-1936 թ. դեկտեմբերի 14-ին ծնվել է Տիգրան Լեւոնյանը՝ հայ ճանաչված օպերային երգիչ, դրամատիկական տենոր, օպերային ռեժիսոր (մահ.՝ 2004 թ.)։
-1922 թ. դեկտեմբերի 14-ին ծնվել է Գոհար Գասպարյանը՝ հայ օպերային արվեստի մեծագույն վարպետ, քնարակոլորատուրային սոպրանո, ԽՍՀՄ ժողովրդական արտիստուհի, սոցիալիստական աշխատանքի հերոս։ Հարուստ է եղել Գոհար Գասպարյանի երգացանկը՝ հայ, ռուս եւ արեւմտաեվրոպացի կոմպոզիտորների մեծակտավ ու փոքրածավալ ստեղծագործություններ, հոգեւոր ու ժողովրդական երգեր։ Տիրապետում էր հայերեն, իտալերեն, ֆրանսերեն, գերմաներեն, արաբերեն ու անգլերեն լեզուներին։ 1962-2007 թթ. դասավանդել է Երեւանի Կոմիտասի անվան պետական կոնսերվատորիայում (1973-ից՝ պրոֆեսոր)։ Նրա բազմաթիվ աշակերտներ դարձել են համաշխարհային լավագույն բեմերի մեներգիչներ (Օլգա Զաքարյան, Ռաֆայել Հակոբյանց, Դավիթ Վարժապետյան, Էլլադա Չախոյան, Շաքե Ասչյան, Գայանե Գրիգորյան, Վարդուհի Խաչատրյան, Վարդուհի Աբրահամյան եւ այլք)։ Նրա ուսանողն է եղել նաեւ ապագա ամուսինը՝ օպերային երգիչ, ռեժիսոր, դերասան Տիգրան Լեւոնյանը։
-1947 թ. դեկտեմբերի 14-ին մահացել է Գուրգեն Ալեմշահը՝ հայ կոմպոզիտոր, խմբավար եւ դիրիժոր (ծնվ.՝ 1907 թ.)։ Որպես դիրիժոր եւ խմբավար հանդես է եկել Ֆրանսիայում, Իտալիայում եւ ԱՄՆ-ում սիմֆոնիկ եւ խմբերգային համերգներով։ Կատարել է Կոմիտասի, Սպենդիարյանի, Չուխաջյանի, Քրիստափոր Կարա-Մուրզայի, Արմեն Տիգրանյանի եւ այլոց ստեղծագործությունները։
-1987 թ. դեկտեմբերի 14-ին հիմնվեց «Համասը»՝ պաղեստինյան իսլամական կուսակցություն, որն արաբերենից թարգմանաբար նշանակում է «Իսլամական դիմադրության շարժում»: Համասը» այժմ կառավարում է Գազայի տարածքը։
-1995 թ. դեկտեմբերի 14-ին ավարտվեց մոտ 3 տարի տեւած Բոսնիական պատերազմը։ Այն մաս էր կազմում Հարավսլավական պատերազմների եւ սկիզբ առավ Հարավսլավիայի Ֆեդերատիվ Հանրապետության փլուզման շրջանում, այն բանից հետո, երբ Բոսնիա եւ Հերցեգովինան 1992 թ. իրեն անկախ հռչակեց։ Հակամարտող երեք կողմերն էին Բոսնիա եւ Հերցեգովինայի երեք էթնիկ խմբերը՝ բոսնիակները, խորվաթները եւ սերբերը։
-1825 թ. դեկտեմբերի 14-ին տեղի ունեցավ Դեկաբրիստների ապստամբությունը Պետերբուրգում։
-1846 թ. դեկտեմբերի 14-ին Անդրկովկասը վարչական նոր բաժանման է ենթարկվում. ստեղծվում են Թիֆլիս, Քութայիս, Շամախի եւ Դերբենդ նահանգները։
-1861 թ. դեկտեմբերի 14-ին Կ. Պոլսում հիմնվում է Արեւելյան թատրոնը։ Բացման առթիվ ճառ է ասում Միքայել Նալբանդյանը։
-1913 թ. դեկտեմբերի 14-ին Գերմանիան Թուրքիա ուղարկեց գեներալ Լիման ֆոն Սանդերսի գլխավորած ռազմական պատվիրակությունը։
-1919 թ. դեկտեմբերի 14-ին Ուզունլարում բոլշեւիկների նախաձեռնությամբ հրավիրվում է Լոռվա «չեզոք գոտու» գյուղացիական դեպուտատների խորհրդի առաջին նիստը, որը բանաձեւ է ընդունում կալվածատիրությունը վերացնելու եւ հողային կոմիտեներ ստեղծելու մասին։
-1825 թ. դեկտեմբերի 14-ին ծնվել է Ստեփան Ոսկանյանը՝ հայ հրապարակախոս, խմբագիր, թարգմանիչ, մանկավարժ։ Ոսկանյանը եղել է աշխարհաբարի կողմնակից, գրել է հղկված, պատկերավոր լեզվով։ Առաջիններից մեկն է անդրադարձել Խաչատուր Աբովյանի «Վերք Հայաստանի» վեպին եւ ըստ արժանվույն գնահատել այն։ Գրել է պատմվածքներ, բանաստեղծություններ, երգիծական գործեր:
-1909 թ. դեկտեմբերի 14-ին ծնվել է Փայլակ Մանուկյանը՝ հայ խորհրդային ճարտարապետ, ՀԽՍՀ վաստակավոր շինարար (1961)։
-1929 թ. դեկտեմբերի 14-ին մահացել է Մեսրոպ Նուպարյանը՝ հայ լեզվագետ, թարգմանիչ։
-1972 թ. դեկտեմբերի 14-ին մահացել է Մուշեղ Սանթրոսյանը՝ հայ մանկավարժ, մանկավարժական գիտությունների դոկտոր (1948), պրոֆեսոր (1937):
-1994 թ. դեկտեմբերի 14-ին մահացել է Նվարդ Աբալյանը՝ հայ դերասանուհի, ՀԽՍՀ վաստակավոր արտիստուհի (1956)։
