Կամերտոն (գերմ. Kammerton), երկմատնյակ, ձայնի աղբյուր։
1711 թ. Անգլիայի թագուհու պալատական շեփորահար Ջոն Շորը ստեղծեց բոլոր երաժիշտների համար անհրաժեշտ և պարզ գործիք, որը նման է երկաթե պատառաքաղի՝ երկու ատամիկներով։ Այդ ,պատառաքաղնե անվանեցին կամերտոն։ Եթե հպվեն կամերտոնին, նրա ծայրերը կսկսեն արձակել հնչյուն, որը ծառայում է որպես հիմք երաժշտական գործիքները լարելու համար։ Կամերտոնը 1 վայրկյանում տալիս է 419 տատանում։ Հնչյունը, որը տալիս է կամերտոնը, որոշեցին համապատասխանեցնել ,լաե նոտային, որից և լարում են բոլոր երաժշտական գործիքները։ Հաճախ լարային գործիքները, հատկապես՝ ջութակը, կախված ջերմաստիճանից, փոխում են լարվածությունը, այդ իսկ պատճառով նրանք պիտի լարեն լարերը, և այստեղ կամերտոնն անփոխարինելի է։ Ժամանակակից կամերտոնը տալիս է 440 Հց 1 օկտավա հաճախականությամբ։
Ս-աձև մետաղե ձող է, ամրացվում է այնպես, որ ծայրերը (ոտնակները) ազատ տատանվեն։ Կամերտոնի առավել ինտենսիվ տատանումները տեղի են ունենում ոտնակներով անցնող հարթության մեջ։ Ձայնի ճառագայթումն ուժեղացնելու նպատակով ոտնակին երբեմն դիաֆրագմա են ամրացնում կամ կամերտոնը զուգակցում ռեզոնանսային արկղիկի (մի կողմից բաց, հիմնականում փայտե ուղղանկյուն արկղիկ, որի վրա տեղավորում են կամերտոնը) հետ։ Վերջինիս չափերն այնպես են ընտրում, որ նրանում պարփակված օդի ծավալի սեփական տատանումների հաճախականությունը համընկնի կամերտոնի տատանումների հաճախականությանը։ Երաժշտության մեջ կամերտոնը ծառայում է ձայնի բարձրության չափօրինակ՝ երաժշտական գործիքները լարելիս և երգեցողության համար։
