Պատմության հետագծով

-1932 թ. մայիսի 23-ին ծնվել է Գեւորգ Աճեմյանը՝ գրող, հրապարակախոս, ASALA-ի հիմնադիր: Ծնվել է Սիրիայում, Եղեռնից մազապուրծ եղած սասունցիների ընտանիքում։ Սովորել է Հալեպի Հայկազյան եւ Կյուլպենկյան վարժարաններում։ 1948 թ. ավարտել է «Ալեպպո» քոլեջը, 1958-ին՝ Բեյրութի ամերիկյան համալսարանի փիլիսոփայության բաժինը։ Զբաղվել է մանկավարժական աշխատանքով, հայերենի եւ անգլերենի ուսուցիչ է աշխատել հայկական դպրոցներում, միաժամանակ լիբանանահայ մամուլում տպագրել է արձակ էջեր, տեսական-քննադատական հոդվածներ։ Ստեղծագործության հիմնական թեման սփյուռքահայության պայքարն է հանուն ազգապահպանման։ Միակ ելքը տեսել է հայրենադարձության մեջ։ Եղել է «Սփյուռք» հանդեսի խմբագիրը։ Տեսական-քննադատական եւ գրական վերլուծական ուսումնասիրություններն ամփոփել է «Տեսական քննադատական փորձեր» (1962-1982) ժողովածուում։

-1938 թ. մայիսի 23-ին ծնվել է Վահրիճ Բախչանյանը՝ նկարիչ, գրականագետ:

-1947 թ. մայիսի 23-ին ծնվել է Արամ Սաթյանը՝ հայ կոմպոզիտոր, երգահան։ ՀՀ արվեստի վաստակավոր գործիչ (2011)։ Հայաստանի կոմպոզիտորների միության նախագահ։

-1951 թ. մայիսի 23-ին ծնվել է Անատոլի Կարպովը՝ շախմատի աշխարհի 12-րդ չեմպիոն (1975-1985), միջազգային գրոսմայստեր (1970), ԽՍՀՄ սպորտի վաստակավոր վարպետ (1974), աշխարհի եռակի չեմպիոն (1975, 1978, 1981), ՖԻԴԵ-ի վարկածով աշխարհի եռակի չեմպիոն (1993, 1996, 1998), ԽՍՀՄ հավաքականի կազմում աշխարհի թիմային առաջնությունների կրկնակի (1985 եւ 1989), օլիմպիադաների վեցակի (1972, 1974, 1980, 1982, 1986, 1988) հաղթող, ԽՍՀՄ եռակի չեմպիոն (1976, 1983, 1988), ՌԽՖՍՀ չեմպիոն (1970)։ Ստացել է ինը շախմատային «Օսկարներ» (1973, 1974, 1975, 1976, 1977, 1979, 1980, 1981, 1984)։

-1960 թ. մայիսի 23-ին մահացել է Սողոմոն Թեհլիրյանը՝ հայ ազգային-ազատագրական շարժման գործիչ, հայ վրիժառու, Հայոց ցեղասպանության վերապրող։ Գնդակահարել է երիտթուրքերի ներքին գործերի նախարար եւ Հայոց ցեղասպանության գլխավոր կազմակերպիչ Թալեաթ փաշային։ ՀՅԴ անդամ։