Այսօր արվեստների մայրաքաղաք Փարիզում, հանրահռչակ Լուվր թանգարանի Դյու Կարուսել սրահում ժամը 14:00-ին հանդիսավորությամբ կբացվի յուրօրինակ՝ «Մեկ աշխարհ, մեկ ապագա» (One world, one future) խորագրով նկարների ցուցահանդես, որտեղ աշխարհի տարբեր երկրների 100 երեխաների նկարների շարքում կցուցադրվեն նաեւ հայ երեք մանուկների երեք աշխատանքներ:
Ինչպես հաջողվեց, ով հնարավոր դարձրեց այդ հաջողությունը: Այս հարցերի շուրջ զրուցեցի չինական «Հարավարեւմտյան կրթական միություն» (UWEE) կազմակերպության հայաստանյան, ինչպես նաեւ Բրազիլիայի, Թաիլանդի, Վրաստանի ներկայացուցիչ, «Լեւոն-Վարդուհի-խոսք» (LVTALK) կազմակերպության նախագահ Լեւոն Սեխլեյանի հետ:
-Ինչպես հայտնի է, Չինաստանը ձգտում է վերականգնել Մետաքսի մեծ ճանապարհը,- ներկայացրեց նա:- Եվ խոչընդոտներն ու դժվարությունները հաղթահարելու խնդրում մեծ տեղ է հատկացնում կրթական ծրագրերին, արվեստի ու մշակույթի հանրահռչակմամբ՝ ժողովուրդների մերձեցմանը, նրանց միջեւ բարեկամական կապերի հաստատմանն ու ամրապնդմանը: Չինաստանի կառավարությունը խրախուսում է իր երկրի համալսարաններում ցանկացած ժողովրդի ներկայացուցիչների ուսանելը, աշխատելը: «UWEE»-ն իր առջեւ խնդիր ունի այդ նպատակների իրագործմանն աջակցելը: Մեզ էլ ընտրել են որպես իրենց աջակիցներ: «Մեկ աշխարհ, մեկ ապագա» փարիզյան ցուցահանդեսին մասնակցության համար հայտ ներկայացրեցին 5 հազարից ավելի երեխաներ աշխարհի տարբեր ծագերից: Հայաստանից՝ 15 հոգի: 5 հազար կտավներից հատուկ հանձնաժողովն ընտրեց ընդամենը 100 լավագույնները: Ցուցահանդեսին մեծ աջակցություն են ունեցել ՄԱԿ-ի Պարենի համաշխարհային ծրագրի պատասխանատուները, Ռուսաստանի «Ռիա նովոստի» լրատվական գործակալությունը, ֆրանսիական «Կարուսել» ընկերությունը: Նկարները հավաքվել են Բելառուսում եւ ինքնաթիռով տեղափոխվել Ֆրանսիա: Տեղեկացնենք նաեւ՝ նույն խորագրով ցուցահանդես է կազմակերպվում արդեն երկրորդ անգամ:
Ահա նրանք՝ ցուցահանդեսին մասնակցող հայ շնորհալիները.
Միքայել Մովսիսյան, Սյունիքի մարզ, քաղաք Սիսիան, սովորում է Երեւանի Մխիթար Սեբաստացի կրթահամալիրում, 8 տարեկան, նկարը՝ «Փրկենք երկիրը»:
Էլեն Պողոսյան, Երեւանի Դավիթաշենի թիվ 200 դպրոցի սան,14 տարեկան, նկարը՝ «Դու չգիտես, որ դա ճիշտ է, մինչեւ որ չլինի»:
Արփի Ամիրխանյան, Երեւանի թիվ 49 դպրոց, 7 տարեկան, նկարը՝ «Առանց ջուր կյանք չկա»:
Գագիկ ԱՆՏՈՆՅԱՆ
