Մտավորականների անունից Վանաձորի ավագանուն էր դիմել Վանաձորի պատվավոր քաղաքացի Վանդոս Ղարագյոզյանը՝ Կիրովականի քաղգործկոմի նախկին նախագահ, Հայրենական մեծ պատերազմի վետերան, փոխգնդապետ Սարգիս Առաքելի Ամիրխանյանի հիշատակը նրա ապրած շենքի պատին հավերժացնող հուշաքար փակցնելու համաձայնություն ստանալու համար: Միաձայն որոշմամբ թույլտվությունը չուշացավ. Հայքի հրապարակում Տիգրան Մեծի 39 շենքի պատին էլ ճարտարապետ Էդիկ Լազարյանի նախագծով հուշատախտակը փակցվեց մեր անվանի քաղաքացու ծննդյան 111-ամյակի նախաշեմին:
Վ. Ղարագյոզյանը, ով խորհրդային տարիների քաղաքի վերջին քաղգործկոմի նախագահն էր, գիտեր, թե հայրենիքի զավակի ինչ երախտիքի համար է դիմել քաղաքի ավագանուն: Օրերս հուշատախտակի բացման հանդիսությանը նա ներկայացրեց վաստակաշատ մարդու, իր քաղաքը սիրող քաղաքացու կյանքն ու հայրենաշահ գործունեությունը:
Ծնվել է Իջեւանի շրջանի Սարիգյուղում: Գերազանցությամբ ավարտել է Երեւանի հայկական մանկավարժական ինստիտուտը։ Դիրեկտոր է աշխատել մեծն Թումանյանի ծննդավայր Դսեղի, Վանաձորի թիվ 6 դպրոցներում: 1941 թ. կամավոր մեկնել է ռազմաճակատ։ Մարտնչել է 47-րդ բանակի 236 դիվիզիայի գնդում՝ վաշտի, գումարտակի հրամանատար։ Աչքի է ընկել Ղրիմի ազատագրման մարտերում: Վիրավորվել է, ապաքինվելուց հետո վերստին նետվել մարտի՝ Ռումինիայում։ Առողջության պատճառով 1944 թ. զորացրվել է՝ փոխգնդապետի կոչումով։ Հայրենական պատերազմում ցուցաբերած արիության ու տոկունության համար Ս. Ամիրխանյանը պարգեւատրվել է Կարմիր դրոշի, Հայրենական պատերազմի 1-ին աստիճանի, Կարմիր աստղի շքանշաններով, մի շարք մեդալներով։ Զորացրվելուց հետո աշխատանքի է նշանակվել Կիրովականում՝ քաղսովետի գործկոմի նախագահ, ապա՝ նախագահի տեղակալ: Նրա ղեկավարած տարիներին էր, որ կառուցվեցին ու իրենց այսօրվա գեղեցիկ տեսքն ստացան քաղաքի գլխավոր պողոտան, Հայքի հրապարակը՝ իր հրաշալի շենքերով: Այդ շենքերը հրապարակի կազմում հիմա համարվում են հուշարձանախումբ: Կառուցվել է պատշաճ, գեղեցիկ, խնամքով: Նրա մարդկայնության մասին լեգենդներ են պատմում:
Գագիկ ԱՆՏՈՆՅԱՆ
Լոռի
