Դեր Զորի Սրբոց Նահատակաց հայկական եկեղեցական համալիրի պայթեցման կադրերը հին են՝ 2014 թվականի, այս մասին «Ռադիոլուր»-ին հայտնեց Հալեպի ազգային առաջնորդարանի քահանա տեր Գառնիկ Չափանյանը։ Դրանք պարզապես նորից շրջանառվում են համացանցում։ Պայթեցվելուց հետո եկեղեցում վերականգնողական որևէ աշխատանք չի կատարվել, ասում է քահանան․
«Երբ Դեր Զորը 2016-2017 թթ․-ին ազատագրվեց զինյալներից, Սիրիայի նախագահը խոստում տվեց, որ մոտ ապագայում, երբ հայությունը վերադառնա, եկեղեցին կվերանորոգվի»,-ասում է քահանան։
Թե երբ կվերադառնան հայերը Դեր Զոր, հայտնի չէ։ Այս պահին քաղաքում մեկ հայ է բնակվում։ Նախքան զինյալ ահաբեկիչների՝ Դեր Զորը գրավելը, ապրում էր շուրջ 30 հայ ընտանիք։ Քաղաքի մոտակայքում կա նավթի հանք, որտեղ և հիմնականում աշխատում էին հայերը։ Այժմ քաղաքն ազատագրված է, նավթի հանքը՝ ոչ, այսինքն, վերադառնալու պարագայում հայերը աշխատանքի խնդիր են ունենալու, -ասում է տեր Գառնիկը․
«Երբ որ նավթային հանքերը ազատագրվեն և լինեն Սիրիայի տիրապետության տակ, նոր այն ժամանակ հայերը կվերադառնան, որովհետև նրանց գործն այդ հանքերում է»,-նշում է քահանան։
Անորոշ է նավթի հանքն ազատագրելու ժամկետը, հայերի՝ Դեր Զոր վերադարձի ժամկետը, հետևաբար՝ անորոշ է նաև ավերված եկեղեցին վերանորոգելու հեռանկարը։ Մեծ եղեռնի նահատակների մասունքներն ամփոփող Դեր Զորի Սրբոց Նահատակաց եկեղեցին ահաբեկիչները պայթեցրել են 2014թ. սեպտեմբերի 22-ին։ Համաձայն մասնագետների գնահատականների՝ դրանով փորձ է արվել կրոնականից բացի, նաև քաղաքական խնդիր լուծել․ վերացնել հայոց ցեղասպանության ևս մեկ վկայություն։
Սրբոց Նահատակաց եկեղեցին օծվել է 1991-ին` Մեծի Տանն Կիլիկիո Գարեգին Բ կաթողիկոսի ձեռամբ։ 2002 թվականի ապրիլի 24-ին եկեղեցին և Հայոց ցեղասպանության հուշահամալիրը հռչակվել են համազգային ուխտատեղի:
