Վանաձորի թեթեւ աթլետիկայի մարզադպրոցում անցկացվեց հայ թեթեւաթլետ, Եվրոպայի ռեկորդակիր Ռոբերտ Էմմիյանի անվան արդեն ավանդական դարձած միջազգային մրցաշարի գավաթի խաղարկությունը:
Մրցաշարի պատվավոր հյուրերի թվում էին Լոռու մարզպետ Արամ Խաչատրյանը, Արցախի ԱԺ նախագահ Արթուր Թովմասյանը, Հայաստանի աթլետիկայի ֆեդերացիայի նախագահ Ռոբերտ Էմմիյանը, գլխավոր քարտուղար Նարինե Շահբազյանը, օլիմպիական չեմպիոն Իսրայել Միլիտոսյանը, օպերային տենոր Վանո Թադեոն, մարզային իշխանության եւ մարզաշխարհի ներկայացուցիչներ։
Մարզի ղեկավարը ողջույնի խոսքում շնորհավորեց ներկաներին մրցաշարի կայացման կապակցությամբ։ Ի նշան երախտագիտության եւ գնահատանքի` նա հուշանվեր հանձնեց անվանի մարզիկ Ռ. Էմմիյանին։ Միջոցառման մասնակիցներին իր շնորհակալական խոսքը հայտնեց նաեւ հեռացատկորդը՝ կարեւորելով մարզի ղեկավարի աջակցությունը մրցաշարի կայացման գործում եւ մրցաշարի հատուկ գավաթներ հանձնեց պատվավոր հյուրերին։
Հեռացատկի մրցանակների խաղարկությանը մասնակցեցին մարզիկներ Հայաստանից, Ֆրանսիայից, Բուլղարիայից, Ուկրաինայից եւ Հունաստանից։ Առաջին հորիզոնականը նվաճեց Ֆրանսիան ներկայացնող Ժյուլ Պոմերին՝ 7 մ 67 սմ արդյունքով, երկրորդ տեղը զբաղեցրեց Ուկրաինայի ներկայացուցիչ Անտոն Կոպիտկոն (7 մ 43 սմ), երրորդ տեղը՝ հայ աթլետ Գոռ Բեգլարյանը (7 մ 34 սմ)։
Գագիկ ԱՆՏՈՆՅԱՆ
Լոռի
