ԽՍՀՄ երկրաբանության նախկին նախարար, քաղաքական ու հասարակական գործիչ, ակադեմիկոս Գրիգորի Գաբրիելյանցը, ով արցախյան առաջին պատերազմից հետո Մոսկվայից վերադարձել է նախնիների երկիր եւ բնակություն հաստատել Ստեփանակերտում, չնայած պատկառելի տարիքին (շուտով կբոլորի նրա ծննդյան 88-րդ տարին), շարունակում է զբաղվել ստեղծագործական ակտիվ գործունեությամբ, ժողովել իր հուշերը, անմիջական մասնակցություն ունենալ գիտնականների ու արվեստագետների կողմից կազմակերպվող միջոցառումներին, իր օգտակար խորհուրդներով աջակցել երիտասարդներին:
Գ. Գաբրիելյանցը, որ մի քանի տասնյակ գիտական հոդվածների եւ գրքերի (այդ թվում 4 դասագրքի) հեղինակ է, երկար ուսումնասիրությունների արդյունքում, վերջերս ընթերցողների սեղանին դրեց «Ղարաբաղ. պատմական դեպքերի ժամանակագրություն» ստվարածավալ իր նոր աշխատությունը, որտեղ պատմական փաստերի եւ իրողությունների գիտական մեկնաբանմամբ եւս մեկ անգամ ապացուցում է հայկական հողի վրա ապրելու ու արարելու, իր իրավունքների ու ազատության համար պայքարը շարունակող Արցախի ժողովրդի անկոտրում կամքի, զավակների արյամբ սրբացած երկիրը շենացնելու եւ այն հավերժ հայկական պահելու խիզախ որոշման մասին:
Գրքի շնորհանդեսին, որ կայացել էր Արցախի վերակառուցված պետական համալսարանի գիտական նիստերի դահլիճում, ներկա էին պաշտոնատար անձինք, գիտնականներ, քաղաքական եւ հասարակական կառույցների ներկայացուցիչներ, դասախոսներ ու ուսանողներ, ելույթ ունեցողները բարձր են գնահատել Գրիգորի Գաբրիելյանցի ծանրակշիռ վաստակը Արցախի հնօրյա եւ նորօրյա պատմության ուսումնասիրման, մնայուն արժեքների վերհանման, նոր թանգարանների ու ազգային պատկերասրահի ստեղծմանը միտված արգասաբեր աշխատանքի հայանպաստ նախաձեռնությունների իրագործման բնագավառում: Գիրքը հիմնված է պատմական իրադարձությունների ու փաստերի վրա, հեղինակի համար աղբյուր են դարձել անտիկ շրջանի պատմիչների ու ժամանակակից գիտնականների աշխատությունները:
Բուհի ռեկտոր Արմեն Սարգսյանը, կարեւորելով Գ. Գաբրիելյանցի ավանդը պետականաշինության, մասնավորապես՝ համալսարանի կայացման գործում, համոզմունք հայտնեց, որ նրա հեղինակած աշխատությունը կողմնորոշման առումով ուսումնասիրության լուրջ կռվան կդառնա ոչ միայն պատմաբանների, այլեւ ընդհանրապես գրական լայն շրջանակների համար, ովքեր հետաքրքրված են Արցախի անցյալով ու ներկայով: Պատմական գիտությունների դոկտոր, պրոֆեսոր Վահրամ Բալայանի կարծիքով՝ հաշվի առնելով թուրք եւ ադրբեջանցի գիտնականների կողմից Արցախի վերաբերյալ փաստերի ու իրողությունների դիտավորյալ խեղաթյուրման, երկրի տարածքների, մեր ժողովրդի պատմության յուրացման փորձերը, հեղինակի գիրքն առավել կողմնորոշիչ դեր կարող է ունենալ գիտական աշխարհում ու արժանի հակահարված տալ թշնամուն: Պատմաբան Լեռնիկ Հովհաննիսյանն էլ կարծում է, որ ռուսերեն հրատարակված աշխատությունը պետք է անպայման թարգմանվի ոչ միայն հայերեն, այլեւ անգլերեն, ֆրանսերեն եւ գերմաներեն, որպեսզի այն հասանելի լինի օտարալեզու ընթերցողին: Համակարծիք լինելով ելույթ ունեցողների հետ՝ բանասիրական գիտությունների դոկտոր, պրոֆեսոր Սոկրատ Խանյանն ընդգծեց, թե «Ղարաբաղ. պատմական դեպքերի ժամանակագրություն» գիրքը գալիս է համալրելու Արցախի մասին վերջին շրջանում գրված լավագույն աշխատությունների շարքը եւ ընդգծելու մեր ազգային դիմագիծը:
Շնորհակալություն հայտնելով գնահատանքի խոսքերի համար՝ գիտնականը նշեց, որ քաղաքական-հասարակական գործունեությանը զուգընթաց շարունակելու է զբաղվել գիտական աշխատանքով: «Այսօր անչափ կարեւոր է մեր ժողովրդի բարեկեցության, մեր ավերված տնտեսության ապաքինման, մշտական բնակավայրերից տեղահանված, զոհված եւ վիրավոր զինծառայողների ընտանիքների բնակարանային ու սոցիալական մյուս հարցերի լուծումը: Եվ մենք ոչ թե պիտի սպասենք, որ դրսից մեզ օգնելու են, այլ ինքներս պիտի ստեղծենք, արարենք ու վիրավոր երկիրը ոտքի կանգնեցնենք, ապահովենք սերունդների ապագան»,- նշեց գիտնականը՝ հավելելով, թե ձգտելու է այսուհետ եւս ուժերի ներածին չափով օգտակար լինել հայրենիքին, Արցախ աշխարհին:
