Վերջին շրջանում «Ղարաբաղ Տելեկոմի» բաժանորդները հաճախ են դժգոհում բջջային կապից եւ ինտերնետից: Երբեմն ժամերով անհասանելի է մնում բաժանորդը կամ զանգից հետո տեւական լռություն է տիրում: Անգամ Ստեփանակերտում, քաղաքամերձ բնակավայրերում անհնար է օգտվել եւ գոհ մնալ շարժական համացանցից: Էլ չենք խոսում սահմանամերձ գյուղերում կապի անհասանելիության ծայրահեղ վիճակի մասին: Մինչդեռ բաժանորդները երկար տարիներ օգտվել են այդ ընկերության մատուցած ծառայություններից ու երբեւէ նման արգելափակման «չեն դատապարտվել»: Նույնիսկ արցախյան 44-օրյա պատերազմի օրերին, երբ թշնամու կողմից հրետակոծության հետեւանքով որոշ կայաններ վնասվել էին, թեկուզեւ ընդհատումներով, մարդիկ կարողանում էին բջջայինով հաղորդակցվել միմյանց հետ: Իսկ հիմա ապարդյուն է որեւէ համարով զանգել, որեւէ արձագանք ակնկալել: Եվ օրեցօր ավելի է աճում մարդկանց դժգոհությունը «Ղարաբաղ Տելեկոմից»:
Թե ինչ հանգամանքներ են խոչընդոտում լիարժեք կապի վերահաստատման համար, եւ բաժանորդների վստահությունը վերականգնելուն միտված ինչպիսի քայլեր են ձեռնարկվում, այս եւ մյուս հարցերի շուրջ պարզաբանումներ ստանալու նպատակով Ստեփանակերտում մեր թղթակիցը հանդիպել եւ զրուցել է ընկերության տնօրեն Մխիթար Միրզոյանի հետ:
-Պարոն Միրզոյան, որպես «Ղարաբաղ Տելեկոմի» գործադիր տնօրեն, ինչպե՞ս կգնահատեք Ձեր գլխավորած ընկերության աշխատանքը: Արդյոք, բնակչությանը մատուցվող կապի որակը համապատասխանո՞ւմ է ժամանակակից պահանջներին:
-Կարծում եմ, որ ես չպիտի գնահատական տամ մեր կոլեկտիվի գործունեությանը: Ինչպես ասում են՝ գլխավոր «դատավորը» ժողովուրդն է: Գիտեմ, որ վերջերս բաժանորդների շրջանում դժգոհություններ կան՝ բջջայինի եւ ինտերնետ կապի անհասանելիության վերաբերյալ: Սակայն հավատացնում եմ, որ մենք պակաս մտահոգված չենք խնդրով եւ կառավարության աջակցությամբ վճռական քայլեր ենք ձեռնարկում իրավիճակն արագ շտկելու, բաժանորդների վստահությունը վերականգնելու համար: Ինչ վերաբերում է մատուցվող կապի ծառայության որակին, ապա գաղտնիք չէ, որ համակարգը շարունակ արդիականացման պահանջ ունի եւ նույնիսկ ամենազարգացած երկրում այդ գործընթացը շարունակական բնույթ է կրում: Մեզ մոտ եւս բջջային եւ ինտերնետ կապի արդիականացումն ու վերազինումը գերխնդիր է մնում, եւ այդ ուղղությամբ իրականացվող քայլերը, վստահ եմ, շուտով կգոհացնեն մեր բաժանորդներին:
-Դուք կիսո՞ւմ եք բաժանորդների այն կարծիքը, որ գործունեության շուրջ 25 տարիների ընթացքում Արցախում բջջային կապի միակ օպերատոր «Ղարաբաղ Տելեկոմի» նկատմամբ դժգոհության նման «ալիք» առաջին անգամ է արձանագրվում, չհաշված՝ գանձվող գումարների դիմաց անհամեմատ բարձր սակագնի առկայությունը:
-Մասամբ համաձայն եմ այն դժգոհությունների հետ, որոնք առնչվում են բջջայինի եւ շարժական ինտերնետի խաթարմանը: Բայց վստահեցնում եմ, որ այստեղ ավելի լուրջ եւ մտահոգող գործոններով է պայմանավորված հասանելիության խաթարումը: Հակառակորդը գործի է դնում բոլոր այն հնարավար միջոցները, որոնք կարող են վնաս հասցնել Արցախի տնտեսությանը եւ ենթակառուցվածքներին: Կապի համակարգն այդ տեսակետից բացառություն չէ, թշնամին ամեն կերպ փորձում է խաթարել մեր բնականոն գործունեությունը եւ խուճապ առաջացնել բնակչության շրջանում: Այդ նպատակով դիմում է ցանկացած արկածախնդրության: Ասվածի վառ օրինակը հակառակորդի կողմից բջջայինի խլացմանը եւ բաժանորդի անհասանելիությանն ուղղված թշնամական գործողություններն են, որոնք դատապարտված են ձախողման: Կրկնում եմ, այդ խոչընդոտը շուտով կվերացվի, եւ բաժանորդներն անպայման կզգան ընկերության կողմից ձեռնարկվող քայլերի արդյունավետությունը: Ժամանակակից գերհզոր սարքավորումների տեղադրումը համակարգում մեզ հնարավորություն կտա ունենալ միանգամայն արդիականացված ու վստահելի կապի միջոցներ, որոնք անվտանգության տեսանկյունից ապահովագրված կլինեն արգելափակման ցանկացած փորձից:
-Կա՞ն կապի ծառայության որակի «անկման» այլ պատճառներ, որոնց վերացման եւ կրած կորուստների վերականգնման համար ընկերությունը պատասխանատվության իր բաժինն ունի եւ փորձում է շտկել իրավիճակը:
-Գաղտնիք չէ, որ արցախյան 44-օրյա պատերազմի հետեւանքով, ի թիվս հարյուրավոր կառույցների, տուժել է մեր համակարգը: Ռազմագործողությունների հետեւանքով հակառակորդի վերահսկողության տակ են անցել մի շարք կայաններ, որոնց սարքավորումների արժեքը բավականին մեծ է: Հրետակոծություններից քիչ չեն տուժել նաեւ Մարտակերտի, Մարտունու եւ Ասկերանի շրջաններում տեղադրված ենթակայանները: Հիշյալ բնակավայրերի միջեւ կապը վերականգնելու համար, բնականաբար, անհրաժեշտ եղավ նոր ներդրումներ կատարել՝ արտերկրից ներկրելով ժամանակակից սարքավորումներ: Նոր կայաններ են տեղադրվել նաեւ Մարտակերտում, Սարուշենում, Վարդաձորում… Այդ գործընթացը այսօր էլ շարունակվում է:
-Պարոն Միրզոյան, Դուք Ձեր խոսքում մասնակի անդրադարձաք ներդրումների «հոսքի» ավելացմանը: Այդ ուղղությամբ ընկերությունն ի՞նչ նախագծեր է իրականացնում: Կա՞ն կոնկրետ ծրագրեր, որոնց իրագործումը կխթաներ համակարգի լիարժեք գործունեության վերականգնումը:
-Դա անխուսափելի է: Հետպատերազմյան ժամանակաշրջանում «Ղարաբաղ Տելեկոմ» ՓԲ ընկերությունում կատարվել են շուրջ 10 մլն ԱՄՆ դոլարի ներդրումներ, ինչի շնորհիվ պատերազմից հետո գրեթե քայքայված համակարգի ենթակառուցվածքներն այսօր ամբողջությամբ վերականգնված են: Արցախում շուրջ 90 տոկոս ծածկույթով գործարկվել է 4 G ցանցը: Նոր ներդրումների շնորհիվ առաջընթաց է արձանագրվել նաեւ օպտիկական GPON ցանցի միջոցով տրամադրվող ֆիքսված ծառայություններում: Գրեթե երկու անգամ ավելացվել է թողունակությունը: Միաժամանակ ընդլայնվել է ֆիքսված ցանցի ծածկույթը Ստեփանակերտ քաղաքի այն բնակիչների համար, ովքեր ապրում են առանձնատներում: Հանրապետության շրջաններում բաժանորդներին հնարավորություն է ընձեռվել օգտվել GPON ցանցից: Ներդրումների շնորհիվ անհամեմատ բարելավվել է նաեւ շարժական 3 G ցանցը: Մի շարք սահմանամերձ բնակավայրերում տեղադրվել են համապատասխան սարքավորումներ: Հաջորդ փուլով նախատեսվում է 4 G ծածկույթով ապահովել բնակչության 100 տոկոսը, ինչպես նաեւ հիմնական մայրուղիները, առանձնապես՝ Ստեփանակերտը շրջկենտրոնների եւ Հայաստանի Հանրապետության հետ կապող ճանապարհները: Հատկանշական է, որ այդ աշխատանքները հիմնականում իրականացվում են վերապատրաստման դասընթացներ անցած մեր մասնագետների կողմից: Մեր նպատակն է ամեն կերպ բարձրացնել հասանելիության աստիճանը եւ վերականգնել «Ղարաբաղ Տելեկոմի» նկատմամբ բաժանորդների վստահությունը:
