Քսաներկու տարի առաջ առաջին անգամ «Ինտերկապ» բարեգործական կենտրոնի նախաձեռնությամբ ու հովանավորությամբ, Լոռու մարզպետարանի համատեղ որոշմամբ «Լոռու Ասպետ» կոչման եւ պատվո նշանի արժանացան արժանավոր այն լոռեցիները, ովքեր տարբեր բնագավառներում փառք ու պատիվ են բերել Լոռվա աշխարհին ու հայրենիքին, նաեւ՝ օտարերկրացի այն գործարարները, ովքեր բարեգործական լուրջ ծրագրեր են իրագործել հատկապես Լոռիում:
Մինչ այժմ Ասպետի կոչման արժանացել են 27 անձինք, նրանց թվում այնպիսի անհատներ, ինչպես՝ Օլիմպիական խաղերի բազմակի չեմպիոն Ալբերտ Ազարյանը, գեներալ-լեյտենանտ Միքայել Գրիգորյանը, անվանի խաչքարագործ, ժողովրդական վարպետ Սերգեյ Դանիելյանը, բռնցքամարտի բացարձակ աստղեր Վախթանգ Դարչինյանը եւ Սամսոն Խաչատրյանը, ստորջրյա լողի աշխարհի բազմակի չեմպիոն, գավաթակիր եւ ռեկորդակիր Շավարշ Կարապետյանը, ՀՀ եւ ԽՍՀՄ ժողովրդական արտիստ Սոս Սարգսյանը, Օլիմպիական խաղերի արծաթե մեդալակիր Ստեփան Սարգսյանը, բանաստեղծ Հրաչյա Սարուխանը, ՀՀ ժողովրդական արտիստ, ՌԴ արվեստի վաստակավոր գործիչ Արտավազդ Փելեշյանը:
Երախտավորների այս փաղանգը օրերս համալրվեց եւս չորս անունով: Լոռու մարզպետ Արամ Խաչատրյանը եւ «Ինտերկապ» ԲԿ-ի նախագահ Նորայր Զուլոյանը Լոռու մի խումբ Ասպետների եւ հյուրերի ներկայությամբ, այդ առիթով կազմակերպված հանդիսությանը պատիվ ունեցան ավետելու նորընտիր Ասպետների անունները: Նրանք են՝
Ըմբշամարտի ասպարեզում երկարամյա մարզչական աշխատանքի, օլիմպիական առաջին բարձունքը նվաճող ըմբիշ պատրաստելու համար՝ Հակոբ Գենջյանը,
Թատերարվեստում երկարամյա նշանակալի ավանդի, Վանաձորի տիկնիկային թատրոնի հիմնադրման եւ մատաղ սերնդի գեղագիտական դաստիարակության համար՝ Սերգեյ Մելիքյանը,
Հայ գրականության եւ լրագրության բնագավառներում ունեցած ակնառու ձեռքբերումների եւ ավանդի համար՝ բանաստեղծ Մանվել Միկոյանը,
Հայ եւ համաշխարհային ծանրամարտի պատմությանը նվիրված ծանրակշիռ աշխատություններ հեղինակելու եւ մանկավարժական բեղուն գործունեության համար՝ Վանդոս Ղարագյոզյանը:
Ներկաներից շատերն իրենց ջերմ ելույթներով շնորհավորեցին նորընծա Ասպետներին, մաղթեցին՝ շարունակել մնալ Ասպետ, ինչպես որ եղել են: Բոլորի համար անակնկալ ելույթ ունեցավ նաեւ Ասպետ, ՀՀ վաստակավոր մարզիչ Գուրգեն Գեւորգյանը եւ առաջարկեց առաջիկայում Ասպետի կոչման արժանացնել նաեւ բազմաթիվ բարերարություններով աչքի ընկած «Ինտերկապի» տնօրեն Նորայր Զուլոյանին: Ներկա բոլոր Ասպետները միահամուռ հավանության արժանացրին Գ. Գեւորգյանի առաջարկությունը, իսկ երբ Ն. Զուլոյանը փորձեց հրաժարվել դրանից, ըմբոստացան՝ հայտարարելով, թե այդ դեպքում Ասպետի կոչումից իրենք կհրաժարվեն:
Ներկաներին տեղեկացվեց, որ միջոցառման օրը համընկնում է Առաքելոց վանքի հերոսական պաշտպանության օրվա հետ: Այն բոցավառ օրերից անցել է ուղիղ 120 տարի: Միասին այցելեցին Զորավար Անդրանիկի հիշատակը հավերժացնող հուշակոթող եւ ծաղկեպսակ դրեցին, ծաղիկներ խոնարհեցին մեծն Զորավարի հիշատակին:
Գագիկ ԱՆՏՈՆՅԱՆ
Լոռի
