Հայաստան ներմուծվող սպիտակ շաքարի նկատմամբ սակագնային քվոտա կկիրառվի։ Համապատասխան որոշման նախագիծը մշակված է եւ ներկայացված հանրային քննարկման իրավական ակտերի նախագծերի հրապարակման միասնական կայքում՝ մինչեւ մարտի 8-ը։
Ըստ էկոնոմիկայի նախարարության` նախագծի մշակումը պայմանավորված է Եվրասիական տնտեսական հանձնաժողովի խորհրդի 2021 թ. դեկտեմբերի 2-ի թիվ 140 որոշմամբ Հայաստանի Հանրապետությանը հատկացված ներմուծման թույլատրելի ծավալի սպառման ապահովման անհրաժեշտությամբ: Նշյալ թիվ 140 որոշմամբ հաստատված է սպիտակ շաքարի նկատմամբ սակագնային քվոտայի կիրառում՝ մինչեւ 2022 թ. օգոստոսի 31-ը ներառյալ։ Հաշվի առնելով, որ Եվրասիական տնտեսական միությանն անդամակցության շրջանակներում ոչ սակագնային կարգավորման պատասխանատու պետական կառավարման մարմինը ՀՀ էկոնոմիկայի նախարարությունն է, վերջինս ճանաչվում է սպիտակ շաքարի ներմուծման լիցենզիա տալու մասով լիազոր մարմին։
Երբ նախագիծը ներառվի կառավարության նիստի օրակարգում քննարկման, կորոշվի, որ որոշումն ուժի մեջ մտնելուց հետո մինչեւ օգոստոսի 31-ն ընկած ժամանակահատվածում սպիտակ շաքարի (ԵԱՏՄ ԱՏԳ ԱԱ 1701 99 100 ծածկագիր) ներմուծումն ազատվում է ներմուծման մաքսատուրքից՝ 60.0 հազ. տոննայից ոչ ավելի ծավալով՝ լիցենզիայի առկայության դեպքում, բացառությամբ՝ Հայաստանի հետ ազատ առեւտրի ռեժիմ ունեցող երկրներից ծագող եւ ներմուծվող սպիտակ շաքարի։ Ընդ որում` այդ ներմուծումը պետք է նախատեսված լինի բացառապես ներքին շուկայում իրացման կամ շաքար պարունակող արտադրանքի արտադրության համար։ Որոշմամբ կհաստատվեն եւ՛ արտաքին տնտեսական գործունեության մասնակիցների միջեւ սպիտակ շաքարի՝ Հայաստան ներմուծման լիցենզիայի ընթացակարգը, եւ՛ ներմուծման մեկանգամյա ու գլխավոր լիցենզիաների ձեւերը։
Ներմուծման թույլատրելի ծավալը կսահմանվի՝ ելնելով վերջին 3 տարում տվյալ ապրանքի ներմուծման միջին ծավալից։ Գլխավոր լիցենզիան արտաքին առեւտրային գործունեության մասնակցին իրավունք կտա լիցենզավորման ենթակա առանձին տեսակի ապրանք արտահանելու կամ ներմուծելու համար՝ լիցենզիայով նախատեսված քանակով։ Ապրանքի ներմուծման թույլատրելի ծավալը կբաշխվի հետեւյալ կերպ. 1. պատմական գնորդների համար` ներմուծման թույլատրելի ընդհանուր ծավալի 50 տոկոսը, 2. այլ արտաքին տնտեսական գործունեության մասնակիցների համար՝ ներմուծման թույլատրելի ընդհանուր ծավալի 50 տոկոսը: Ասենք, որ «պատմական գնորդներ» ասելով նկատի է առնվում հաշվարկված ժամանակաշրջանում ներքին սպառման համար ապրանք ներմուծող՝ Հայաստանի օրենսդրությանը համապատասխան արտաքին տնտեսական գործունեության մասնակիցներին։
Ներմուծման համար արտաքին տնտեսական գործունեության մասնակցի կողմից ՀՀ էկոնոմիկայի նախարարություն հայտեր ներկայացվելու վերջնաժամկետը որոշումն ուժի մեջ մտնելու օրվան հաջորդող 10-րդ աշխատանքային օրը ներառյալ է: Հայտատուն իրավունք ունի հայտը ենթարկել փոփոխության՝ մինչ որոշումն ուժի մեջ մտնելու օրվան հաջորդող 5-րդ աշխատանքային օրը ներառյալ:
Պատմական գնորդները լիազոր մարմին պետք է ներկայացնեն իրենց հայտերը, որոնցում խնդրարկված ներմուծվելիք ապրանքի քանակը չպետք է գերազանցի հաշվետու ժամանակաշրջանում յուրաքանչյուրի կողմից ներմուծված ապրանքի միջին ծավալը: Եթե ներմուծման թույլատրելի ծավալի բաշխումից հետո մնացորդ լինի, ապա այդ մասին լիազոր մարմնի կողմից 3 աշխատանքային օրում կտեղեկացվի այն պատմական գնորդներին, որոնք ստացել են նախնական հայտով խնդրարկված ծավալից ավելի քիչ ներմուծման թույլատրելի ծավալ։ Ծանուցումը կուղարկվի էլեկտրոնային եղանակով՝ նշելով մնացորդի քանակը: Եվ այդ ժամանակ էլ պատմական գնորդները կկարողանան լրացուցիչ հայտեր ներկայացնել։ Այս հայտերը ստանալուց հետո լիազոր մարմինը 2 աշխատանքային օրում կիրականացնի պատմական գնորդներին հասանելիք մնացորդի վերաբաշխումը։ Արտաքին տնտեսական գործունեության այլ մասնակիցների միջեւ ներմուծման թույլատրելի ծավալի բաշխումը յուրաքանչյուր մեկ մասնակցի մասով չպետք է գերազանցի արտաքին տնտեսական գործունեության այլ մասնակիցներին հասանելիք ներմուծման թույլատրելի ընդհանուր ծավալի 20 տոկոսը:
Դիտանցման նպատակով մաքսային ոլորտի լիազոր մարմինը ամսական պարբերականությամբ՝ մինչեւ հաջորդ ամսվա 5-ը, արտաքին տնտեսական գործունեության մասնակիցների կողմից Հայաստան սպիտակ շաքարի ներմուծման բնաիրային ծավալների մասին տեղեկատվություններ կներկայացնի էկոնոմիկայի նախարարություն՝ նշելով կազմակերպության անվանումը, ՀՎՀՀ-ն, լիցենզիայի համարը, տրման ամսաթիվը, ապրանքների հայտարարագրի գրանցման համարը, ամսաթիվը, փաստացի հայտարարագրված ծավալը, ապրանքի ԵԱՏՄ ԱՏԳ ԱԱ ծածկագիրն ու նկարագիրը։
Հավելենք, որ լիցենզիայի ժամկետի ավարտ է համարվում համապատասխան տարվա ավարտը: Եվ չի թույլատրվում տրամադրված լիցենզիաների մեջ փոփոխություններ կատարել, այդ թվում՝ տեխնիկական բնույթի:
