Տնային ճնճղուկ՝ ճնճղուկազգիների ընտանիքի իսկական ճնճղուկների ցեղի ամենատարածված տեսակը։ Սա մարդկանց տների հարեւանությամբ ապրող ամենահայտնի թռչուններից է (այստեղից էլ բխում է տեսակի անվանումը՝ «տնային»)։ Ճնճղուկներին հեշտությամբ կարելի է ճանաչել ինչպես արտաքին տեսքից, այնպես էլ նրանց առանձնահատուկ ծլվլոցից։
Արուն տարբերվում է էգից նրանով, որ ունի կզակը, վիզն ու կրծքի մեծ մասն ընդգրկող սեւ մեծ հետք, ինչպես նաեւ մուգ մոխրագույն (այլ ոչ թե մուգ դարչնագույն) գլուխ։ Էգի գլուխն ու վիզը մոխրագույն են, իսկ աչքի վերեւում բաց մոխրագույն-դեղնավուն գիծ կա։
Նախկինում տնային ճնճղուկի բնակության տարածքը սահմանափակվում էր Հյուսիսային Եվրոպայով։ Հետագայում լայն տարածում գտավ Եվրոպայում եւ Ասիայում (բացառությամբ Արկտիկայի, Հյուսիսարեւելյան, Հարավարեւելյան եւ Կենտրոնական Ասիայի տարածքների), ինչպես նաեւ Հյուսիսային եւ Հարավային Աֆրիկայում, Սենեգալում, Փոքր Ասիայում, Արաբական թերակղզում եւ Ճավա կղզում։
Սկսած 20-րդ դարից` ճնճղուկները տարվել են տարբեր երկրներ, այնտեղ լայն տարածում ստացել եւ ներկայումս, բացի վերը թվարկված վայրերից, բնակվում են նաեւ Հարավային Աֆրիկայում, Ավստրալիայում, Նոր Զելանդիայում, Հարավային եւ Հյուսիսային Ամերիկայում եւ բազմաթիվ կղզիներում։
Տնային ճնճղուկները գրեթե ամենուրեք համարվում են մշտաբնակ թռչուններ, միայն ծայր հյուսիսային մասերից ձմռանը չվում են հարավ (մինչեւ 1000 կմ), իսկ Միջին Ասիայից թռչում են Առաջավոր Ասիա եւ Հնդկաստան։
Հետեւելով մարդկային բնակությանը՝ հասել են հեռավոր հյուսիս՝ իրենց ոչ բնորոշ անտառատունդրա եւ նույնիսկ տունդրա՝ մինչեւ Մուրմանսկի մարզ, Պեչորայի գետաբերան, Յակուտիայի հյուսիս։
