Վանաձորի Ստեփան Զորյանի տուն-թանգարանում նշվեց Հայաստանի գրողների եւ Ժուռնալիստների միությունների Լոռու մարզային բաժանմունքների նախագահ, «Լոռու մարզ» եւ «Երկունք» թերթերի գլխավոր խմբագիր, բանաստեղծ Մանվել Միկոյանի ծննդյան 60-ամյակը:
Միջոցառումը վարեց Վանաձորի պոեզիայի թատրոնի գեղարվեստական ղեկավար, դերասան, ասմունքող Ջիվան Սարգսյանը: Մ. Միկոյանի խոսքով գրված «Աշնան տերեւները» երգով միջոցառումը բացեց «Սուրբ Տիրամայր» երգչախմբի մեներգչուհի Անի Տիրացույանը:
«Դարերով գոյություն ունեցող թեմաներով՝ հայրենասիրություն, սեր… գրելը դժվար է: Դժվար է գրել նաեւ հրապարակախոսական թեմայով եւ ներկա ժամանակով: Միկոյանը կարողանում է: Նա պատկերային ինքնատիպ եւ նուրբ աշխարհ է բերում՝ հաճախ օտարոտի բառերով, բայց տեղին, հեգնական, հումորային շղարշով… երբեմն ճշմարտությունն ասում է ծանր բառերով»,- մասնավորապես ասաց Հայաստանի գրողների միության նախագահ, բանաստեղծ Էդվարդ Միլիտոնյանը` շեշտելով Մ. Միկոյանի արած գործերը թե՛ որպես ՀԳՄ մարզային բաժանմունքի նախագահ, թե՛ որպես թերթերի խմբագիր: Է. Միլիտոնյանը Մ. Միկոյանին հանձնեց ՀԳՄ «Գրական վաստակի համար» մեդալ եւ ժամացույց: Օրհնության եւ շնորհավորանքի խոսք ասաց Գուգարաց թեմի առաջնորդ, գերաշնորհ տեր Հովնան եպիսկոպոս Հակոբյանը: Բանաստեղծի ստեղծագործական կենսագրությունը ներկայացրեց պոեզիայի թատրոնի արտիստ Հրաչուհի Լոռեցյանը: Մ. Միկոյանի գործերից Պոեզիայի թատրոնի սաների ասմունքով ընդմիջվում էին ելույթները:
Ընթերցվեցին Լոռու մարզպետ Արամ Խաչատրյանի, Վանաձորի համայնքապետի պաշտոնակատար Վանիկ Օհանյանի շնորհավորագրերը: Ջերմ խոսքեր ասաց տուն-թանգարանի տնօրեն Լիլիթ Չոբանյանը՝ շնորհավորագիր եւ խորհրդանշական հուշանվեր հանձնելով նրան: Մ. Միկոյանի՝ վերջերս լույս տեսած «Լռության խոնավ աչքերը» գրքի մասին ծավալուն գրախոսական ներկայացրեց ՎՊՀ դասախոս, բանասիրական գիտությունների թեկնածու, դոցենտ Վալերի Փիլոյանը: Մ. Միկոյանի կերպարը կատակ-մանրապատումով ներկայացրեց ՀՀ մշակույթի վաստակավոր գործիչ, դրամատուրգ, երգիծաբան Սամվել Խալաթյանը: Չորս որդիների անունից խոսեց արձակագիր Արթուր Միկոյանը՝ գեղարվեստորեն ներկայացնելով հոր կերպարը: Աշուղ Շերամի եւ գուսան Սարգիս Զաքարյանի երգերի կատարումները հոբելյարին նվիրեց ՀՀ վաստակավոր արտիստ Ստեփան Դալլաքյանը:
Սրտառուչ խոսքեր ասացին «Վան Արյան» հրատարակչատան տնօրեն, արձակագիր Վիլյամ Պողոսյանը, բանաստեղծ, թարգմանիչ Խորեն Գասպարյանը, բանաստեղծուհի Լենա Անթառանյանը, գեղանկարիչ Փափագ Ալոյանը, բռնցքամարտի հանրահռչակ մարզիչ, գեղանկարիչ Վազգեն Բադալյանը:
