«Facebook»-ը մինչեւ այս տարվա վերջը պատրաստվում է թողարկել «Novi» անունը կրող էլեկտրոնային դրամապանակը եւ, իհարկե, երկար սպասված «Diem» կրիպտոարժույթը, որը ժամանակին պետք է կրեր «Libra» անունը, սակայն հետագայում անվանափոխվեց։
Դատելով աշխարհում ընթացող զարգացումներից՝ էլեկտրոնային վճարման միջոցների լայնամասշտաբ կիրառումը սարերի հետեւում չէ: Այսպես՝ աշխարհահռչակ ներդրող Ուորեն Բաֆեթի «Berkshire and Hathaway» ընկերությունը 300 միլիոն ԱՄՆ դոլար ներդրեց հնդկական «Paytm» ընկերության գործունեության մեջ, որը Հնդկաստանի էլեկտրոնային վճարումների հարթակ է։ Հայտնի գործարարի քայլը հզոր ազդակ էր ամբողջ աշխարհին։
«Մենք միանշանակ փնտրում ենք ուղիներ, որպեսզի ներգրավվենք ֆինանսական տեխնոլոգիաների ոլորտում, կարծում ենք, որ լավ դիրքում ենք, որպեսզի այդպես գործենք»,- «Բլումբերգ» հեռուստաընկերությանը տված հարցազրույցում ասել է «Ֆեյսբուքի» գործադիր տնօրեն Դեյվիդ Մարկուսը։
Հաղորդվում է, որ ընկերությունը «Novi» էլեկտրոնային դրամապանակի մեջ կներառի NFT (non-fungible token) գործառույթներ, որոնք չկրկնվող ինֆորմացիայի միավոր են, որը պահվում է «բլոկչեյն» համակարգի վրա, եւ կարող է ներկայացվել թվային ցանկացած տեսքով, ինչպիսին կարող են լինել արվեստի գործը, երգերը, տեսահոլովակները, տեսախաղերի մեջ կիրառվող տարրերը (տարատեսակ հրազեններ, հագուստներ, խաղային հերոսներ, որոնք չեն կարող կրկնվել), անգամ թվիթերյան գրառումը:
Օրինակ՝ այս նկարը վաճառվել է 6,6 միլիոն ԱՄՆ դոլարով, որտեղ պատկերված է Դոնալդ Թրամփը նախագահական ընտրություններում պարտվելուց հետո։ Հարց է առաջանում, թե նկարը ինչպե՞ս է հայտնվել համացանցում այն դեպքում, երբ այն ունի օրինական սեփականատեր եւ չի կարող կրկնվել։ Բանն այն է, որ սա օրիգինալը չէ եւ չի կարող լինել, քանզի սեփականության վկայականը կամ առանձնահատուկ կոդը պահվում է կոնկրետ «բլոկչեյնում» եւ այնտեղ մուտք կարող է ունենալ միայն իրական սեփականատերը։
Ըստ Դեյվիդ Մարկուսի՝ թվային դրամապանակը պատրաստ է, ուղղակի սպասում են որպեսզի կրիպտոարժույթի հետ միասին թողարկեն։ «Libra»-ն մինչ այս բացասական արձագանքներ էր ստացել օրենսդիրի եւ կարգավորող մարմինների կողմից, ինչպես նաեւ միանշանակ չի ընդունվել սպառողների շրջանում։ Բացի այդ, տվյալների արտահոսքի եւ փողերի լվացման հետ հնարավոր կապերի կասկածը հետաձգեցին արդեն վերաբրենդավորված կրիպտոարժույթի թողարկումը։
«Ֆեյսբուքը» անդրադարձել է բոլոր օրինական մտահոգություններին եւ կարգավորել ամենը ԱՄՆ պետական մարմինների հետ»,- հայտարարել է Մարկուսը՝ փարատելով կասկածները։
