Ուկրաինան երեկ խզել է Ռուսաստանի հետ դիվանագիտական հարաբերություններն այն բանից հետո, երբ ՌԴ նախագահ Վլադիմիր Պուտինը հայտարարել է Դոնբասում հատուկ ռազմական օպերացիա սկսելու որոշման մասին։ Նա հայտնել է, որ Դոնբասի ժողովրդական հանրապետություններն օգնության խնդրանքով դիմել են, նաեւ հավելել է, որ Ռուսաստանի պլանների մեջ չի մտնում Ուկրաինայի օկուպացումը, սակայն Ռուսաստանը ձգտելու է Ուկրաինայի ապառազմականացմանը։ Մինչ տարածաշրջանում գործի է դրվել կոշտ ուժը, Ուկրաինային իրենց բարոյական աջակցությունն են հայտնում մի շարք երկրներ, որոնք ավելի վաղ պատրաստ էին կանգնելու այդ երկրի կողքին։
Ուկրաինայի նախագահ Վլադիմիր Զելենսկին թվիրթերյան իր միկրոբլոգում գրառում էր կատարել՝ կոչ անելով համաշխարհային առաջնորդներին ստեղծել «հակապուտինյան կոալիցիա»՝ Պուտինի դեմ պատժամիջոցներ սահմանելու, ինչպես նաեւ Ուկրաինային «լայնածավալ պաշտպանական եւ ֆինանսական աջակցություն» ցուցաբերելու համար։
Ուկրաինան աջակցություն է խնդրել նաեւ Թուրքիայից. այդ երկրում Ուկրաինայի դեսպանը կոչ է արել «ռազմավարական դաշնակից Թուրքիային ու բարեկամ թուրք ժողովրդին աջակցելու այս դժվարին ժամանակներում»։ Սակայն «ռազմավարական դաշնակից Թուրքիան» ու «բարեկամ թուրք ժողովուրդը» կարծես թե չեն շտապում «կրակը նետվել» եւ դեռեւս բավարարվում են խորհրդակցություններ, քննարկումներ անցկացնելով։ Թուրքիային, թերեւս, պետք է անհանգստացնի այն հանգամանքը, որ Արցախի դեմ ադրբեջանաթուրքական ագրեսիայից հետո այս պահին վտանգված է բայրաքթարների «հեղինակությունը»։ «Ինտերֆաքս» գործակալությունը հայտնում է, որ ռուսական բանակը գերճշգրիտ հարվածներ է հասցրել Ուկրաինայի Զինուժի կողմից ձեռք բերված թուրքական «բայրաքթարների» հենակետերին, ինչի հետեւանքով ԱԹՍ-ներն ամբողջությամբ ոչնչացվել են։
Հերթական անգամ Ուկրաինային զենք ու զինամթերք տրամադրելու կոչով է հանդես եկել Գերմանիայում Ուկրաինայի դեսպան Անդրեյ Մելնիկը. «Հիմա ժամանակն է, որ Գերմանիան արթնանա»,- ասել է դիվանագետը գերմանական ռադիոկայանի եթերում՝ հորդորելով անհապաղ «դժոխային պատժամիջոցներ» կիրառել Ռուսաստանի դեմ։ «Այժմ կարեւոր է մեզ օգնել, այլ ոչ թե մեզ մխիթարել համերաշխության խոսքերով»,- ընդգծել է Մելնիկը։ Հիշեցնենք, որ նախկինում Գերմանիայի իշխանությունները դեմ են արտահայտվել Ուկրաինային զենք տրամադրելուն։
Շաբաթներ շարունակ Արեւմուտքը խոսում էր Ռուսաստանի կողմից ռազմական գործողություններ սկսելու մասին, սակայն ներկայումս երկրի ղեկավարներն ու միջազգային կառույցները շարունակում են գտնվել քննարկումների եւ դատապարտումների փուլում, ինչի մասին տեղեկանում ենք նրանց թվիթերյան գրառումներից։ CNN հեռուստաընկերության լրագրողը՝ վկայակոչելով ԱՄՆ վարչակազմի աղբյուրները, հայտնել է, որ ԱՄՆ նախագահ Ջո Բայդենը կարող է հայտարարել Ուկրաինային ռազմական օգնության ավելացման, ինչպես նաեւ ավելի շատ ամերիկյան զորքեր Եվրոպա ուղարկելու մասին՝ ՆԱՏՕ-ի արեւելյան թեւն ուժեղացնելու համար։ Սակայն մինչ այդ հայտնի է դարձել, որ նախօրեին ԱՄՆ հատուկ ջոկատայիններ լքել են Ուկրաինան՝ ամերիկացի դիվանագետներին Լեհաստան ուղեկցելուց հետո։
Այս համատեքստում ուշագրավ է, որ Ուկրաինայում Ռուսաստանի ռազմական հատուկ գործողությունը չի փոխել ռուսական գազի մատակարարումը դեպի Եվրոպա։ Գազի փոխանցման համակարգերի եւ գազատարների օպերատորների գործառնական տվյալները ցույց են տալիս, որ տարանցումը շարունակվում է, այդ թվում՝ Ուկրաինայի տարածքով։ Միեւնույն ժամանակ, Ուկրաինայի տարածքով ռուսական գազի տարանցման հայտը փետրվարի 24-ին աճել է մինչեւ 83.9 միլիոն խորանարդ մետր, թեեւ այդ տվյալները վերջնական չեն եւ կարող են փոխվել, այդ մասին նշված է Ուկրաինայի գազային համակարգի օպերատորի կայքում։ Ըստ «Opal»-ի եւ «NEL»-ի գազատարների օպերատորների՝ երեկ առավոտյան «Nord Stream»-ից Գերմանիա ժամային մատակարարումները կազմում են 6.7 միլիոն խորանարդ մետր: Օրական կարտադրվի 161 մլն խմ, ինչը կազմում է մատակարարումների սովորական ծավալը։ Ուկրաինայի տարածքով ռուսական գազի տարանցումը հաստատում են նաեւ սլովակյան օպերատորի տվյալները։
