Տալլինի մայր տաճար՝ լյութերական եկեղեցի Տալլինի Հին քաղաքում։ Նվիրված է սուրբ կույս Մարիամին։ Մայր տաճարը Տալլինի ամենահին եկեղեցիներից է։ Ներկայիս տեսքն ստացել է բազմաթիվ վերափոխումներից հետո։ Սկզբում նրա տեղում եղել է փայտե եկեղեցի. պատմագիրների տեղեկությունների համաձայն՝ այն կառուցվել է 1219 թ.։
Տաճարի աշտարակը վերաբերում է բարոկկոյի դարաշրջանին, իսկ նրա մատուռն ավելի ուշ ժամանակաշրջանի ճարտարապետական ոճով է կառուցված։ Տաճարի ներսում պահպանվել են 13-19-րդ դարերի տապանաքարեր՝ նվիրված այդ ժամանակի հայտնի մարդկանց։ Տաճարն առաջին անգամ հիշատակվել է 1233 թ.՝ կապված այն իրադարձությունների հետ, որոնք Հռոմի պապին ուղղված բողոքում «Արյունոտ բաղնիք» անունով են հիշատակվել. Քրիստոսի միաբանության եղբայրները, սպանելով դանիացիներին, նրանց դիակները հավաքել են եկեղեցու խորանի առաջ։ Տաճարը կառուցվել է 13-րդ դարի սկզբին եւ օծվել 1240 թ. որպես Հյուսիսային Էստոնիայի հռոմեա-կաթոլիկ մայր տաճար։
14-րդ դարում շինությունը վերակառուցվել է՝ ստանալով բազիլիկի տեսք։ 15-րդ դարի սկզբին վերջնականապես ավարտվել է նավերի ծածկումը։ 1561 թ. ռեֆորմացիայի արդյունքում այն դարձել է լյութերական տաճար։ 1684 թ. հրդեհի ժամանակ ոչնչացել է շինության հարդարանքի մեծ մասը, ինչպես նաեւ միջին նավի աշտարակը։ 1778-1779 թթ. ճարտարապետ Կ. Գեյստի նախագծով բարոկկո ոճով կառուցվել է արեւմտյան աշտարակը։ 1878 թ. տեղադրվել է ժամանակավոր երգեհոն, որը ստեղծվել է Բեռլինում վարպետ Ֆրիդրիխ Լադեգաստի կողմից։
