Նախօրեին հանրապետության կրթօջախների քննական կենտրոններում կայացել են առաջին քննությունները: Մայրաքաղաքի թիվ 2 եւ թիվ 6 հիմնական դպրոցներում ստեղծված քննական կենտրոններում մեկնարկած միասնական քննություններին շրջանավարտներն իրենց «ուժերը չափել են» «Կենսաբանություն» եւ «Աշխարհագրություն» առարկաներից:
Քննություններին հայտագրվել էին համապատասխանաբար 103 եւ 8 դիմորդ: Վաղ առավոտյան քննական կենտրոններում էին ԿԳՄՍ նախարարի տեղակալներ Հասմիկ Մինասյանը, Միքայել Համբարձումյանը, ԱՀ ԳԹԿ տնօրեն Յուրի Քարամյանը: Ընթացակարգին ներկա էին նաեւ դպրոցներից եւ ԳԹԿ-ից ներգրավված կազմակերպիչներն ու ներկայացուցիչները: ԱՀ ԿԳՄՍ նախարար Անահիտ Հակոբյանը հաջողություններ մաղթեց դիմորդներին՝ համոզմունք հայտնելով, որ նրանք ուսման ընթացքում ձեռք բերած գիտելիքները կկարողանան լիարժեք օգտագործել քննությունների ժամանակ:
Յու. Քարամյանը տեղեկացրեց, որ կենսաբանության քննությունից բացակայում է երկու դիմորդ: Պարզվեց, որ մեկը զորացրված զինվոր է եւ հրաժարվել էր ներկայանալ, մյուսը դիրքում գտնվող զինծառայող, ով չէր կարող թողնել հերթապահությունը: Նրանք հնարավորություն ունեն քննությունների հիմնական փուլից հետո լրացուցիչ հայտագրվել եւ հետագայում քննություններ հանձնել:
Հատկանշական է, որ կենսաբանությունից քննություն հանձնող դիմորդների գրեթե կեսը «Բուժական գործ» մասնագիտություն է ընտրել, մի մասը ԱրՊՀ քիմկենսաբանությունը: Շրջանավարտների մի մասը նախընտրել է Շուշիի տեխնոլոգիական համալսարանի ագրարային բաժինը: Այս տարի, ի դեպ, առաջին անգամ են հոգեբանի մասնագիտություն ընտրածները կենսաբանությունից միասնական քննություն հանձնում:
Քննությունից գրեթե մեկ ժամ անց դիմորդներն սկսեցին «լքել» լսարանը: Ստեփանակերտի թիվ 11 դպրոցի շրջանավարտ, «Բուժական գործ» մասնագիտությունն ընտրած Իգոր Կարապետյանը, ում Արցախում ճանաչում են թաեքվոնդո մարզաձեւում ունեցած հաջողություններով, Արցախի եւ ՀՀ բազմակի չեմպիոն է, միջազգային մրցաշարերի մրցանակակիր, քննություն էր հանձնել «Կենսաբանություն» առարկայից: Զրույցի ժամանակ ասաց, որ լավ է գրել եւ, հավանաբար, բարձր գնահատական կստանա. «Միշտ երազել եմ բժիշկ դառնալ: Բայց դա ամենեւին էլ չի նշանակում, թե սպորտը կթողնեմ: Կշարունակեմ իմ նախընտրած մարզաձեւով պարապել եւ մասնակցել տարբեր մրցաշարերի: Ցանկալի է, որ բժիշկը միշտ լինի մարզական վիճակում»:
ԳԹԿ տնօրենը տեղեկացրեց, որ քննությունների ավարտից մեկուկես ժամ անց atc.am կայքում կտեղադրվեն ճիշտ պատասխանները, եւ դիմորդները հնարավորություն կունենան համեմատել իրենց աշխատանքի արդյունքները: Նա միաժամանակ հավելեց, թե «գնահատականները պաշտոնապես կհրապարակվեն 5-րդ օրը»:
