Բեմ՝ թատրոնի խաղավայրը, ուր կատարվում է թատերական գործողությունը։ Բեմը խորանարդ կառուցվածքով կառույց է, որի դահլիճահայաց կողմը բաց է։ Ըստ բարձրության՝ ուղղահայաց, եւ ըստ խորքի՝ հորիզոնական գծերով բեմը բաժանվում է երեքական հիմնական մասերի։
Ըստ բարձրության՝ ներքնաբեմ, խաղահարթակ, վերնաբեմ։ Ներքնաբեմը խաղահարթակի նկուղային մասն է, ուր տեղադրվում են զանազան սարքավորումներ եւ հարմարանքներ։ Խաղահարթակը (բեմահարթակ) այն մասն է, որի վրա ընթանում է ներկայացումը։ Խաղահարթակը երբեմն ունենում է բեմի բոլորակ (պտտվող սկավառակ), ինչպես նաեւ մտոցներ (լյուկ)։ Վերնաբեմ է կոչվում բեմի դահլիճահայաց կողմից վերեւ ընկած հատվածը, ուր գտնվում են դեկորները բարձրացնող եւ իջեցնող հարմարանքները՝ դեկորակալները, լուսավորության սարքավորումները եւ այլն։
Ըստ խորքի, հորիզոնական գծով եւս բեմը բաժանվում է 3 մասի՝ նախաբեմ, միջնաբեմ, ետնաբեմ։ Նախաբեմը (ավանսցեն) խաղահարթակի այն մասն է, որ գրավում է մինչեւ հիմնական վարագույրը (կարմիր գիծը) ընկած տարածությունը։ Նախաբեմի եզրին տեղադրվում է ներկայացումը ներքեւի կողմից լուսավորող էլեկտրասարքը (ռամպա)։ Միջնաբեմը խաղահարթակի միջին մասն է, ուր հիմնականում ընթանում է ներկայացումը։ Ետնաբեմը սովորաբար օգտագործվում է նկարչական ձեւավորման, մարդաշատ տեսարաններ ստեղծելու նպատակով։ Ետնաբեմի այն հատվածները, որոնք տեսանելի չեն հանդիսատեսին, ծառայում են ընթացիկ ներկայացման դեկորները պահելու, հերթական պատկերները ձեւավորելու նպատակներին:
