Լոնխա դե լա Սեդա՝ համալիր Իսպանիայի Վալենսիա քաղաքում։ Կառուցված է վալենսիական գոթական ոճով։ Քաղաքի հիմնական զբոսաշրջային կենտրոններից է։
Լոնխան կառուցվել է 1482-1548 թթ. ընկած ժամանակահատվածում։ Բաղկացած է երեք մասից։ Հիմնական սրահը՝ Sala de Contratacion-ը, ընդարձակ տարածք է, որը զարդարված է շքեղ ոլորավուն սյուներով։ Սա Լոնխայի ֆինանսական կենտրոնն էր, որտեղ առեւտրականները կնքում էին պայմանագրեր։ Կողային կառույցը կոչվում է հյուպատոսության տաղավար, իսկ դա եղել է տրիբունալ դել Մարի նստավայրը՝ Իսպանիայում ձեւավորված առաջին ծովային առեւտրական տրիբունալը։ Առաջին երկու հարկերը հիմնական ֆունկցիոնալ սենյակներն էին, որոնց առաստաղը հարուստ զարդարված է։ Այս կառույցներում դեռեւս պահպանվում է յուրօրինակ կահավորանքը։ Եթե առեւտրականները չէին վճարում իրենց պարտքերը, տրիբունալը նրանց ձերբակալում էր կենտրոնական աշտարակում՝ Լոնխայի երրորդ կառույցում։
Ներկայիս շենքի ետեւում կար 14-րդ դարի կառույց, որը կոչվում է Llotja de l’Oli։ Այն նախատեսված էր ոչ միայն գյուղատնտեսական յուղերի առեւտրի, այլեւ բոլոր տեսակի գործարքների համար։ Վալենսիայի առեւտրական բարգավաճումն իր գագաթնակետին հասավ 15-րդ դարում, ինչը հանգեցրեց նոր շենքի կառուցմանը։ Նրա դիզայնը վերցված է Պալմա դե Մալյորկայի նմանօրինակ Լոնխայից, որի ճարտարապետն էր Գուիլեմ Սագրերան։ Վալենսիայի Լոնխայի ճարտարապետը Պերե Կոմպտեն էր, որը կառուցեց շինության հիմնական հատվածը՝ Առեւտրի սրահը, որը նաեւ անվանում են «Սյուների դահլիճ»։ Մյուս շինություններն ավելացվել են մինչեւ 1548 թ.։
1996 թ. ՅՈՒՆԵՍԿՕ-ն ներառել է Լոնխա դե լա Սեդան Համաշխարհային ժառանգության օբյեկտների ցանկում՝ որպես գոթական ճարտարապետության ցայտուն օրինակ, որը խորհրդանշում է միջերկրածովյան առեւտրական քաղաքների հզորությունն ու հարստությունը։
