Անգլիական «Մանչեսթեր Յունայթեդ» ակումբը 2 տարվա պայմանագիր է ստորագրել պորտուգալացի հարձակվող Քրիշտիանու Ռոնալդուի հետ՝ այն ևս մեկ տարով երկարաձգելու հնարավորությամբ:
«Արմենպրես»-ի փոխանցմամբ՝ այս մասին հաղորդագրություն է տարածել ակումբի մամուլի ծառայությունը:
Ռոնալդուն նշել է, որ «Մանչեսթեր Յունայթեդ»-ն այն ակումբն է, որը միշտ հատուկ տեղ է ունեցել իր սրտում: «Ես անհամբեր սպասում եմ «Օլդ Թրաֆորդ» մարզադաշտում խաղալուն և բոլոր երկրպագուներին նորից տեսնելուն: Ես պատրաստվում եմ թիմին միանալ միջազգային խաղերից հետո, և հույս ունեմ, որ մենք հաջողված մրցաշրջան կունենանք»,- ասել է Ռոնալդուն:
«Մանչեսթեր Յունայթեդ»-ի գլխավոր մարզիչ Օլե Գունար Սուլշերն էլ ընդգծել է, որ բառեր չի գտնում Ռոնալդուին նկարագրելու համար: «Նա ոչ միայն հրաշալի խաղացող է, այլև հիանալի մարդ: Յուրահատուկ մարդ պետք է լինես այդքան երկար ժամանակ բարձր մակարդակով խաղալու ցանկություն և կարողություն ունենալու համար: Ես չեմ կասկածում, որ նա կշարունակի տպավորել բոլորիս, իսկ նրա փորձը շատ կարևոր կլինի երիտասարդ խաղացողների համար: Ռոնալդուի վերադարձը վկայում է այս ակումբի յուրահատուկ գրավչության մասին, և ես միայն ուրախ եմ, որ նա վերադառնում է այնտեղ, որտեղից ամեն ինչ սկսվել էր»,- նշել է Սուլշերը:
Ռոնալդուն «Մանչեսթեր Յունայթեդ»-ում խաղացել է 2003-2009 թվականներին, որտեղից 2009 թվականին տեղափոխվել է Մադրիդի «Ռեալ»: 2018 թվականին Ռոնալդուն «Ռեալ»-ից տեղափոխվել է «Յուվենթուս», իսկ 2021 թվականի օգոստոսի 27-ին «Մանչեսթեր Յունայթեդ»-ը հայտարարեց «Յուվենթուս»-ից Ռոնալդու տրանսֆերը ձեռք բերելու մասին:
