Ռուսաստանի Դաշնության ԱԳՆ-ն իր կողմից հավատարմագրված արտասահմանյան լրագրողներին Ռուսաստանի այս կամ այն տարածաշրջանին ծանոթացնելու բարի ավանդույթ ունի: Այս դեպքում խոսքը վերաբերում է երկրի հյուսիս-արեւմուտքում գտնվող Վոլոգդայի մարզին, որը Ռուսաստանի Դաշնության ամենազարգացած, դոնոր մարզերից է եւ «կյանքի որակ» կոչվող չափանիշով զբաղեցնում է 16-րդ տեղը (ՌԴ-ն ունի 85 վարչական միավոր):
Արդյունաբերության առաջատար ճյուղերն են մեքենաշինությունը եւ մետաղամշակությունը, որի առաջատարը պողպատաձուլական գիգանտ «Սեւերստալն» է: «Սեւերնի կոմունար» գործարանն արտադրում է փայտամշակման հաստոցներ, փայտասղոցման շրջանակներ, ավտոփայտատարներ։ Կան լոկոմոտիվավագոնանորոգման, վերանորոգման մեխանիկական, առանցքակալների, յուղագործական, լիկյորի-օղու, գարեջրի գործարաններ, մսի, կաթի կոմբինատներ, դեղագործական ֆաբրիկաներ, թեթեւ արդյունաբերության եւ շինանյութերի ձեռնարկություններ։ Հատկապես բարձր է գնահատվում Վոլոգդայի կարագը: Վոլոգդայի մարզում է Եվրոպայում ֆոսֆորական պարարտանյութեր արտադրող խոշորագույն ձեռնարկությունը՝ «Ֆոս Ագրո» բաժնետիրական ընկերությունը: Զարգացած է ժանյակի արտադրությունը։ Դեռեւս 7 տարի առաջ ՌԴ Վոլոգդայի մարզի եւ Հայաստանի Արմավիրի մարզի միջեւ սկսված համագործակցությունը նոր հեռանկարներ բացեց հայ եւ ռուս գործարարների առջեւ: Որ արդյունքները որոշակիորեն տեսանելի են՝ հաստատում է Վոլոգդայի նահանգապետ Օլեգ Կուվշիննիկովը. «Հայաստանից մեզ մատակարարվում են հյութեր, պահածոներ, բանջարեղեն, իսկ Վոլոգդայից Արմավիրի մարզ են մատակարարվել հանքային պարարտանյութեր, մետաղական եւ փայտյա իրեր: Մենք պատրաստ ենք համագործակցելու եւ ավելացնելու առեւտրաշրջանառության ծավալը»:
2017 թ. Օլեգ Կուվշիննիկովը Արմավիր էր այցելել 40 հոգուց բաղկացած պատվիրակությամբ, որտեղ մեծամասամբ ներկայացված էին գործարարներ, այդ թվում՝ հայ, կառավարության ներկայացուցիչներ: Այդ այցի ընթացքում Արմավիրի մարզպետի հետ նրանք կնքեցին 2018-2021 թթ. համագործակցության նոր ծրագիր, որով փաստորեն ընդլայնվեց ապրանքափոխադրումների ծավալը: Պատվիրակությունը այն ժամանակ ծանոթացավ Արարատյան դաշտում արտադրվող տեսականուն: Նահանգապետը տվեց իր գնահատականը՝ հիանալի է. «Ինձ շատ դուր են գալիս հայկական կոնյակն ու չորացրած մրգերը: Այն ապրանքները, որոնք մեզ մոտ ներմուծվում են Եվրոպայից, ուրիշ որակի են: Հայաստանում այն իսկական է, լցված արեւով»: Օլեգ Կուվշիննիկովն ասաց, որ իրենց մարզում ապրում է շուրջ 2.5 հազար հայ: Մարզում հայերն ունեն մշակութային կենտրոն, տեղադրել են խաչքար, աշխատում եւ ապրում են զարգացնելով երկրի տնտեսությունը: Նշենք, որ վերջին տարիների իրադարձությունները որոշակիորեն թուլացրեցին այս կապերը, սակայն այսօր էլ նահանգապետ Կուվշիննիկովը ապակենտրոնացված համագործակցության զարգացման անհրաժեշտության հարցում նույն կարծիքին է եւ ընդգծում է, որ արդյունավետ միջտարածաշրջանային կապերը երկարաժամկետ ամուր համագործակցության լավագույն գրավականն են, եւ կարեւորում է այդ կապերի խորացման ուղղությամբ հետեւողական աշխատանքը: Ռուսաստանի դեմ կիրառվող աննախադեպ պատժամիջոցների պայմաններում Հայաստան-Ռուսաստան միջպետական եւ Հայաստանի մարզեր-Ռուսաստանի տարածաշրջաններ միջտնտեսական կապերը ձեռք են բերում նոր կարեւորություն:
Սարգիս ՍԱՐԳՍՅԱՆ
«ՀՀ» թղթակից, Մոսկվա
