Հայրենի քաղաքական դաշտում ավելանում է առասպելաբանությունը, եւ արդեն հասել ենք … Էլդորադո: Էլդորադոն, ինչպես հայտնի է, ոսկու եւ թանկարժեք քարերի առասպելական երկիր է, ընդգծենք՝ առասպելական: Այն հայտնաբերելու բազմաթիվ փորձեր են եղել, որոնք այդպես էլ հաջողության չեն հասել, քանզի հնարավոր չէ գտնել այն, ինչը չկա:
Բայց մեր քաղաքական դաշտին դա բնավ չի խանգարում: Մեկը/ոմանք ջանք են թափում վստահեցնելու, որ վաղ թե ուշ Էլդորադո ենք դառնալու։ Մյուսի/մյուսների ջանքերը հակառակ ուղղությամբ են՝ ապացուցելու, թե ինչ էլ արվի, մենք Էլդորադո չենք դառնա։ Իրականում սա նշանակում է արհեստական բանավեճ չեղած բանի շուրջ։ Այն կարող է լինել ինչպես չիմացության հետեւանք, այնպես էլ միտումնավոր քայլ:
Քանի որ Էլդորադոն չկա եւ չի էլ եղել, հետեւաբար, ավելի լավ է՝ խոսել իրական երկրի եւ իրական արդյունքի մասին։ Հակառակը կստացվի «Ճանապարհ դեպի Էլդորադո» մուլտֆիլմի նման: Հերոսները՝ Տոլյոն ու Միգելը՝ երկու խարդախներ, գտնում են մի խորհրդավոր քարտեզ, որի վրա նշված է առասպելական Էլդորադոն՝ ոսկու եւ գանձերի քաղաքը: Նրանք ուղեւորվում են հեռավոր Ամերիկայի ափեր՝ գանձերը գտնելու… Թե ինչ է լինում վերջում, պատմելու կարիք չկա, որովհետեւ կստացվի, որ մենք նույնպես զբաղված ենք անգո Էլդորադոյի մասին առասպելաբանությամբ։
Հանուն ճշմարտության նշենք, որ Էլդորադո անունով բնակավայր, այդուհանդերձ, գոյություն ունի։ Այն Արգենտինայի Միսիոնես նահանգում է եւ բնավ էլ առասպելական գանձերով հարուստ չէ։ Այնտեղ ոսկու գետեր չեն հոսում եւ ադամանդի սարեր չկան։ Տնտեսությունը հիմնված է գյուղատնտեսության եւ զբոսաշրջության վրա: 2001 թ. տվյալներով այնտեղ բնակվում է 54189 մարդ։ Այդ Էլդորադոն հիմնվել է 1919 թ. սեպտեմբերի 29-ին՝ որպես գյուղական բնակավայր, ծագումով գերմանացի, բրիտանահպատակ Ադոլֆո Յուլիուս Շվելմի կողմից՝ առասպելական Էլ Դորադոյի անվամբ:
Քաղաքն ունի օդանավակայան, որտեղ կարելի է հասնել նաեւ Հայաստանից: Սակայն Հայաստանում Էլդորադոյի մասին խոսողներից որեւէ մեկը հաստատ չի եղել ո՛չ իրական Էլդորադոյում, ո՛չ էլ… առասպելականում: Չնայած՝ եթե խոսում են առասպելական, այսինքն՝ գոյություն չունեցող Էլդորադոյից, միգուցե նրանք եղե՞լ են այնտեղ…
Գագիկ ԿԱՐԱՊԵՏՅԱՆ
