Պատմության հետագծով

-1735 թ. նոյեմբերի 23-ին ծնվել է Հովհաննես Աղազարի Լազարյանը՝ հայ ազգային ազատագրական շարժման գործիչ, Ռուսաստանի իսկական պետական խորհրդական, արդյունաբերող, կալվածատեր (մահ.՝ 1801 թ.)։

-1912 թ. նոյեմբերի 23-ին ծնվել է Նագուշ Հարությունյանը՝ հայ մեխանիկ, պետական-քաղաքական գործիչ, տեխնիկական գիտությունների դոկտոր (1949 թ.), պրոֆեսոր (1950 թ.), ՀԽՍՀ ԳԱ ակադեմիկոս (1950 թ.), ՀԽՍՀ գիտության վաստակավոր գործիչ (1962 թ.)։

-1920 թ. նոյեմբերի 23-ին Համո Օհանջանյանի ղեկավարած կառավարությունը հրաժարական տվեց։

-1923 թ. նոյեմբերի 23-ին ծնվել է Ռոզի Վարդը՝ ֆրանսահայ դերասանուհի (մահ.՝  2012 թ.)։

-1943 թ. նոյեմբերի 23-ին սկսվեց Կահիրեի կոնֆերանսը ԱՄՆ նախագահ Ռուզվելտի, Մեծ Բրիտանիայի վարչապետ Չերչիլի եւ չինացի գեներալիսիմուս Չան Կայշիի մասնակցությամբ։

-1998 թ. նոյեմբերի 23-ին մահացել է Կարպ Խաչվանքյանը՝ հայ դերասան, ռեժիսոր, ՀԽՍՀ ժողովրդական արտիստ (1957)։ Հատկապես հայտնի է կատակերգական ժանրում իր խաղացած դերերով։ 20-րդ դարի 2-րդ կեսի հայ բեմի ամենաճանաչված կատակերգակներից է։ Բեմական հմայքի, շեշտված անհատականության, ռիթմի, հումորի, երաժշտության նուրբ զգացողության շնորհիվ նույն հաջողությամբ կերտել է եւ՛ կատակերգական, եւ՛ երաժշտական կերպարներ։

-2001 թ. նոյեմբերի 23-ին Քրիստոնեությունը որպես պետական կրոն հռչակելու 1700-ամյակի հանդիսությունների շրջանակներում Երեւանում տեղի ունեցավ Անտոնիո Վիվալդիի «Տիգրան» օպերայի համերգային կատարումը։

-2004 թ. նոյեմբերի 23-ին թողարկվեց «World of Warcraft« համակարգչային խաղը։

-1933 թ. նոյեմբերի 23-ին ծնվել է Քշիշտոֆ Պենդերեցկին՝ լեհ կոմպոզիտոր, դիրիժոր։ «The Guardian»-ը նրան անվանել է լեհ ժամանակակից մեծագույն կոմպոզիտոր։ Նրա ամենահայտնի գործերից են Հոգեհանգստյան պատարագ Հիրոսիմայի զոհերի հիշատակին, Սբ. Ղուկասի չարչարանքները, Լեհական ռեքվիեմ, Անակլասիս ստեղծագործությունները։ Նա հեղինակել է չորս օպերա, ութ սիմֆոնիա եւ այլ նվագախմբային պիեսներ, բազում գործիքային կոնցերտներ, երգչախմբային ստեղծագործություններ՝ հիմնականում կրոնական տեքստերով, ինչպես նաեւ կամերային եւ գործիքային ստեղծագործություններ։

-1907 թ. նոյեմբերի 23-ին մահացել է Պերճ Պռոշյանը: Նա խոշոր ավանդ է ներդրել ազգային ռեալիզմի ձեւավորման ու զարգացման գործում։ Պատկերելով «գյուղացիական կյանքն իր ամբողջ մերկությամբ եւ ներկայացնելով «գյուղական մի ամբողջ ալբոմ»՝ նա կատարելագործել է հայ արձակի տիպականացման արվեստը եւ որակական նոր աստիճանի բարձրացրել ռեալիզմի գեղագիտությունը։ Պռոշյանի վեպերը հսկայական նյութ են տալիս 19-րդ դարի հայ գյուղացիության մասին եւ որպես անկրկնելի վավերագրեր այսօր էլ պահպանում են իրենց ճանաչողական ու գեղարվեստական արժեքը։

-1931 թ. նոյեմբերի 23-ին մահացել է Բաբկեն Գաբրիելյանը՝ հայ դերասան։

-1941 թ. նոյեմբերի 23-ին մահացել է Վռամ Կոստանյանը՝ հայ տնտեսագետ, պրոֆեսոր (1935)։