Բրեմենի ռատուշա՝ գոթական նշանավոր կառույց Գերմանիայի Բրեմեն քաղաքում, այսպես կոչված «վեզերյան վերածննդի» (Վեզեր գետի անունից) ամենավառ օրինակներից մեկը։ 2004 թ. հուլիսին քաղաքի մեկ այլ խորհրդանիշի՝ Ռոլանդի արձանի հետ ընդգրկվել է ՅՈՒՆԵՍԿՕ-ի Համաշխարհային ժառանգության ցանկում։ Ռատուշայի շենքը Սենատի նստավայրն է. այստեղ են Սենատի նախագահի եւ հանզայական ազատ քաղաք Բրեմենի բուրգոմիստրի (քաղաքապետ) աշխատասենյակները։
Բրեմենի ռատուշան Հին քաղաքի կենտրոնում է։ Նրա դիմաց է Շյութինգը, իսկ անմիջապես շենքի առաջ Ռոլանդի արձանն է։ Ռատուշայի աջ կողմում են տեղակայված Բրեմենի տաճարը, Բիսմարկի արձանը եւ քաղաքային խորհրդարանի ժամանակակից շենքը։ Ռատուշայի ձախ կողմում Սուրբ Մարիամ Աստվածածնի եկեղեցին է։ Կառույցի արեւմտյան պատի մոտ տեղադրված է Գերհարդ Մարքսի հեղինակած Բրեմենյան երաժիշտների քանդակը։
