Գործարար խրատանի

* «Երբ մարդը նախապես իր համար ինչ-որ վճիռ է կայացնում, պնդելով, թե դա լավագույնն է կամ միակը, ապա դրանով փակվում է հիմնախնդրի ստեղծագործական լուծման ճանապարհը: Կարող է պարզվել, որ լավագույն եղանակն ակնհայտ է, սակայն կանխակալ վերաբերմունքի պատճառով մարդը կա՛մ չի կարողանում տեսնել, կա՛մ, ինչն ավելի վատ է, դիտավորյալ անտեսում է ստեղծագործական այլընտրանքները» (Ջերարդ Նիրենբերգ):

* «Ինքն իրեն լրջորեն վերաբերվելը դեռ ոչ մեկի համար օգտակար չի եղել: Իմ տեսակետը հետեւյալն է՝ լրջորեն վերաբերվեք աշխատանքին եւ ոչ այդքան լրջորեն ինքներդ ձեզ: Սա լավ խորհուրդ է հրաշալի հանգստի եւ հաճելի հիշողությունների համար» (Դոնալդ Թրամպ):

* «Անկախ այն բանից, թե որ բնագավառում է գործում առաջնորդը, նա բախվելու է հիմնախնդիրների, որոնք անխուսափելի են հետեւյալ երեք պատճառով: Առաջին՝ մենք ապրում ենք մի աշխարհում, որին հատուկ են հարատեւ աճող բարդությունը եւ բազմազանությունը: Երկրորդ՝ մենք փոխհարաբերության մեջ ենք ամենատարբեր մարդկանց հետ: Երրորդ՝ մենք ի վիճակի չենք կառավարելու բոլոր այն իրավիճակները, որոնցում մեզ հարկ է լինում գործել» (Ջոն Մաքսվել):

* «Թեյլորը բնութագրում էր կառավարումը հետեւյալ բառերով՝ «պլանավորիր-արա-տես»: Ի՞նչ է նշանակում «տես»: Հասկանալու համար Թեյլորի միտքը՝ ձեւափոխենք նրա բանաձեւը հետեւյալ կերպ. «պլանավորիր-կատարիր-ստուգիր-ներազդիր»: Սա այն է, ինչը մենք անվանում ենք «կառավարման շրջան»: Կառավարումը հարկավոր է կազմակերպել միջոցառումների վեց համալիրի ձեւով. 1. Նպատակների եւ խնդիրների ճշտում: 2. Նպատակների իրականացման եղանակների ճշտում: 3. Կադրերի ուսուցում եւ պատրաստում: 4. Աշխատանքների կատարում: 5. Կատարման արդյունքների ստուգում: 6. Կառավարչական համապատասխան ներազդեցության իրականացում» (Քաորու Իշիկավա):

* «Երեւակայականի անհագ տենդագին հետապնդումն արժեզրկում է առկա իրո­ղությունը եւ հարկադրում անտեսել այն. հենց որ ձեռք է բեր­վում մոտակա նպատակը եւ նախկինում միայն ցանկալին ու հավանականը դառնում են կայացած փաստ, իսկույն նորա­նոր հնարավորու­թյունների անզուսպ կիրքը մղում է մարդուն ա­վելի ու ավելի առաջ» (Էմիլ Դյուրկհեյմ): 

* «Ոչ մի դեպքում հիմք մի տվեք ձեր ենթակային իրեն զգալու լոկ որպես «մեքենա», որից պահանջվում է առավելագույն հատույց: Ցույց տվեք նրան, որ ձեզ հավասարապես հետաքրքրում են ինչպես իր արտադրական հաջողությունները, այնպես էլ անհատական բարգավաճումը, իր ապագան, ընտանեկան կյանքը, հետաքրքրությունները եւ պահանջմունքները: Առանց ենթակայի հանդեպ նման հոգատարության դժվար է նրանից ակնկալել առավելագույն ջանքեր հանուն ձեր սեփական գործարար նպատակների իրականացման» (Հանս Ալթման):

* «Ապահովագոյն է, որ նոյնիսկ ամենաթեթեւ հարցերու մէջ՝ որոշումներդ ըլլան ծանրակշիռ. վա˜յ քեզի սակայն՝ որ միակ ծանրակշիռ հարցի մը մէջ ամենաթեթեւ որոշում կայացնելու չափ ըլլաս թեթեւամիտ» (Նարպէյ Քարաճեան):

* «Երբ ինձ մոտ է գալիս իմ աշխատակիցներից մեկը եւ մի նոր գաղափար առա­ջարկում, ապա ես խնդրում եմ դա շա­րա­դրել գրավոր: Ես չեմ ցանկանում, որ ինչ-որ գաղա­փար վզիս փաթաթեն՝ օգտվելով միայն հաճելի ձայնից կամ պատկա­ռելի տես­քից: Պարզապես նման բան չպետք է թույլ տաս…. Խոսակցության ըն­թաց­քում, հա­ճախ նույ­նիսկ ինքդ քեզ հա­շիվ չտալով, կարող է ամեն տեսակի խառնա­փնթոր ու ան­հե­թեթ գաղափարներ արտահայտես: Իսկ երբ մտքերդ շարա­դրում ես թղթի վրա, արդեն հար­կադրված ես լինում խո­րա­նալու մանրամասների մեջ: Ընդ ո­րում, այս պա­րագայում ար­դեն ավելի դժվար է ինքդ քեզ կամ մեկ ուրիշին մոլո­րեց­նե­լը» (Լի Յակոկկա):

Պատրաստել է Վ. ՄԻՐԶՈՅԱՆԸ