Թուրքիան ժամանակավորապես կփորձի խուսափել որեւէ կողմ ընտրելուց, սակայն ստիպված կլինի լուրջ որոշում կայացնել, եթե ԱՄՆ-ի եւ Չինաստանի միջեւ մրցակցությունը վատթարանա:
Չինաստանի եւ Թուրքիայի հարաբերությունների ուսումնասիրությունը կարեւոր է փոփոխվող աշխարհակարգում: Վերլուծաբանների ուշադրության կենտրոնում են Պեկինի «Գոտի եւ ճանապարհ» (Belt and Road) եւ Անկարայի «Տրանսկասպյան Արեւելք-Արեւմուտք (Trans-Caspian East-West Middle Corridor Initiative) միջանցքի» նախագծերը, ինչպես նաեւ Թուրքիայի քաղաքական «նախապատվությունը» Արեւմուտքի եւ Արեւելքի միջեւ:
2021 թ. գարնանը Չինաստանի արտգործնախարար Վանգ Ինը այցելել է Անկարա, հանդիպել Թուրքիայի նախագահ Ռ. Էրդողանին եւ արտգործնախարար Մ. Չավուշօղլուին` քննարկելով միջպետական հագեցած օրակարգ: Իր հերթին Թուրքիայի արտգործնախարարն ընդգծել է. «Թուրքիան մշտապես հավատարիմ է եղել Չինաստան-Թուրքիա ռազմավարական գործընկերության պահպանմանն ու խորացմանը: Թուրքիան երբեք չի ներքաշվի հակաչինական գործողությունների մեջ»: Ի պատասխան վերջինիս` Վանգը խոստացել է, որ կխրախուսվի չինական ընկերությունների կողմից թուրքական ապրանքների ներմուծումը, ու կընդլայնվեն ներդրումները Թուրքիայում:
Չինաստանը կարծում է, թե իր շահերից է բխում Թուրքիայի տնտեսության զարգացման խթանումը: 2017 թ. Չինաստանը Թուրքիայում ներդրել է 1.3 մլրդ դոլար, 2019-ին` 2.8 մլրդ դոլար: Պեկինը խոստացել էր 2020-ին ներդրումը հասցնել մինչեւ 5 մլրդ դոլարի` խթանելու երկկողմ տնտեսական, առեւտրային ու ներդրումային համագործակցությունը:
«Covid-19» համավարակը Չինաստանին մեկ այլ հնարավորություն է տվել տնտեսական խթաններ տրամադրելու Թուրքիային, որը, ինչպես Արեւմտյան Ասիայի եւ Մերձավոր Արեւելքի շատ երկրներ, պայքարում է պատվաստանյութերի բավարար թվաքանակ ձեռք բերելու համար: Չինաստանն արդեն հսկայական քանակությամբ «Սինովակ» պատվաստանյութ է ուղարկել Թուրքիա: Արդյունքում՝ ավելի քան 7 մլն թուրք ստացել է առաջին, իսկ 2.1 մլն-ն՝ պատվաստանյութի երկրորդ չափաբաժինը: Նախագահ Էրդողանը, հրապարակայնորեն պաստվաստվելով, փորձում էր ցույց տալ չինական պատվաստանյութի հուսալի եւ ապահով լինելը: Կարճ ասած` Չինաստանը փորձում է ընդլայնել իր ներգրավվածությունը թուրքական շուկայում` օգտագործելով «պատվաստանյութերի դիվանագիտությունը», կատարելով ներդրումներ տեխնոլոգիական բնագավառում, մեծացնելով իր ազդեցությունը Թուրքիայի վրա: Չինաստանի եւ ԱՄՆ-ի միջեւ տեխնոլոգիական եւ պատվաստանյութերի համար մրցակցությունը կարող է էլ ավելի թեժանալ, իսկ Չինաստանին անհրաժեշտ են երաշխիքներ, հատկապես` Թուրքիայում. մի երկիր, որը կարող է Պեկինի համար անվտանգային մեծ խնդիրներ հրահրել:
Իր հերթին Թուրքիան հասկանում է, որ առանց Չինաստանի աջակցության Տրանսկասպյան միջանցքի իր նախաձեռնությունը չի կարող կյանքի կոչել, քանի որ այն ռազմավարական ուղիներով կապված է չինական «Գոտի եւ ճանապարհ» նախաձեռնության հետ: Թուրքիան դեռեւս անհրաժեշտ է Չինաստանին` զարգացնելու իր Չինաստան-Կենտրոնական Ասիա-Արեւմտյան Ասիա տնտեսական միջանցքը: Վերջինս այլընտրանքային ճանապարհ է տրամադրում Չինաստանին դեպի Եվրոպա` շրջանցելով Ռուսաստանը: Գլխավոր ցամաքային ճանապարհը Սինցզյանից անցնելու է Կենտրոնական Ասիայով Իրան, այնուհետեւ Թուրքիա, իսկ մուլտիմոդալը` Կենտրոնական Ասիայով եւ Կասպից ծովով դեպի Բաքու, ապա վրացական եւ թուրքական երկաթուղիներով դեպի Միջերկրական, Սեւ եւ Էգեյան ծովերի նավահանգիստներ: «Գոտի եւ ճանապարհ» նախաձեռնության ու Տրանսկասպյան միջանցքի ներդաշնակեցման մասին ստորագրվել է հուշագիր, որի ուղղությամբ շատ լավ էր աշխատում թուրքական լոբբին: Արդյունքում Չինաստանը հսկայական ներդրումներ կատարեց Թուրքիայի երկաթուղիների արդիականացման մեջ: Չինական երկաթուղիների կառուցման եւ Չինաստանի ազգային մեքենաշինության ներմուծման ու արտահանման կորպորացիաներն իրավունք ստացան հանձն առնելու արագընթաց երկաթուղու կառուցումը, որը պետք է կապի Անկարան եւ Ստամբուլը: Երկաթուղին հայտնի է որպես Եվրոպան Ասիային կապող օղակ: 2019 թ. չինական երկաթուղու էքսպրես առաջին բեռնատար գնացքը Չինաստանից Եվրոպա ուղեւորվեց Բաքու-Թբիլիսի-Կարս երկաթուղով եւ Բոսֆորի թունելով: Իսկ Թուրքիայից Չինաստան ապրանքներ տեղափոխող առաջին գնացքն էլ սկսեց գործել նույն երկաթուղով 2020 թ.:
Թուրքիան իր 83 մլն բնակչությամբ մեծ հնարավորություններով շուկա է Չինաստանի համար: Չինաստանի մաքսային գլխավոր վարչության կողմից տրամադրված վիճակագրությունը ցույց է տալիս, որ 2020-ին երկրների միջեւ առեւտրաշրջանառությունը գերազանցել է 24 մլրդ դոլարը` նախորդ տարվա 20 մրդ դոլարի համեմատ: Միեւնույն ժամանակ Չինաստանը Թուրքիայից ներմուծել է 16.3 մլրդ դոլարի ապրանք:
Թուրքիան դեռեւս անհրաժեշտ է Չինաստանին, որպեսզի օգնի ամրապնդելու իր դիրքերը Մերձավոր Արեւելքում, իսկ Թուրքիային շահեկան են Չինաստանի տնտեսական ներդրումները: Այնուամենայնիվ, եթե Թուրքիան կանգնի ընտրության առաջ, ամենայն հավանականությամբ, կմնա Արեւմուտքի ճամբարում, ինչպես վարվեց կորեական պատերազմի ժամանակ, երբ միացավ չին-սովետական դասավորվածության դեմ պայքարին:
