Վրաստանի նախագահ Սալոմե Զուրաբիշվիլին եւ ընդդիմության ներկայացուցիչները բացասաբար են ընդունել Ռուսաստանի որոշումը՝ մայիսի 15-ից, համաձայն ՌԴ նախագահ Վլադիմիր Պուտինի հրամանագրի, չեղարկելու վիզային ռեժիմը եւ վերսկսելու ուղիղ ավիահաղորդակցությունը երկրների միջեւ: Այս մասին գրում է «Civil.ge»-ն՝ շեշտելով, որ Վրաստանի քաղաքացիներն առանց վիզայի ՌԴ-ում կարող են մնալ 90 օր: Իսկ իշխող կուսակցության ներկայացուցիչներն ընդդիմության դիրքորոշումն անվանել են փորձ՝ պատժամիջոցներ կիրառելու իրենց համերկրացիների դեմ:
Բայց պատժամիջոցներից չեն խուսափի
Վրաստանի արտաքին գործերի նախարար Իլյա Դարչիաշվիլիի գնահատականի համաձայն՝ եթե դատենք հումանիտար տեսանկյունից, վիզային ռեժիմը չեղարկելու եւ թռիչքները վերականգնելու Մոսկվայի որոշումն արժանի է «ցանկացած պատասխանատու իշխանության ողջույնին»: Նրա խոսքով՝ ՌԴ-ում ավելի քան մեկ միլիոն Վրաստանի քաղաքացի է ապրում, ովքեր շատ սերտ կապեր ունեն հայրենիքում ապրող մարդկանց, հարազատների հետ: Մոսկվայի այդ որոշումը կթեթեւացնի նրանց կենցաղային հոգսերը եւ հնարավորություն կտա շփում ունենալ, ճանապարհորդել եւ հարաբերություններ պահպանել միմյանց հետ: «Դա դիտարկվում է այդ համատեքստում եւ այդ հեռանկարում»,- ավելացրել է նա:
Իլյա Դարչիաշվիլին բացատրել է նաեւ, որ «Ռուսաստանի Դաշնության կողմից ընդունված որոշումն ինքնուրույն որոշում է»: «Դա նրանց ինքնիշխան որոշումն է, եւ յուրաքանչյուր երկիր վճռում է՝ որ երկրի քաղաքացիների համար առանց վիզայի ռեժիմ հաստատել, որ երկրների համար՝ չեղարկել: Մենք գործ ունենք հենց այդ իրադարձության հետ»,- շեշտել է նա:
Նախարարը նաեւ շեշտել է, որ «Վրաստանը հավատարիմ է մնում միջազգային գործընկերներին եւ իր գործողությունները սերտորեն կհամակարգի նրանց հետ: Ինչ վերաբերում է չվերթներին, Վրաստանը հավատարիմ է մնում քաղաքականությանը՝ կապված միջազգային պատժամիջոցների հետ, եւ միջազգային հանրության մոտեցումներին՝ կապված այդ հարցերի հետ»: «Վրաստանն ակտիվորեն համագործակցում է միջազգային գործընկերների հետ, որպեսզի որեւէ պատժամիջոցից խուսափում տեղի չունենա, եւ այդ համատեքստում Վրաստանը միանշանակ սերտ կհամագործակցի միջազգային գործընկերների հետ»,- ավելացրել է նա:
Հարցին, թե Մոսկվայի այդ որոշումն արդյոք կազդի՞ Վրաստանի՝ Եվրամիությանն անդամակցության թեկնածուի կարգավիճակ ստանալու վրա, Դարչիաշվիլին պատասխանել է. «Մենք չենք կարող այդ բոլոր հարցերը կապել Վրաստանի կողմից ԵՄ-ի 12 պահանջների կատարման հետ»: Նախարարը նաեւ անհասկանալի է համարում, թե ինչու հարցեր չեն առաջանում Ռուսաստանի հետ Մոլդովայի ավիահաղորդակցության հարցում, որն արդեն թեկնածուի կարգավիճակ ունի, եւ «ինչու դա կարելի է կասկածի տակ դնել Վրաստանի նկատմամբ»:
«Դա անընդունելի է: Վրաստանը հստակ, նպատակաուղղված ու հետեւողական կերպով իրականացնում է եվրոպական ինտեգրման իր քաղաքականությունը: Մենք գիտենք, որ շատ կոնկրետ քայլեր են ձեռնարկվել 12 կետերի կատարման ուղղությամբ: Այդ ուղղությամբ ջանքերը կշարունակվեն նաեւ հետագայում, որովհետեւ մեզ համար եվրոպական ինտեգրումն արտաքին քաղաքական հիմնական առաջնահերթություններից մեկն է»,- ասել է արտգործնախարարը:
«Վրացական հանրությանը նետված մարտահրավեր»
«Ռուսական հերթական սադրանքը»,- թվիթերյան իր էջում այսպես է արձագանքել Վրաստանի նախագահ Սալոմե Զուրաբիշվիլին Մոսկվայի որոշմանը՝ չեղարկելու վիզային ռեժիմը եւ վերականգնելու ուղիղ ավիահաղորդակցությունը: «Վրաստանի հետ ուղիղ ավիահաղորդակցության վերականգնումն ու վիզային ռեժիմի չեղարկումն անընդունելի են, քանի դեռ Ռուսաստանը շարունակում է հատուկ գործողությունն Ուկրաինայում եւ գտնվում է մեր տարածքում»,- շեշտել է Վրաստանի նախագահը:
Իր դիրքորոշումն արտահայտելուց հետո Վրաստանի նախագահը բրիֆինգ է հրավիրել, որում եւս մեկ անգամ շեշտել է, որ Ռուսաստանի որոշումը սադրանք է եւ նպատակ ունի «մարտահրավեր նետել մեր հանրությանը»: «Ես դա անընդունելի, անտեղի ու ժամանակավրեպ եմ համարում, մեզ ոչ վիզային ռեժիմի չեղարկում է պետք, ոչ էլ չվերթների վերականգնում»,- շեշտել է Զուրաբիշվիլին:
Նախագահը կարծում է, որ Մոսկվայի այդ քայլը երկրի իշխանությունների առջեւ «շատ մեծ մարտահրավեր» է դնում, որովհետեւ «անկասկած, լարվածություն կառաջացնի կուսակցությունների հարաբերություններում»: «Բայց ես վստահ եմ, որ դա ոչ մի լարվածություն չի սադրի հասարակության մեջ, այլ շատ մեծ արձագանքի պատճառ կդառնա: Հանրությունը հիանալի հասկանում է, որ Ռուսաստանը նման քայլեր է կատարում՝ ելնելով իր հետաքրքրություններից»,- շեշտել է նա:
Այնուհետեւ նախագահը նշել է, որ, «ցավոք, իշխանությունը մինչեւ հիմա չի հասկացել եւ չի մտածել մեր անցած պատմության ու բոլոր օրինակների մասին, որ Ռուսաստանն իշխանությունների զիջումներին պատասխանում է ոչ թե զիջումներով, այլ նրանով, որ ավելի շատ է բարդացնում իրավիճակը»:
«Դա նրա պահվածքի մշտական մեթոդն է, եւ իշխանությունը պետք է մտածի այդ մասին: Ես իշխանություններին կոչ եմ անում, որպեսզի հստակ արտահայտեն իրենց դիրքորոշումը: Ժամանակն է, որ Անվտանգության խորհուրդը հավաքվի եւ քննարկի ՌԴ քաղաքացիների համար եռամսյա վիզայի ներդրման մասին, որը մեզ պետք է՝ գոնե հաշվի առնելով ներքին մարտահրավերները»,- ասել է նա՝ ավելացնելով, որ պետության կողմից վերահսկողություն է պետք այն ռուսների նկատմամբ, որոնք ժամանում ու մնում են երկրում:
«Անհրաժեշտ է ինչ-ինչ միջոցներ ձեռնարկել՝ այդ ամենը նորմալ, քաղաքակիրթ շրջանակների մեջ դնելու համար: Մենք շատ հանդուրժող պետություն ենք, բայց կան բաներ, որոնք չի կարելի թույլատրել»,- շեշտել է նախագահը՝ ավելացնելով, որ «դա մեր հանրության պաշտպանությունն է եւ այսօրվա սադրանքի ճիշտ պատասխանը»:
«Մեզ համար Ռուսաստանից նվերներ հարկավոր չեն, իբր, զիջում է: Ստեղծված իրավիճակում մենք նույն կողմում ենք, ինչ մեր եվրոպական ընկերները, եւ դա Վրաստանի արժանապատվության պաշտպանությունն է, որպեսզի մենք, ի տարբերություն բոլորի, ինչ-ինչ նոր հարաբերություններ չհաստատենք Ռուսաստանի հետ, ինչը կբարդացնի ամեն ինչ մեզ համար»,- նշել է Սալոմե Զուրաբիշվիլին:
Վրաստանի նախագահը եւս մեկ անգամ իշխանություններին կոչ է արել լսել ոչ թե «Ժողովրդի ուժը» շարժմանը, այլ «ժողովրդի ձայնը»: Նա շեշտել է, որ հարկ է իմանալ, թե որտեղ է գտնվում այդ երկիրը, որի տարածքներն օկուպացված են, եւ որը համերաշք է «մեր ընկեր Ուկրաինայի» հետ: «Դա մեր դիրքորոշումն է, եւ մենք մինչեւ վերջ պետք է հավատարիմ մնանք այդ դիրքորոշմանը: Դա հանրության պահանջն է: Եթե հակառակը կատարվի, իսկ ես շատ մեծ հույս ունեմ, որ նման բան չի լինի, ապա հանրությունը դրան իր պատասխանը կունենա»,- նշել է Սալոմե Զուրաբիշվիլին:
