-1867 թ. մարտի 1-ին ծնվել է Նար-Դոսը՝ գրող (մահ.՝ 1933 թ.)։ Ստեղծագործական կյանքը սկսվել է XIX դարի 80-ական թվականներին։ Սկզբում գրել է բանաստեղծություններ, որոնցից մի քանիսը 1883-1888 թթ. լույս են տեսել «Արաքս» հանդեսում եւ «Սոխակ Հայաստանի» ժողովածուում, ապա՝ պատմվածքներ («Նեղ օրերից մեկը», «Ես եւ նա»), ֆելիետոններ։ Ուժերը փորձել է նաեւ դրամատիկական ժանրում՝ «Մայինի գանգատը» (չի պահպանվել), «Մեղր եւ ճանճեր» (1886), «Եղբայր» (1887) պիեսները։ 1886-ից գրել է վեպեր, վիպակներ։ Միխո-Օհան ստորագրությամբ «Նոր դար» թերթում հրատարակվել է նրա «Ճշմարիտ բարեկամը», որին հաջորդել են «Նունե» (1887), «Բարերար եւ որդեգիր» (1888) վիպակները, «Քնքուշ լարեր» (1887), «Զազունյան» (1890) վեպերը։ Սրանց մեջ Նար-Դոսը առաջադրել է իր բարոյական տեսակետը, ներկայացրել է մարդկանց, որոնք հասարակական պարտքը կատարելու գիտակցությամբ զոհում են իրենց անձնականը։ Այստեղ գրողի նախասիրությունը քաղաքային կյանքն է։ Խավարի ու թշնամության միջավայրում մեծ չարիք են գործում սնահավատությունը, տգիտությունը («Սաքուլն ուխտ գնաց», 1889, «Ինչպես բժշկեցին», 1889), վայրագությունն ու կոպտությունը, հարբեցողությունը։ Հեղինակը պատկերում է երեխաների, որոնք մանկություն չունեն, կանանց, որոնց բաժին են ընկել հանապազօրյա հացի հոգսը, ծանր աշխատանքը։ Յուրաքանչյուր պատմվածք մի իսկական դրամա է։ Այդ շրջանի գործերից է «Աննա Սարոյան» վիպակը։ Երկում պատկերված է ընտանիք, որի անդամները տան գլխավորի՝ հոր, սնանկանալուց ու մահից հետո չեն դիմանում կյանքի փորձություններին եւ, ի վերջո, կործանվում են։ Վիպակի հերոսուհին՝ Աննան, արտահայտում է սոցիալական մի ամբողջ խավի ողբերգությունը։
-1901 թ. մարտի 1-ին ծնվել է Սարմենը՝ բանաստեղծ (մահ.՝ 1984 թ.):
-1934 թ. մարտի 1-ին մահացել է Թորոս Թորամանյանը՝ հայ նշանավոր ճարտարապետ (ծնվ.՝ 1864 թ.):
-1995 թ. մարտի 1-ին Հայաստանում սկսվում է պետական ունեցվածքի մասնավորեցման գործընթացը։
-1565 թ. մարտի 1-ին հիմնադրվել է Ռիո դե Ժանեյրո քաղաքը:
-1803 թ. մարտի 1-ին Օհայոն դառնում է ԱՄՆ 17-րդ նահանգը:
-1810 թ. մարտի 1-ին Ալեքսանդր կայսեր հրամանագրով Աբխազիան միացվում է Ռուսաստանին:
-1815 թ. մարտի 1-ին Նապոլեոնը վերադառնում է Ֆրանսիա՝ Էլբայում տասն ամիս տեւած աքսորից հետո:
-1947 թ. մարտի 1-ին Արժույթի միջազգային հիմնադրամն սկսում է իր ֆինանսական գործառույթները:
-1992 թ. մարտի 1-ին Բոսնիա եւ Հերցեգովինան իրեն անկախ է հայտարարում Հարավսլավիայից։
-1998 թ. մարտի 1-ին «Տիտանիկը» դառնում է մեկ միլիարդ դոլար հավաքած առաջին ֆիլմը աշխարհում։
-1445 թ. մարտի 1-ին ծնվել է Սանդրո Բոտիչելլին՝ վերածննդի իտալացի նկարիչ (մահ.՝ 1510 թ.):
-1810 թ. մարտի 1-ին ծնվել է Ֆրեդերիկ Շոպենը՝ լեհ նշանավոր կոմպոզիտոր (մահ.՝ 1849 թ.): Նա մեծ երաժիշտ եւ վիրտուոզ դաշնակահար էր, թեեւ չէր սիրում համերգներ տալ։ Շոպենը համարվում է «ռոմանտիկ երաժշտության» մեծագույն վարպետներից մեկը։ Հիմնականում գրել է դաշնամուրային ստեղծագործություններ. նրա մազուրկաները, պոլոնեզները, բալլադաները, վալսերը բոլորի կողմից ճանաչված գլուխգործոցներ են։ Շոպենի երաժշտության հրաշալի հատկություններից է նրա հասանելիությունը։ Այն կարծես հոսում է «սրտից դեպի սիրտ», օժտված է բացառիկ մեղեդայնության զգացումով։ Նրա երաժշտությունը բխում էր ինչպես գյուղական հին մեղեդիներից, այնպես էլ իր ժամանակակից քաղաքի երգից ու ռոմանսից։ Կոմպոզիտորի պարային ստեղծագործությունները՝ մազուրկաները, պոլոնեզները, վալսերը սերտ կապ ունեն ժողովրդական երաժշտության հետ։
-1980 թ. մարտի 1-ին ծնվել է Աննա Սեմենովիչը՝ ռուս գեղասահորդուհի եւ երգչուհի:
-1994 թ. մարտի 1-ին ծնվել է Ջասթին Բիբերը՝ կանադացի երգիչ:
