ Կոչավին: Սպիտակ տան հրապարակած հաղորդագրության համաձայն, Ջո Բայդենը պատրաստ է աջակցել Իսրայելի անվտանգությանը եւ հավատարիմ է երկու երկրների միջեւ պաշտպանական գործընկերության հետագա ամրապնդմանը: Սալիվանը վերահաստատել է ԱՄՆ նախագահի մտադրությունը՝ թույլ չտալու Իրանին միջուկային զենք ձեռք բերել: Իրանի զսպման խնդիրը դնելով առավելապես Իսրայելի վրա, դրանով Միացյալ Նահանգները հնարավորություն է ստանում կենտրոնանալ Ռուսաստանի եւ Չինաստանի վրա։
