Երեւանի «Նարեկացի» արվեստի միությունում ցուցադրվեց «Ֆորտունա» Լոռու մարզային հեռուստաընկերությամբ հեռարձակվող՝ Իվան Անտոնյանի հեղինակային «Լոռու արվեստագետներ» ֆիլմաշարի «Գծանկարի վարպետը» ֆիլմը: Այն պատմում է Հայաստանի եւ ՌԴ նկարիչների միությունների անդամ, ՀՀ մշակույթի նախարարության Ոսկե մեդալակիր, Մարգահովիտի պատվավոր քաղաքացի, գեղանկարիչ Կառլեն Քոչինյանի արվեստի մասին: Ֆիլմը նկարահանվել է 2017 թ. Վանաձորում՝ վարպետի արվեստանոցում, տանը եւ Լոռու մարզի Հաղպատի վանական համալիրի տարածքում՝ «Մարգահովիտի Զորավիգ» թերթի գլխավոր խմբագիր Հովհաննես Սարդարյանի նախաձեռնությամբ: Ֆիլմի հեղինակն ու ռեժիսորն Իվան Անտոնյանն է: Ֆիլմում օգտագործվել են Դմիտրի Շոստակովիչի եւ Ռիչարդ Քլայդերմանի երաժշտությունները, արժեքավոր արխիվային կադրեր, նկարներ ու փաստաթղթեր՝ Կ. Քոչինյանի անձնական արխիվից:
ՀՀ ժողովրդական արտիստ, երգիչ Ռուբեն Մաթեւոսյանը, կարեւորելով նման հանդիպումները, իր խոսքում մասնավորապես ասաց. «Դիտել եմ Իվան Անտոնյանի գրեթե բոլոր ֆիլմերը. ամեն մեկը ուրույն պատմություն է: Թվում է՝ ասելու ոչինչ չկա, քանի որ ֆիլմում շատ մանրամասն ներկայացվեց գեղանկարչի գործունեությունը: Ուրախ եմ, որ իմ տարեկիցը գեղանկարչության ասպարեզում հասել է նման բարձունքի: Նկարիչն այն մարդն է, ով տեսնում է այն ամենը, ինչ մենք չենք տեսնում: Ավելին՝ տեսածն իր արվեստի միջոցով փոխադրում է կտավի վրա, որպեսզի մենք էլ կարողանանք տեսնել: Նկարչին դժվար է հասկանալ, որովհետեւ չի խոսում՝ նկարում է ու տալիս մեզ: Կառլեն Քոչինյանը երեւելի է, որովհետեւ նկարում է ոչ թե այն, ինչ բոլորս ենք տեսնում, այլ այն, ինչ կա իր աշխարհում, իսկ նկարչի աշխարհը շատ ավելի մեծ է, որովհետեւ ընդգրկում է ոչ միայն իր, այլեւ իր մեծ նախորդների ստեղծագործական աշխարհները, իսկ դրանք անչափելի հարստություններ են»:
Ծափերի ներքո բեմ հրավիրվեց գծանկարի վարպետը՝ Կ. Քոչինյանը: Գեղանկարիչն իր մտահոգությունը հայտնեց գեղագիտական չափանիշների նահանջի առիթով՝ ընդգծելով դպրոցներում, հատկապես մատաղ սերնդի հետ այդ ուղղությամբ տարվող աշխատանքի կարեւորությունը:
«Լոռու արվեստագետներ» ֆիլմաշարի ցանկացած ֆիլմի ցուցադրություն եւ միջոցառում այս դահլիճում ավարտվում է Ամենայն հայոց բանաստեղծի անմահ գործերից մեկի ասմունքով: Այս անգամ Ջիվան Սարգսյանն ասմունքեց Հովհաննես Թումանյանի «Հայրենիքիս հետ» բանաստեղծությունը:
