Միջազգայնագետ, Ամերիկյան հետազոտությունների հայկական կենտրոնի նախագահ Սուրեն Սարգսյանի «Հայաստանն ու Բուշն անձամբ» գրքի շնորհանդեսի առթիվ կազմակերպված միջոցառմանը ներկա էին ԱՄՆ-ում ՀՀ արտակարգ եւ լիազոր նախկին դեսպան Գրիգոր Հովհաննիսյանը, ՀՀ առաջին արտաքին գործերի նախարար Րաֆֆի Հովհաննիսյանը, «Newmag» հրատարակչության գլխավոր խմբագիր Գնել Նալբանդյանը եւ այլք:
Գիրքը ներկայացնում է Հայաստանի հանդեպ ԱՄՆ նախագահ Ջորջ Բուշ Ավագի վարած քաղաքականության, բացառիկ փաստաթղթերի հիման վրա հայ-ամերիկյան փոխշփումների բնույթը, գաղտնազերծված փաստաթղթեր, որոնք պարզաբանում են ԱՄՆ-ի կենսաշահը հայ-թուրքական հարաբերություններում ու արցախյան հիմնախնդրի կարգավորման համատեքստում: Բացի վերոնշյալ բնույթի փաստաթղթերը ներկայացնելուց, գիրքը բացառիկ է այն իմաստով նաեւ, որ բաց ներկայացվում են տխրահռչակ «Գոբլի պլանի» եւ 907-րդ բանաձեւի վերաբերյալ մանրամասներ, ինչպես նաեւ ամերիկացի դիվանագետների գաղտնի զեկույցներն ու Վաշինգտոնից ստացված հրահանգները:
Հեղինակի խոսքով` գիրքը պլանավորված չէր. հետազոտություններ, գիտական հոդվածներ էր գրում, ԱՄՆ-ի ամենատարբեր պետական արխիվներից հանված փաստաթղթեր էր ուսումնասիրում ու գաղտնազերծում, որոնք վերջում դարձան գիրք: Գրքի վրա աշխատել է մոտ երկու-երեք տարի, բայց փաստաթղթերի ուսումնասիրությունն սկսել է շատ ավելի վաղ:
Գիրքն ընդգծված արդիականություն ունի այն իմաստով, որ ԱՄՆ-ի արտաքին քաղաքականությունը հայ-թուրքական հարաբերությունների կարգավորման տեսանկյունից չի փոխվել, մոտեցումներն ու սկզբունքները նույնն են: Ինչպես Բուշի վարչակազմի, այնպես էլ ներկայիս իշխանությունների համար հայ-թուրքական հարաբերությունները շարունակում են մնալ առաջնահերթություն:
Այն հարցին, թե հեղինակի կանխատեսմամբ գիրքն ինչ արձագանք կգտնի ԱՄՆ-ում, հնչեց հետեւյալ պատասխանը. «Կարծում եմ, այդուհանդերձ, արձագանքներ կլինեն, քանի որ Բուշի արտաքին քաղաքականությանը վերաբերող որեւէ աշխատություն չկա Հայաստանում ոչ գրքի տեսքով, ոչ էլ, առավել եւս, հայերենով»:
