Եվրոպական հանձնաժողովի հարեւանության եւ ընդլայնման հարցերով հանձնակատար Օլիվեր Վարհեիի գլխավորած պատվիրակությունը տարածաշրջանային այցով երեկ Երեւանում էր:
«Արեւելյան գործընկերության» տնտեսական եւ ներդրումային ծրագրով ԵՄ-ն նախատեսում է առնվազն 17 միլիարդ եվրո տրամադրել տարածաշրջանի տնտեսական վերականգնման համար: Դրանից 2.3 միլիարդ եվրոն տրվելու է դրամաշնորհի միջոցով, իսկ մնացածը՝ նախագծերի եւ ներդրումների, որոնք կիրականացվեն միջազգային ֆինանսական գործընկերների, մասնավորապես՝ Եվրոպական ներդրումային բանկի, Վերակառուցման եւ զարգացման եվրոպական բանկի հետ:
Հայաստանի համար նախատեսված ընդհանուր 2.6 մլրդ եվրոյից 1.6 միլիարդի փաթեթն ուղղվելու է 5 ծրագրային ուղղություններով։ Թվիթերյան միկրոբլոգում Օլիվեր Վարհեին նշել է այդ ուղղությունները՝ տրանսպորտային կապերի բարելավում, Հայաստանի հարավային շրջանների կայունություն, էներգիախնայողություն եւ վերականգնվող էներգետիկա, թվային վերափոխում եւ ՓՄՁ-ների աջակցություն։ Այս ուղղությունները, ըստ նրա, էապես եւ գործառական եղանակով կնպաստեն տնտեսության վերականգնմանը: Եվրամիության հանձնակատարը ՀՀ փոխվարչապետի պաշտոնակատար Մհեր Գրիգորյանի հետ համատեղ հայտարարության ժամանակ մանրամասնել է, որ ցանկանում են ստեղծել առեւտրային ուղիներ եւ կապակցել եվրոպական շուկաների, եվրոպական տնտեսության հետ, որի միջոցով կկարողանան շատ ավելի արագ մոտեցնել այս տարածաշրջանը Եվրամիությանը:
Տարածաշրջանային այցը Օլիվեր Վարհեին սկսել էր հուլիսի 7-ին՝ Վրաստանից։ Այստեղ իրականացվելիք ծրագրերի համար նախատեսվում է առնվազն 3.9 մլրդ եվրոյի ներդրում, որը, ըստ ԵՄ ներկայացուցչի, կազմում է Վրաստանի նախաճգնաժամային շրջանի ՀՆԱ-ի գրեթե մեկ երրորդը (նախաճգնաժամային շրջան ասելով նկատի ունի մինչեւ Վրաստանում տեղի ունեցած վերջին քաղաքական սրացումները.-խմբ.)։ Վրաստանի տնտեսության եւ հասարակության զարգացման հիմնական խոչընդոտը եւ խոցելիությունը համարում է կապի խնդիրը, կլինեն դրանք երկաթգծերի, ճանապարհների, Սեւ ծովի չօգտագործված ներուժի կամ էլեկտրամատակարարման եւ ինտերնետային լայնաշերտ կապի միջոցով մայրաքաղաքի միացման հետ կապված խնդիրները: Վերոնշյալ խնդիրների լուծման համար առաջարկում են աջակցություն ՓՄՁ-ներին, տեղական համայնքներին, թվային ծառայությունների բարելավում եւ լայնաշերտ ինտերնետի հասանելիության մեծացում ամբողջ երկրում եւ այլն։
Ամփոփելով նախօրեին Ադրբեջան կատարած այցը՝ եվրահանձնակատարն այդ երկիրը բնորոշել է որպես բարեկեցիկ երկիր, որը կարող է Եվրամիության ֆինանսական օժանդակության կարիքը չունենալ։ Հետեւաբար, նախատեսում են այլ մոտեցում, այն է՝ տնտեսության ապագայի համատեղ նախագծում՝ տրամադրելով գիտելիքներ, ներդրողներ, ինչպես նաեւ ստեղծելով առեւտրային ուղիներ, որոնք պետք է երկարաժամկետ ծառայեն տարածաշրջանի եւ Եվրոպայի շահերին:
Եվրոպայի համար գերակա հետաքրքրություն է ներկայացնում էներգետիկ գործընկերությունը մատակարարումների դիվերսիֆիկացման եւ ածուխի էներգիայի օգտագործման աստիճանական դադարեցման հարցը, որի հաջորդ փուլը կանաչ էներգետիկ ռեսուրսների վրա հիմնվելն է։ Չնայած ԵՄ-ն Ադրբեջանի տնտեսության, այդ թվում՝ գյուղատնտեսության ոլորտում ավելի լայն համագործակցության դաշտ է տեսնում, այնուամենայնիվ, տարածաշրջանային զարգացումները դիտարկում է մեկ հարթակում։ Եվրոպական շահերից է բխում, որպեսզի Հայաստանի, Վրաստանի եւ Ադրբեջանի հետ հարաբերվի որպես մեկ տարածաշրջանային միավորի՝ միջնաժամկետ եւ երկարաժամկետ ծրագրերն իրականացնելու համար։ Այդ նպատակով շահագրգռված է, որպեսզի Սեւ ծովը կապվի Կասպից ծովի հետ, եւ Ադրբեջանով՝ Կասպից ծովից Սեւ ծով անցնող առեւտրային ու էներգետիկ ուղիներն ապահով հասնեն Եվրոպա:
Վարհեին Ադրբեջանի պաշտոնատար անձանց հետ քննարկել է նաեւ Արցախի հետկոնֆլիկտային իրավիճակը եւ այն աջակցությունը, որը կարող է ցուցաբերել ԵՄ-ն այդ հարցում: Իսկ այդ աջակցությունը «պատերազմի հետեւանքները հաղթահարելու եւ տարածաշրջանում երկարաժամկետ խաղաղության համար միասին աշխատելու մեջ է»։ «Եվրամիությունը ողջունում է այս փոխանակումը (գերիների դիմաց ականների քարտեզների.-խմբ.): Մենք նաեւ պատրաստ ենք օգնելու եւ՛ ֆինանսական, եւ՛ այլ ձեւերով, որպեսզի այդ քայլերը շարունակվեն: Այսպիսով՝ ԵՄ ջանքերը թափանցիկ են եւ հասանելի երկու կողմերին՝ օգնելու նրանց առաջ շարժվել եւ վերակառուցել տարածաշրջանը»,- ասել է նա Բաքվում: Սրանով փաստացի ԵՄ-ն ընդունում է Ադրբեջանի սանձազերծած պատերազմի արդյունքները՝ դրա դիմաց առաջարկելով հումանիտար եւ ֆինանսական աջակցություն։
