Եռամարտիկ, աշխարհի եւ Եվրոպայի եռակի չեմպիոն, համաշխարհային քառակի ռեկորդակիր, ԱԻՆ Վանաձորի թիվ 2 հրշեջ փրկարարական ջոկատի փրկարար Զորիկ Պողոսյանն արժանացել է միջազգային կարգի սպորտի վարպետի կոչման: Օրերս պարգեւատրման հանդիսավոր արարողությունն էր: Վկայականը ԿԳՄՍ նախարարի անունից մարզիկին հանձնեց փոխնախարար Կարեն Գիլոյանը:
Այս նոր հաջողությունը Զորիկի համար 3-րդ եւ ամենամեծ ձեռքբերումն է Դյուցազնագրքի ռեկորդ սահմանելուց եւ Հայաստանի սպորտի վարպետի կոչումը նվաճելուց հետո: Նա միջազգային կարգի սպորտի վարպետի նորման լրացրել է ծանրամարտի Եվրոպայի առաջնությունում՝ 69 կգ քաշայինների պայքարում ցուցաբերելով երկամարտի 300 կգ արդյունք: Մարզական մեկը մյուսին հաջորդող ձեռքբերումները, ինչ խոսք, մարզիկի անխոնջ աշխատանքի, երկարատեւ տքնաջան մարզումների եւ բարձր պատասխանատվության արդյունք են, մեծ է նաեւ մարզչի` Զորիկի հոր` Կարեն Պողոսյանի ներդրումը: Նշենք, որ Զորիկը 2018 թ. Թբիլիսիում կայացած ուժային եռամարտի Եվրոպայի առաջնությունում դարձել է բացարձակ չեմպիոն։ 2019 թ. Ուկրաինայի Լուցկ քաղաքում կայացած աշխարհի առաջնությունում 607 կգ արդյունքով դարձել է աշխարհի բացարձակ չեմպիոն։ Նույն տարում IPSU վարկածով դարձել է աշխարհի կրկնակի չեմպիոն 90 կգ քաշային կարգում՝ 610 կգ եռամարտի արդյունքով։ 2019 թ. դարձել է ուժային եռամարտի Եվրոպայի կրկնակի չեմպիոն։
2020 թ. սահմանել է Դյուցազնագրքի ռեկորդ. 200 կգ ծանրաձողն ուսերին կատարել է կքանիստ վարժությունը՝ այս դիրքում պահելով 40 վայրկյան։ 2021 թ. մայիսին սահմանել է համաշխարհային ռեկորդ. 205 կգ ծանրաձողը նստած վիճակում պահել է 15 վայրկյան, ապա ծանրաձողն ուսին եւս 3 անգամ կքանստել է ու բարձրացել։ Մի քանի րոպե անց գերազանցել է իր ռեկորդը՝ վարժությունը կրկնելով 210 կգ ծանրաձողով եւ 5 կքանստումով ու բարձրանալով։ Նույն տարում դարձել է Եվրոպայի եռակի չեմպիոն եւ ռեկորդակիր։ Հայրենասեր դյուցազնը հաղթանակները նվիրել է արցախյան երկրորդ պատերազմում զոհված մարտիկների, ընկերների հիշատակին:
2021 թ. Զորիկի համար նոր նվաճումների տարի եղավ: Օգոստոսին սահմանեց համաշխարհային եւ Գինեսի եռակի ռեկորդ. 200 կգ ծանրաձողն ուսերին նստած դիրքով պահել է 7 վայրկյան, ապա բարձրացել՝ 10 անգամ կքանստելով եւ բարձրանալով։ Նշանավոր էր հոկտեմբերի 8-ը. այդ օրը Զորիկ Պողոսյանը սահմանեց Դյուցազնագրքի եւ համաշխարհային նոր ռեկորդ՝ շրջանցելով թուրք մարզիկներից մեկի՝ մինչ այդ սահմանած ռեկորդը։ Նա 170 կգ ծանրաձողը ուսերին նստած դիրքով քայլելով 2 մետր՝ կարողացել է բարձրանալ եւ 9 անգամ կքանստել ու բարձրանալ՝ այդ կերպ սահմանելով համաշխարհային նոր ռեկորդ։ Այդ ռեկորդն էլ նվիրել է իր սան, հեռանկարային ծանրամարտիկ, ավաղ, արցախյան 44-օրյա պատերազմի վերջին օրերին զոհված հերոս Մհեր Քոչինյանի եւ բոլոր քաջորդիների հիշատակին:
Գագիկ ԱՆՏՈՆՅԱՆ
Լոռի
