Վերջերս Երեւանում կայացավ Հայաստանի այկիդո այկիկայ ֆեդերացիայի նախաձեռնած 15-րդ միջազգային սեմինարը։ Սեմինարին մասնակցում էին Ռուսաստանից, Ուկրաինայից, ժամանած ոլորտի փորձառու մասնագետներ: Այկիդոն ճապոնական մարտարվեստ է, որի հիմքում ընկած են հարյուրամյակների պատմություն ունեցող ճապոնական մարտար-վեստներն ու փիլիսոփայական ուսմունքները: Հայաստանում այկիդոն հիմնադրել է Արմեն Ավետիսյանը 2004 թ.: Այն շուրջ 19 տարի գործում եւ ընդլայնում է միջազգային կապերը՝ ավելի ճանաչելի դարձնելով Հայաստանի այկիդոյի որակն ու մակարդակը։
Հայաստանի այկիդո այկիկայ ֆեդերացիայի նախաձեռնած արդեն 15-րդ միջազգային սեմինարին մասնակցեցին 35 օտարերկրյա հյուրեր։ Սեմինարներն անցկացվել են արտերկրից ժամանած սենսեյներ Ռուդիկ Մանուկյանի (5-րդ դան), Դենիս Տուլչինսկու (6-րդ դան) եւ Հայաստանի այկիդո այկիկայ ֆեդերացիայի նախագահ Արմեն Ավետիսյանի (5-րդ դան) կողմից:
Հարկ է նշել, որ միջազգային սեմինարները հիանալի առիթ են այկիդոյի մարզիկների համար նոր հնարքներ բացահայտելու, հմտությունները կատարելագործելու ու նոր նշաձող սահմանելու համար: Այկիդոյում ձեւավորված մշակույթ է սեմինարների ընթացքում նաեւ փառատոների անցկացումը, որոնց շրջանակներում մասնակիցները ցուցադրում են իրենց վարպետությունը։ Ավանդույթը չխախտվեց նաեւ այս անգամ: Այկիդոյի միջազգային փառատոնին ելույթներ ունեցան Հայաստանի այկիդո այկիկայ ֆեդերացիայի սենսեյները, սաները եւ միջազգային սեմինարի հյուրերը։
Ստեփան ՊԱՊԻԿՅԱՆ
