«Նեղ դռնովը ներս մտէք»
Երանի նորանց, որ արդարութեան համար հալածուած են. արդարության եւ Աստվածային Ճշմարտության որոնման մասին խոսվել է նաեւ Երանության չորրորդ պատվիրանում։ Հիշում ենք, որ Ճշմարտությունն Ինքը Քրիստոսն է։ Նա անվանվում է նաեւ Ճշմարտության Արեւ։ Այդ պատվիրանում խոսվում է Աստծո Ճշմարտության համար հալածանքների, նեղությունների մասին։ Քրիստոնյայի ճանապարհը մշտապես Քրիստոսի մարտիկի ճանապարհն է։ Դժվար, բարդ, նեղ է ճանապարհն այդ:
«Քանի նեղ է դուռը եւ նեղուածք է ճանապարհը, որ տանում է կեանքը. եւ քիչ են նորան գտնողները»։ Մատթեոս 7։14
Բայց սա միակ ճանապարհն է, որը տանում է փրկության, այլ ճանապարհ մեզ տրված չէ։ Իհարկե, դժվար է ապրել փոթորկվող, հաճախ քրիստոնեության հանդեպ թշնամական աշխարհում։ Նույնիսկ եթե չկան հալածանքներ հավատքի համար, հեշտ չէ ապրել քրիստոնեավայել, կատարելով Աստծո պավիրանները, գործել Աստծո եւ մերձավորների համար։
Շատ ավելի հեշտ է ապրել «ինչպես բոլորը» եւ «վերցնել կյանքից ամեն հնարավորը»։ Սակայն մենք գիտենք, որ հենց այդ ճանապարհն է տանում կործանման։
«Նեղ դռնովը ներս մտէք, որովհետեւ լայն է դուռը եւ ընդարձակ ճանապարհը, որ կորուստն է տանում. եւ շատեր են նորանով գնացողները»։ Մատթեոս 7։13
Եվ այն, որ այդ լայն ճանապարհով շատ-շատերն են գնում, չպետք է մեզ կաշկանդի։ Քրիստոնյան միշտ այլ է, նման չէ բոլորին։
Պետք է ձգտել ապրել ոչ թե ինչպես բոլորն են ապրում, այլ ինչպես Արարիչն է պատվիրել։ Հոգ չէ, եթե մեր կյանքի եւ հավատքի համար մեզ կհալածեն այստեղ, այս երկրի վրա։ Որովհետեւ մեր իրական հայրենիքը ոչ թե այս երկրագնդի վրա է, այլ երկնքում, Աստծո հետ։
Այդ պատճառով է, որ Աստծո Արդարության համար հալածվողներին այս պատվիրանում խոստացվում է Երկնային Արքայություն։
Անահիտ ԲԱՆՈՒՉՅԱՆ
