Արցախյան վերջին պատերազմից հետո Արցախի Քաշաթաղի շրջկենտրոն Բերձորի երկրագիտական թանգարանի հիմնական ցուցանմուշները տեղափոխվեցին Երեւան՝ Մատենադարան։ 2021 թ. դեկտեմբերին Բերձորի թանգարանի եւ «Էրեբունի» պատմահնագիտական արգելոց-թանգարանի միջեւ կնքվել է 1-ամյա պայմանագիր՝ համատեղ ցուցադրություններ կազմակերպելու նպատակով։ Օրերս Բերձորի թանգարանային հնագիտական 112 ցուցանմուշ, որոնք պահվում էին Մատենադարանում, տեղափոխվել են «Էրեբունի» թանգարան, որտեղ մայիսին կբացվի ցուցահանդեսը։
Ներկա էի տեղափոխմանը եւ զրուցեցի Բերձորի թանգարանի տնօրեն Լիլիթ Քոչարյանի հետ։ Նա ասաց. «Այս ընթացքում նախ պետք է պատրաստենք նյութերը, տեխնիկական հարցերը կարգավորենք, մի տարի աշխատելու ենք «Էրեբունի» թանգարանի հետ, այնուհետեւ, եթե լինի տարբերակ, կշարունակենք մեր համագործակցությունը, պայմանագիրը կերկարաձգենք, եւ մնացած ցուցանմուշները, որոնք դեռ չեն ցուցադրվել, անպայման կցուցադրենք։ Այս ցուցադրությանը ներկայացվող ցուցանմուշները մեր թանգարանի միայն մեկ չորրորդ մասն են։ Այս ամբողջ ընթացքում մեր կողքին են եղել բարի մարդիկ, ովքեր օգնել են գտնելու նոր տարածքներ եւ համագործակցություններ։ Առաջինը մեր կողքին է եւ շարունակում է մեզ աջակցել «Էրեբունի» պատմահնագիտական արգելոց-թանգարանը (Միքայել Բադալյան)։ Ամռանը մեր թանգարանի որոշ ցուցանմուշներ ներկայացվեցին Երեւանի Թումանյանի թանգարանում։ Թանգարանի տնօրեն Անի Եղիազարյանը սիրով տարածք հատկացրեց։ Հետագայում ծրագրում ենք համագործակցել այլ թանգարանների հետ եւս։ Այս տարվա հունիսին նախատեսում ենք ունենալ ցուցադրություն Երեւանի ժողովրդական արվեստի թանգարանի ազգագրության բաժնի հետ։ Երեւանի «Սարգիս Մուրադյան» պատկերասրահի տնօրեն Զարուհի Մուրադյանի հետ պայմանավորվել ենք գեղանկարները ցուցադրելու համար։ Նշեմ՝ Բերձորի թանգարանում ցուցադրվում էին նաեւ Սարգիս Մուրադյանի կտավներից, որոնք նույնպես ուզում ենք ցուցադրել»։
Այնուհետեւ Լ. Քոչարյանն ասաց. «Եթե տարբերակ լինի, ապա մեր ամբողջ ցուցանմուշները ցանկանում ենք տեղափոխել Արցախ՝ Բերձոր՝ իրենց հիմնական հանգրվան։ 2022-23 թթ. կան ծրագրեր, որ ցուցանմուշների մնացած մասն էլ ցուցադրվեն, ունենք ազգագրական մեծ հավաքածու, գեղանկարների հսկայական հավաքածու, որտեղ հիմնականում արցախցի նկարիչների գործեր են, ունենք նաեւ սփյուրքահայ նկարիչների աշխատանքներ»։
«Էրեբունի» պատմահնագիտական արգելոց-թանգարանի փոխտնօրեն Վահե Սարգսյանը շեշտեց՝ յուրաքանչյուրը պետք է գիտակցի, որ Արցախը, Արցախի թանգարանները մեր մի մասն են, եւ հավելեց, որ ուրախ է նման համագործակցության համար։
Անահիտ ԸՌՔՈՅԱՆ
