«Եւ այն ժամանակ կերեւի մարդի Որդու նշանը երկնքումը, եւ այն ժամանակ կոծ կանեն երկրի բոլոր ազգերը, եւ կտեսնեն մարդի Որդին գալիս երկնքի ամպերի վերայ զօրութիւնով եւ շատ փառքով»
«Եւ տեսայ երկինքը բացուած, եւ ահա մի սպիտակ ձի եւ նա որ նորա վերայ նստած էր, կոչվում էր Հաւատարիմ եւ ճշմարիտ, եւ արդարութիւնով է դատաստան անում եւ պատերազմում»։ Հայտնություն 19։11
Մենք Հայտնության գրքում արդեն հանդիպել ենք ձիավորի, ով առաջինն էր հաղթանակած գալիս չորս ձիավորներից. «Եւ տեսայ երբոր Գառը այն կնիքներից մէկը բացաւ, եւ այն չորս կենդանիներից մէկիցը լսեցի որ որոտմունքի ձայնի պէս ասում էր. Եկ եւ տես։ Եւ տեսայ, եւ ահա մի սպիտակ ձի, եւ նորա վերայ նստողը մի աղեղ ուներ. եւ մի պսակ տրուեցաւ նորան, եւ նա դուրս եկաւ յաղթելով եւ յաղթելու համար»։ Հայտնություն 6։1-2
Երկու կարծիք կա, թե ձիավորը կամ եկեղեցին է, որ Աստծո խոսքի նետերն ուղարկում է աշխարհի բոլոր կողմերը, կամ ինքը՝ Փրկիչը, ով հաղթելու համար էր եկել եւ արդեն իսկ հաղթանակած է։
Երկնքից որոտմունքի ձայնով Փրկչի գալուստը վկայել են նաեւ ավետարանիչները. «Եւ այն ժամանակ կերեւի մարդի Որդու նշանը երկնքումը, եւ այն ժամանակ կոծ կանեն երկրի բոլոր ազգերը, եւ կտեսնեն մարդի Որդին գալիս երկնքի ամպերի վերայ զօրութիւնով եւ շատ փառքով»։ Մատթեոս 24։30
«Որովհետեւ մարդկանց սրտերը կնուաղին վախից եւ այն բաների սպասելուցն, որ բոլոր աշխարհքի վերայ պիտի գան. որովհետեւ երկնքի զօրութիւնները կշարժուին։ Եւ այն ժամանակ կտեսնեն մարդի Որդին ամպերի վերայ եկած զօրութեամբ եւ մեծ փառքով»։ Ղուկաս 21։26-27
Գործք Առաքելոց գրքի սկզբում նկարագրվում է Հիսուսի համբարձվելը, խոստմունքով, որ ինչպես երկինք բարձրացավ, այնպես էլ վերադառնալու է. «Բայց դուք զօրութիւն կառնէք՝ երբ որ Հոգին ձեզ վերայ կգայ, եւ իմ վկաները կլինիք Երուսաղէմումը եւ բոլոր Հրէաստանի եւ Սամարիայի մէջ մինչեւ երկրի ծայրերը։ Եւ երբոր այս ասեց, նորանք նայելիս՝ վերացաւ. եւ մի ամպ վեր առաւ նորան նորանց աչքերիցը։ Եւ դեռ որ նորանք աչքերը ուղղած մտիկ էին տալիս դէպի երկինքը նորա գնալին, ահա երկու մարդիկ երեւեցան նորանց սպիտակ հանդերձներով, Որ եւ ասեցին. Ով Գալիլեացի մարդիկ, ի՞նչ էք կանգնել եւ մտիկ էք անում դէպի երկինքը. այս Յիսուսը, որ ձեզանից վերացաւ երկինքը, այսպէս կգայ ինչպէս նորան տեսաք երկինքը գնալիս»։ Գործք Առաքելոց 1։7-11
Շատ դիպուկ է բնութագրվում Հիսուսի գալուստը Մատթեոսի 24-րդ գլխում. «Որովհետեւ ինչպէս կայծակը դուրս է գալիս արեւելքից եւ երեւում մինչեւ արեւմուտք. այնպէս էլ կլինի մարդի Որդուն գալուստը»։ Մատթեոս 24։27
Նա գալիս է հաղթելու՝ չվախենալով պարտությունից, որովհետեւ Նա արդեն հաղթանակած է։ Նա գալիս է նետերն արձակելու բոլոր անհրաժեշտ ուղղություններով, եւ այլեւս հնարավոր չէ Նրան վերքեր հասցնել։ Սպիտակ ձիավորը Փեսան է, ով շտապում է Հարս եկեղեցու մոտ, իսկ ձիու ճերմակությունը ցուցանում է սրբերին, որովհետեւ Նա հայտնվելու է աշխարհին մեղվի պարսի նման շրջապատված սրբերով։
Անահիտ ԲԱՆՈՒՉՅԱՆ
