* «Գիտցիր դժգոհել դուն քեզմէն մինչեւ անգամ եթէ յաջողութիւնդ կատարեալ է եղած. խորհելով՝ թէ քու յաջողութիւնդ պիտի ըլլար կատարեալ աւելի, աւելի կատարեալ մտածութեան հոգածութիւնը թէ ունենայիր» (Նարպէյ Քարաճեան):
* «Սեփական կրքերին իշխելը հոգու գերագույն մեծության հատկությունն է: Նման վեհությունը ինքնին պաշտպանում է հոգին խորթ ազդեցություններից: Չկա ավելի մեծ իշխանություն, քան ինքն իր վրա իշխանությունն է, սեփական կրքերին տիրապետելը, դրանց կամայականությունը հաղթահարելը» (Բալթազար Գրասիան):
* «Դրամի խիստ կարիք ունեցող մարդիկ սովորաբար հեշտությամբ են կառչում ուրիշների մտքերից: Նրանք թերթերին եւ բամբասող հարեւաններին թույլ են տալիս մտածելու իրենց փոխարեն: Կարծիքը ամենաէժան ապրանքն է աշխարհում: Հարցրեք ում կամենաք, եւ նա կնվիրի ձեզ կարծիքների մի ամբողջ փունջ: Սակայն եթե դուք որոշում ընդունելիս պետք է հիմնվեք ուրիշի կարծիքի վրա, ապա ոչ մի բանում չեք առաջադիմի եւ հատկապես կձախողվեք ցանկությունը դրամի վերածելիս» (Նապոլեոն Հիլլ):
* «Աշխատանքը, միայն ու միայն աշխատանքն է մեր ուսուցիչը եւ ղեկավարը: Նաեւ այս հիմքից է բխում իմ հակակրանքը տիտղոսների հանդեպ: Մարդկանց մեծ մասը դյուրին հաղթահարում է ամեն աշխատանք, բայց հեշտությամբ թույլ է տալիս, որ տիտղոսները հաղթեն իրեն: Վերջիններս զարմանալի ազդեցություն են գործում. չափազանց հաճախ նրանք ծառայում են որպես աշխատանքից խուսափելու յուրատեսակ ցուցանակ: Սա հավասարազոր է գերազանցության կարգախոսի. «Սույնի տերը պարտավոր չէ զբաղվել որեւէ բանով, այլ միայն սեփական վսեմությունը եւ մյուս մարդկանց ոչնչությունը գնահատելով»: Տիտղոսը, ցավոք, բացասաբար է ազդում ոչ միայն տիտղոսակրի, այլեւ շրջապատի մարդկանց վրա: Դժգոհության պատճառն այն է, որ տիտղոս կրողները եւ երեւելի դիրք գրավողները միշտ չէ, որ իրականում շիտակ առաջնորդ են լինում: Ամեն ոք ընդունում է նման առաջնորդին, որը գիտե մտածել ու հրամայել: Իսկ երբ ի հայտ է գալիս այդպիսին, որը նաեւ տիտղոսի տեր է լինում, ապա հարկ է լինում ուրիշներից տեղեկանալ նրա տիտղոսի մասին. ինքը երբեք դա չի ցուցադրում: Գործարար կյանքում տիտղոսներին չափազանց մեծ տեղ տալիս բուն գործն է տուժում» (Հենրի Ֆորդ):
* «Ինքներդ ձեզ համար հեռու ապագայի առաջխաղացման պատկեր ստեղծեք: Ձեր մտահորիզոնում որքան պարզորոշ ուրվագծվի առողջ, երջանիկ եւ հարուստ ապագայի պատկերը, այնքան արագ կհասնեք դրան, այնքան արագ այն կմոտենա ձեզ: Ձեր մտահղացած լավագույն կյանքի պատկերը որքան հստակ ու տեսանելի գծագրեք, այնքան բարենպաստ ու վճռական կդառնաք այն կյանքի կոչելու գործում: Միանգամից ազատություն կտաք բնությամբ ձեզ տրված ստեղծագործական ունակություններին, ու այնքան շատ մտքեր կծնվեն, որոնք կօգնեն հասնելու ձեր հզոր երազանքին» (Բրայան Թրեյսի):
* «Լավ վաճառողը գնորդի ցանկությունն իմանալու համար զրույցը սկսում է հարցերի հմտորեն կառուցած համակարգով: Սովորեք հարցեր տալ: Հատկապես դրանք, այլ ոչ թե հաստատական բնույթի նախադասություններն են օգնելու ձեզ կատարելու արդյունավետ գործարքներ եւ հարկադրելու մարդկանց մտածել այնպես, ինչպես դուք…. Բոլոր տեսակի զրույցների կառավարման արվեստում հայտնի է հետեւյալ օրինաչափությունը՝ ով հարցեր է տալիս, նա էլ վարում է զրույցը, նա էլ կառավարում է» (Վիկտոր Շեյնով):
* «Թող ձեր ենթակաները մշտապես զգան, որ անձամբ ձեզ համար հույժ կարեւոր է բոլոր ձեր ջանքերը գործադրելը՝ հանուն առավելագույն արդյունքի ձեռքբերման: Թող նրանք հասկանան, որ սեփական ներուժի իրացումը մարդու ինքնիրացման բարձրագույն ձեւն է, եւ որ իրենց հոգեւոր աշխարհի համար կարեւոր է զգալը, թե ինչպես իրենց հատկությունները եւ, հետեւաբար, իրենց կյանքը լավագույն գործադրումն է ստանում» (Հանս Ալթման):
Պատրաստել է Վ. ՄԻՐԶՈՅԱՆԸ
