Պատմության հետագծով

 -1883 թ. դեկտեմբերի 9-ին ծնվել է Հակոբ Օշականը արեւմտահայ հայտնի գրող, ուսուցիչ եւ մանկավարժ (մահ.՝ 1948 թ.):

-1904 թ. դեկտեմբերի 9-ին ծնվել է Արուս Ասրյանը՝ հայ բեմի մեծանուն դերասանուհի, ՀԽՍՀ ժողովրդական արտիստուհի (1945), ԽՍՀՄ ժողովրդական արտիստուհի (1972)։

-1916 թ. դեկտեմբերի 9-ին ծնվել է Քըրք Դուգլասը՝ ամերիկացի հանրահայտ դերասան, հոլիվուդյան կենդանի լեգենդներից մեկը, ճանաչված դերասան Մայքլ Դուգլասի հայրը:

-1948 թ. դեկտեմբերի 9-ին ՄԱԿ-ի գլխավոր ժողովը վավերացրեց ցեղասպանության պայմանագիրը (կոնվենցիա)։

-1958 թ. դեկտեմբերի 9-ին մահացել է Լեւոն Օրբելին՝ հայ ֆիզիոլոգ, էվոլյուցիոն ֆիզիոլոգիայի ուսմունքի ստեղծողներից է։ ԽՍՀՄ ԳԱ (1935), ՀԽՍՀ ԳԱ (1943), ԽՍՀՄ ԲԳԱ (1944) ակադեմիկոս, ՌԽՖՍՀ գիտության վաստակավոր գործիչ (1934), Սոցիալիստական աշխատանքի հերոս (1945), բժշկական ծառայության գեներալ-գնդապետ (ծնվ.՝ 1882 թ.):

-1970 թ. դեկտեմբերի 9-ին մահացել է Արտեմ Միկոյանը՝ աշխարհահռչակ ավիակոնստրուկտոր, ինժեներատեխնիկական ծառայության գեներալ-գնդապետ, ՄԻԳ ռազմական օդանավերի ստեղծողը։

-1987 թ. դեկտեմբերի 9-ին ծնվել է Հիկարու Նակամուրան՝ ճապոնական արմատներով ամերիկացի շախմատիստ, գրոսմայստեր (2003):

-2010 թ. դեկտեմբերի 9-ին մահացել է Հերման Գոլցը՝ գերմանացի գիտնական, աստվածաբան։ Երկար տարիներ զբաղվել է Յոհաննես Լեփսիուսի դիվանի փաստաթղթերի համակարգմամբ, մշակմամբ եւ տպագրության նախապատրաստմամբ։ Արխիվը, որը բովանդակում է մի քանի հազար փաստաթղթեր, այդ թվում եւ Լեփսիուսի անձնական ու պաշտոնական գրագրությունը, ներկայումս ավանդադրված է Մարտին Լյութերի (Հալլե-Վիտենբերգ) համալսարանում։ Արխիվային փաստաթղթերի շատ կրկնօրինակներ Գոլցը հանձնել է Հայաստանի գիտությունների ակադեմիայի արեւելագիտության ինստիտուտին։ Գոլցը համալսարանում ստեղծել է հայագիտական կաբինետ, հավաքել Հայաստանի պատմությանը, հայկական հարցին վերաբերող մեծ գրադարան, կատարվում է գիտահետազոտական աշխատանք (ծնվ.՝ 1946 թ.)։