Այս տարվա հունվարի 25-ից Երեւանի Հովհաննես Թումանյանի թանգարանն արդեն ունի արեւային համակարգով էլեկտրասնուցում: Փետրվարի 18-ին՝ Ամենայն հայոց բանաստեղծի ծննդյան 153-ամյակի նախօրեին, թանգարանում տեղի ունեցավ մշակութային այս օջախի արեւային ՖՎ կայանի գործարկման մեկնարկի պաշտոնական արարողությունը, որին ներկա էին նաեւ ՀՀ կառավարության, Երեւանի քաղաքապետարանի ներկայացուցիչներ, հյուրեր:
Մինչ հանդիսավոր մասն սկսելը՝ թանգարանի տնօրեն Անի Եղիազարյանը շնորհակալություն հայտնեց աջակիցներին՝ կարեւորելով ձեռնարկը, որով հնարավոր կլինի ֆինանսական միջոցներ խնայել: Այնուհետեւ կայացավ հուշացուցանակի բացում: «Էներգետիկայի հայկական գործակալություն» հիմնադրամի ներկայացուցիչ, այս ծրագրի ղեկավար Սաթենիկ Պալյանցը ներկայացրեց ծրագիրը:
Ծրագրով Հովհ. Թումանյանի թանգարանի տանիքին տեղադրվեց 20.08 կՎտ դրվածքային հզորությամբ արեւային ֆոտովոլտային համակարգ, որի գործարկման արդյունքում թանգարանն այսուհետ կխնայի էլեկտրաէներգիայի համար նախատեսված տարեկան ողջ ֆինանսական միջոցները՝ ուղղելով դրանք այլ կարեւոր խնդիրների լուծմանը։ Կողմերի որոշմամբ խնայված միջոցներով կիրագործվի մեկ այլ երկարաժամկետ նախագիծ՝ «Հովհ. Թումանյանի անձնական գրադարանի թվայնացում եւ էլեկտրոնային գրադարանի ստեղծում» ծրագիրը:
Բոլոր ելույթ ունեցողներն էլ կարեւորեցին միջոցառումը՝ նշելով, որ պետք է մեծ ուշադրություն դարձվի հայ մշակույթի զարգացմանը: Այնուհետեւ կնքեցին եռակողմ հուշագիր: Ապա Ա. Եղիազարյանը Հովհաննես Թումանյանի 150-ամյակի հուշամեդալներ նվիրեց աջակիցներին: «Էներգետիկայի հայկական գործակալություն» հիմնադրամի գլխավոր տնօրենն իր կողմից շնորհակալագրեր հանձնեց ծրագրի կատարման մասնակիցներին՝ այդ թվում՝ «Հայաստանի էլեկտրական ցանցեր» ՓԲԸ-ին ծրագրի իրականացմանն աջակցելու ու անհրաժեշտ պայմաններ ստեղծելու, «Օպտիմում Էներջի» ընկերությանը՝ արեւային ՖՎ կայանի կառուցման համար։
