Ամազոն՝ գետ Հարավային Ամերիկայում, աշխարհի ամենամեծ ավազան ունեցող գետն է։ Ըստ որոշ հաշվարկների՝ համարվում է ամենաերկարն աշխարհում։
Շուրջ մեկ դար Ամազոնի ամենահեռավոր ակունքը համարվում էր Ապուրիմաք գետի՝ Նեւադո Միսիմոյում գտնվող ակունքը, սակայն 2014 թ. իրականացված հետազոտությունների արդյունքում պարզվել է, որ ամենահեռավորը Մոնտարո վտակի՝ Պերուում՝ Կորդիլիերա Ռումի Կրուսում գտնվող ակունքն է։
Ունենալով վայրկյանում մոտավորապես 209.000 խմ ջրի միջին ծախս՝ Ամազոնն ավելի ջրառատ է, քան երկարության եւ ջրառատության ցուցանիշներով իրեն հաջորդող յոթ գետերը՝ միասին վերցրած։ Նրա կողմից օվկիանոս հասցված ջրի քանակությունը կազմում է միասին վերցրած բոլոր գետերի ընդհանուր ջրահոսքի 20 տոկոսը։ Ամազոնի ավազանը ամենաընդարձակ ջրահավաք ավազանն է աշխարհում եւ զբաղեցնում է 7.050.000 ք/կմ մակերեսով տարածք։ Այդ տարածքի հենց միայն Բրազիլիայում գտնվող հատվածը ավելի մեծ է, քան ցանկացած մեկ այլ գետի ամբողջ ջրահավաք ավազանի մակերեսը։ Ամազոնը Բրազիլիա է մուտք գործում իր ընդհանուր հոսքի ընդամենը մեկ հինգերորդ մասով, բայց արդեն իսկ այդ պահին ավելի ջրառատ է, քան աշխարհի մեկ այլ գետ՝ իր ողջ ջրահոսքով հանդերձ։
