-1922 թ. հունվարի 25-ին Երեւանում բացվեց Գաբրիել Սունդուկյանի անվան ակադեմիական թատրոնը։ Դերասանական խմբի հիմնական կազմն ընտրվել է Թբիլիսիի «Որոնումների» թատրոնից, հետագայում խումբը համալրվում է նոր դերասաններով։ Թատրոնի առաջին գեղարվեստական ղեկավարը եղել է ռեժիսոր Լեւոն Քալանթարը։ 1937 թ. թատրոնը կոչվում է հայ դրամատուրգ եւ արձակագիր Գաբրիել Սունդուկյանի անունով։ Թատրոնի հաջողությունները, հատկապես շեքսպիրյան ներկայացումները առիթ դարձան, որ ԽՍՀՄ-ում կազմակերպվող առաջին շեքսպիրյան փառատոնը եւ կոնֆերանսը անցկացվեն Երեւանում։
-1950 թ. հունվարի 25-ին ծնվել է Գուրգեն Խանջյանը՝ հայ արձակագիր, դրամատուրգ, թարգմանիչ։
-1971 թ. հունվարի 25-ին ծնվել է Արցախի հերոս Կարեն Ջալավյանը:
-1533 թ. հունվարի 25-ին Անգլիայի թագավոր Հենրի VIII-ն ու Աննա Բոլեյնը գաղտնի ամուսնացան։
-1736 թ. հունվարի 25-ին ծնվել է Ժոզեֆ Լուի Լագրանժը՝ ֆրանսիացի նշանավոր մաթեմատիկոս եւ մեխանիկ (մահ.՝ 1813 թ.)։
-1835 թ. հունվարի 25-ին տեղի ունեցավ Վինչենցո Բելլինիի «Պուրիտաններ» օպերայի առաջնախաղը։
-1858 թ. հունվարի 25-ին առաջին անգամ կատարվեց Ֆելիքս Մենդելսոնի հանրահայտ «Հարսանեկան քայլերգը»։
-1479 թ. հունվարի 25-ին ավարտվում է Վենետիկի եւ Օսմանյան կայսրության միջեւ 15 տարի տեւած պատերազմը:
-1554 թ. հունվարի 25-ին Բրազիլիայում Սուրբ Պողոսի օրը հիմնվում է Սան Պաուլու քաղաքը:
-1891 թ. հունվարի 25-ին ծնվել է Աշոտ Տեր-Մկրտչյանը՝ հայ խորհրդային մաթեմատիկոս, ինժեներ-մեխանիկ։ Պրոֆեսոր (1930), ՀԽՍՀ գիտության եւ տեխնիկայի վաստակավոր գործիչ (1940)։
-1901 թ. հունվարի 25-ին ծնվել է Սուրեն Չարեկյանը՝ հայ դիրիժոր, մանկավարժ։ ՀԽՍՀ ժողովրդական արտիստ (1956), Ուզբեկստանի արվեստի վաստակավոր գործիչ (1944)։ Պրոֆեսոր (1971):
-1910 թ. հունվարի 25-ին ծնվել է Գալուստ Խանենցը՝ պարսկահայ գրող (վախճ.՝ 1998 թ.)։ Գալուստ Խանենցը եղել է «Նոր էջ» գրական խմբակցության հիմնադիրներից: Այս խումբը 1935 թ. հրատարակեց իր առաջին հատորը «Նոր էջ» անունով՝ որպես «ժողովածու իրանահայ երիտասարդ գրողների»։
-1912 թ. հունվարի 25-ին ծնվել է Շավարշ Սիմոնյանը՝ հայ ակադեմիկոս (վախճ.՝ 1947 թ.):
