Անառարկելի ճշմարտություն է՝ երկարատեւ ու կայուն խաղաղություն ունենալու համար անհրաժեշտ է ունենալ հզոր բանակ եւ խելացի պաշտպանական համակարգ: Վերջին տարիների փորձը ցույց է տալիս, որ անհրաժեշտ է մեծ ուշադրություն դարձնել էներգետիկայի արդի տեխնոլոգիաների օգտագործմանը երկրի պաշտպանական ոլորտի հզորացման համար: Մասնավորապես, տարբեր նշանակության զորամասեր պետք է ունենան էներգիայի սնման ինքնուրույն համակարգեր, որոնք կարողանան արտակարգ իրավիճակների պարագայում (տարերային աղետներ, ոտնձգություններ, պատերազմական իրավիճակներ եւ այլն) լրիվ կամ մասնակի չափով հուսալիորեն ապահովել անհրաժեշտ քանակի էներգիա: Կարելի է օգտագործել արեւի էներգիան, գետնի տակ քողարկված կառուցել փոքր հզորության հիդրոէլեկտրակայաններ եւ այլն:
Անչափ կարեւոր դեր կարող են ունենալ այսպես կոչված էլեկտրական փակոցները, որոնք հատկապես հզոր պաշտպանություն ունենալու դեպքում սահմանապահների (ցամաքային զորքեր) համար կարող են դառնալ հուսալի եւ փրկիչ օղակ: Թշնամու ճանապարհը դեպի մեր հայրենիքի սահմաններ եւ խորքեր պետք է փակ լինի: Անհրաժեշտ է խիստ գաղտնի սկզբունքով կազմել ծրագիր եւ փուլ առ փուլ իրականացնել:
Առաջարկությունս հետեւյալն է. ՀՀ-ում գործող ռազմական ակադեմիա-ներում որպես հատուկ դասաժամեր մտցնել «Ռազմական էներգետիկա» առարկա: Այն հնարավորություն կտա մեր ապագա սպաներին, գեներալներին նախնական գիտելիքներ ստանալ վերոնշյալ խնդրի վերաբերյալ: Կարեւոր է նաեւ ՀՀ պաշտպանության նախարարությունում հասարակական կարգով մասնագետ խորհրդատու ունենալը:
Հապաղելու իրավունք չունենք: Մեր հայրենիքի սահմանները մե՛նք պիտի պաշտպանենք:
Ստեփան ՊԱՊԻԿՅԱՆ
Հայկական էներգետիկական ակադեմիայի հիմնադիր նախագահ
